Read Rongmei Naga SINGCHAKH 21 Bible Online

SINGCHAKH 21 - Rongmei Naga bible

SINGCHAKH 21

¹Kanaanmei dihba biak thangc bammei Aradmei guangc rui Isaraelmei nunc Atharim chaeng thangc rui guang the twmei chu pwkhou, kamei rui kaniw ta akhangv the kumna kaniw meic gaanvsaekc ta ni nym the.

²Khoutei Isaraelmei rui RINGHPOUC khou mi latdyng hei sw the: “Nang rui mi nunc ti hei aniw baanc khou tiilou pw e thei, aniw rui kaniw tuang kaidai guay ta swmutsutlou puni.”

³Kaniw samei tei RINGHPOUC rui chulouna Kanaanmei nunc ruc khou tingamlou the. Kumna Isaraelmei nunc rui kaniw ta ni kaniw tuang kaidai guay ta ni swmutsutlou the, kumna mi bamv zanc tei Horma twna kaw the.

⁴Isaraelmei nunc tei Hor Chyng ganclouna Edom tat nkic khang rui Ntou duipui tatmei chaeng tat the. Kumna chaengkui khou meic nunc tei akhaengv ngam makna

⁵Mousi lev Ravguangc ta nut thau the. Kaniw rui sa the, “Tu khang ni zangv khang ni maekmei tazikramv khou hei theiclou khang tabui swna Izip kandic khou rui nduangh pat tu cho? Mi kumhmei tu nuh makmei taektw hei aniw tu bam ngam mak ge!”

⁶Khoutei RINGHPOUC rui kakhai tanhmei nrui pang meic pang khou tei tiguang the, kumna Isaraelmei meic mpeyna ta nchow luai the.

⁷Meic nunc tei Mousi khou guangna sa the, “Aniw nang ta khatni RINGHPOUC ta sa kasicna samei paap tei aniw phungc dyng the. Mi nrui guay hei aniw khou rui laa ganclou dat khang RINGHPOUC khou huayneylou dat tho.” Kumna Mousi rui meic nunc khang huayneylou dat the.

⁸Nrui nchowloumei guay rui zauc lana gay dat kandiu khang tanzinc tuang nrui maengc kasiamhna thingtwan khou daanc thau o twna RINGHPOUC rui Mousi khou sa the.

⁹Kumna Mousi rui tanzinc tuang nrui kasiamhna thingtwan khou lou the. Thowkumhmei nrui nchowloumei rui tanzinc nrui ta tei zauhmei guay rui gay dat kan the.

¹⁰Isaraelmei rui tat guangna Obot khou guangna zypui sw the.

¹¹Mi bamv tei ganclou datna, Moabmei kandic tuang neihpat biak tazikramv khou lungc taekloumei Abarim khou guangna zypui sw the.

¹²Mi tangv tei kaniw Zered nzaengc khou zypui sw dat the.

¹³Khoutei rui kaniw tat thau datna Amormei kandic alamvmei tazikramv khou Arnon duithuak tuang dihpy biak thangc zypui sw dat the. (Arnon duithuak hei Moabmei lev Amormei tuang ramvrei the.)

¹⁴Kum tina RINGHPOUC tuang Rihbamv Suc-rih Latrik buk khou “Supha ramv khou Waheb kaidai khou, khatni nzaengc guay khou, Arnon duithuak,

¹⁵khatni Ar kaidai biak thangc, Moab ramvrei biak nzaengc tuang ngangh alamvmei twna sa bam tuang e.”

¹⁶Mi bamv khou tei rui kaniw Beer nganv tat guang the, “Mi hei RINGHPOUC rui Mousi khou meic nunc ta tei khuam kaduai tho ai rui kaniw khang dui tii puni twna sa kanmei duikhunc e.”

¹⁷Mi ganv khou tei Isaraelmei rui mi lu hei suan the: “Duikhunc guay rui nang khang dui tii pat the; aniw rui mi ti hei lu rui thuanc ni.

