Read Rongmei Naga SINGCHAKH 22 Bible Online

SINGCHAKH 22 - Rongmei Naga bible

SINGCHAKH 22

¹Isaraelmei nunc tei tat thau dat lana Jordan daeng Moab nzaengc khou Jeriko phaengc arwnmei bamv khou zypui kasiamh dat the.

²Moabmei guangc Zippor nac mpouh Balak rui Isaraelmei nunc rui Ammormei nunc khou swlou kanmei guay tei how the khatni Isaraelmei nunc tei meic azuh geic cho twmei thay the.

³Isaraelmei nunc ta kamei mpeyna ping the, kalam thu mi nunc tei meic mpeyna khwan e.

⁴Moabmei nunc tei rui Midianmei tuang kapy swmei nunc khou sa the, “Guaichic rui laupuk tu mutsutloumei kumcna mi meic kangdai hei rui aniu daeng khou nai nkuay bammei guay ta swmutsutlou puni the.” Kumna Zippor nac mpouh Balak, Moabmei guangc rui latmei ndiuna

⁵Amaw kandic khou naimei Euphratis duithuak paengc khou naimei Pethor twna kawmei bamv khou bammeipu Beor nac mpouh Balaam khou kumna sa the, “Izip kandic thangc rui zaatc akhat guang the, mi mei nunc hei kandih kapwm khou bam padik the, kaniw rui aniw kandic ta laa khang karamc bam the.

⁶Kaniw hei aniw khang suangc baengtanc-rihliang the. Kumhpui zaeng rui guangna kaniw ta sianglou o. Kum e thei aniw rui kaniw ta ngamlouna mi kandic khou rui alay ganc nuh pwng e. Nang rui suaihiamlou pwkhou meic nunc suaihiam laa e, khatni nang rui sianglou pwkhou, meic nunc tei syang phungc e.”

⁷Kumna Moabmei khatni Midianmei tuang kapy nunc tei siangloupui manv khang tei phungcna Balaam daeng thangc tat the, kumna Balak lat tei poulou the.

⁸Balaam rui kaniw khou sa the, “Aseic thu mi khou hei ziplou tho RINGHPOUC rui sa samei tei ai rui nangniw khou salou puni the.” Kumna Moabmei kapy nunc tei Balaam daeng khou bangvlou the.

⁹Ravguangc rui Balaam khou guangna sa the, “Nang daeng khou bangv bammei nunc hei tabui swmei nunc cho?”

¹⁰Balaam rui Ravguangc khou sa the, “Moabmei guangc Zippor nac mpouh Balak rui ndiu guangmei nunc e.

¹¹Kaniw rui kum sa e, Izip kandic thangc rui zaatc akhat guang e, kaniw rui kandih kabamv kathuic khou bam padik the, kaniw ta guangna sianglou o kum e thei ai rui kaniw ta rih ngamna alay ganc ngam puni.”

¹²Ravguangc rui Balaam khou sa the, “Mi nunc thei lay tat riu, Isaraelmei nunc ta sianglou riu, kalam thu kaniw hei atuang suaihiam phunghmei nunc e.”

¹³Nthuanh lauthwan thauna Balaam tei Balak latdiutatmei nunc khou guangna sa the, “Nangniw kai hanc dat tho; RINGHPOUC rui ata nangniw thei titat mak khe.”

¹⁴Kumna kaniw hanc guang dat lana “Balaam tei guang mu the” twna Balak khou salou the.

¹⁵Khoutei Balak rui kapy swmei meic geic ranvna, reymei pang khang tei suangc daihmei kapy nunc ta thouc dat the.

¹⁶Kaniw Balaam daeng thangc tatna Balak tuang lat tei kumcna phungc guang the: “Nang adaeng khou guang khang rouhlou rio!

¹⁷Ai nang phayphy tii chuyna tii ni de khatni nang sa samei taanclou ni de. Guanglouna mi mei nunc ti hei sianglou na ro.”

¹⁸Kum e tiki Balaam rui daw the, “Balak rui kakai khou naimei kachaekc kaphut guay tii bam sini, nthyammei daihmei lam khou nganvna RINGHPOUC a Ravguangc tuang latdanv guay liam ngam mak ge.

¹⁹Tiki guang reymei nunc tei kumcna nangniw ni ziplou muay o, RINGHPOUC rui lat baihmei sa dat puni ny zauc kho.”

²⁰Mi nungc zingbangc tei Ravguangc Balaam khou guangna sa the: “Mi nunc hei rui nang ta kaw khang guang pw e thei, tat khang sw tho, tiki ai rui taanc o twmei na taanc nina e.”