¹⁸Guangh nac nunc rui chauloumei duikhunc, guangmei nunc rui nthukna chauloumei duikhunc, guangh tuang dihgaek builwang rui chauloumei duikhunc.” Kaniw mi tazikramv khou tei rui Mattana khou guang the.

¹⁹Hei khou tei rui Nahaliel khou, Nahaliel khou rui Bamot khou,

²⁰Bamot khou rui Moabmei ramv khou naimei nzaengc, Pisga Chyng phay, sypungramv phaengc towmei bamv khou guanglou the.

²¹Isaraelmei guay rui hei khou tei rui Amormei guangc Sihon khou latdiu tatmei thouc guangna kumna sa the,

²²“Aniw nang tuang kandic tat kaanna tat nii e. Aniw ni aniw tuang khouringc guay ni chaeng paengc pat lak ge. Nangniw tuang laupuk khatni drakhalau khou tatlou lak ge, nangniw tuang duikhunc dui nganvna zangv lak ge. Aniw nang tuang ramv tat twan mak saanv chaeng luang dai khou na tat ni de.”

²³Kum e tiki Sihon rui karamv khou tat kaan pat khang nuhlou mak khe. Kamei rui katuang ricmei guay ta khuam lana tazikramv khou Jahaz twna kawmei bamv khou Isaraelmei ta adow the.

²⁴Isaraelmei rui kaniw meic mpeyna ta swluai the kumna kakandic tei Arnon khou rui Jabbok khatni Ammonmei tuang ramvrei nganv laa the kalam thu Jahaz tuang ramvrei hei Ammonmei ramvrei the.

²⁵Kumna Isaraelmei rui Amormei tuang kaidai guay, Heshbon khatni mi tuang namv guay laa the kumna kaniw mi guay khou tei lungc the.

²⁶Heshbon hei Amormei guangc Sihon tuang kaidai the. Sihon rui Moabmei guangc ta adowna ngam lana kakandih tei Arnon duithuak nganv laagut the.

²⁷Kum tina lu swna kumna suan e: “Heshbon khou guang o, guangh Sihon tuang kaidai khou! Mi kaidai hei kasiamh thaulou dat kandiu.

²⁸Kaganv akhat khou Heshbon kaidai khou rui Sihon tuang ricmei nunc mai kumcna pat bam khwan e; kaniw rui Moab khou Ar kaidai ta swmut khwan e Arnon ramv karucmei tei swmutlou khwan e.

²⁹He Moabmeile, hei tei nang khang adih meic pingmei tuang cho! Kemos ta kalummei nunc nangniw ta swkamut kamailou the! nangniw tuang rav rui nangniw ta rih pingna pakmei nunc tiswlou the, kanac aluh guay ta Amormei guangc Sihon baanc khou tiilou the.

³⁰Kum e tiki ntaw thu katuang kikta ta swmut the, Heshbon khou rui Dibon nganv, Medeba nganv mai chuangc patmei khou aniw rui swmutlou the.”

³¹Heikumna Isaraelmei nunc Amormei kandic khou lungc the.

³²Jazer kaidai ta adow khang kachaeng zauc o twna Mousi rui meic thouclou the. Isaraelmei rui mi kaidai khatni mi daeng khou naimei namv guay ta lai lana mi kaidai guay khou bammei Amormei guay ta nthau ganc the.

³³Khoutei rui Isaraelmei tei hanc dat lana Bashan chaeng tat dat the. Hei khou tei Bashanmei guangc Og rui kaniw ta Edrei khou adow the.

³⁴RINGHPOUC rui Mousi khou sa the, “nangniw kata ping riu. Ai rui kata, katuang mei nunc ta khatni kakandih ta nang baanc khou tiilou puni. Amormei guangc Sihon khou swloumei kumcna kakhou ni swlou tiu.”

³⁵Kumna Isaraelmei rui guangh Og, kanac mpouh nunc, khatni katuang mei guay ta, gaanv khat na ta sini tiringc nsaekclou makna swluai ngam the, mi tangv kaniw rui mi kandic tei laa the.