²¹Kumna nthuanh lauthwan Balaam kuanniam tuangc lana Moabmei tuang kapy nunc tei lev tat the.

²²Balaam rui tatmei ta tei Ravguangc kalungpuamc the. Kumna Balaam tei kabangc gaanv nei ta nduanghna tat bam khou RINGHPOUC tuang baanchara rui kachaeng ding thingc the.

²³Baanchara rui baengsaeng sinna chaengkui khou ding bammei ta kuanniam tei rui how lana chaengkuaic pak gutna ramvpuk thangc pak tat the. Balaam rui kuanniam ta tei kathamvna chaeng thangc gaengc pat dat the.

²⁴Hei tangv tei chaengnaek kanei khou drakhalau naimei kumcna chaengnaek kanei tei ntauh raengh rui raeng piangh piangloumei nrummei chaengkat khou baanchara tei ding the.

²⁵Kuanniam tei rui baanchara ta tei how lana raengh biak thangc kachuamh kapianh thau the kumna Balaam tan tei ntauh khou tak the. Balaam rui kuanniam ta tei kathamv dat the.

²⁶Baanchara tei hu thangc tat pat lana kanaek akhat na thangc sini nkic tat nuh makmei chaengkat nrummei khou ding the.

²⁷Kuanniam tei rui RINGHPOUC tuang baanchara ta tei how pwkhou ntaw thu zip key the. Balaam tei kalungpuamcna kuanniam ta tei katuang builwang rui bai the.

²⁸Khoutei RINGHPOUC rui kuanniam mwang lat sa khang nuhlou the, kumna hei tei rui Balaam khou kumna sa the, “Ai rui nang khou tabui swlou the na cho? Tabui swna nang ata kumna kathamv luan kathumh thumh bam tu cho?”

²⁹Balaam rui daw the, “Nang ata ntan bam e! Ai baengsaeng phungc bam nangc khwan e thei ai nang ta dowluai kan nimei tuang di the.”

³⁰Kuanniam tei rui daw the, “Ai hei nang ntaw nganv tuangc guangmei kuanniam tei hamhna cho? Kahu nungc ai rui nang khou heikumna swloumei tuang nai thena cho? Maek ge” twna kamei rui daw the.

³¹Mi ganv khou tei RINGHPOUC tuang baanchara baengsaeng sinna ding bammei ta tei Balaam ta tihowlou the. Khoutei Balaam tei kandih khou pun nkhum khuakh key the.

³²Baanchara tei rui sa the, “Tabui swna heikumna nang tuang kuanniam ta bai luan kathumh thumh bam tu cho? Nang chaeng thingh khang ai guang tuang the, kalam thu mi chaengtat hei nang tat bam nina hamh e.

³³Nang tuang kuanniam rui ata how lana karei liang kathumh the. Karei mak khwan e thei ai rui nang ta swluaina ntaw thu nang tuang kuanniam na kha ringc bam ni tuang the.”

³⁴Balaam rui daw the, “Ai nkhuai the. Ata khaamlou khang nang chaeng khou dingthingc bam e twmei ai thay mak khwan e, kumna ai tatmei hei maanv the twna nang ning e thei thu, ai kai hanc dat ni the.”

³⁵Tiki baanchara tei rui sa the, “Mi nunc thei hei lay tat tho, tiki ai rui sa o twna samei lat na tei nang sa nina e.” Kumna Balaam tei kaniw thei lay tat the.

³⁶Balaam guang the twmei Balak chu lana, Moab ramvrei patduc liangmei khou, Arnon duithuak paengc khou naimei Ar kawmei kaidai khou kata ariw khang pat the.

³⁷Khoutei Balak rui kakhou sa the, “Nang ta kaw khang ai meic thouc guang rey khou tei nang tabui swna guang mak tu cho? Ai nang tuang phayphy tii ngam pu lak ge twna nang ningna cho?”

³⁸Tiki Balaam rui daw the, “Ntaw ai guang the tiki ai lat akhat na kha salou nii e. Ravguangc rui sa o twmei na tei ai sa nina di the.”

³⁹Kumna Balaam tei Huzot kaidai thangc Balak lev tat the.

⁴⁰Balak rui guaih khatni lauziu dowluaina khaeng the, kumna zanh asaekc Balaam khatni kadaeng khou bammei kapy nunc khang tei tii the.

⁴¹Nthuanh thauna Balak rui Balaam ta Bamot Baal chyng khou nduangh ku the, hei khou tei rui Balaam rui ana liangmei Isaraelmei kalangv akhat ta how the.