Read Rongmei Naga SINGCHAKH 23 Bible Online

SINGCHAKH 23 - Rongmei Naga bible

SINGCHAKH 23

¹Balaam rui Balak khou sa the, “Hei khou hei ravchabamv chanei kasiamhlou o, kumna guaituamchic chanei lev ziuchic chanei laaguang o.”

²Balaam rui samei tei Balak taanclou the, kumna kaney rui guaituamchic akhat khatni ziuchic akhat akhat ravchabamv kathuic khou tei katlou the.

³Khoutei Balaam rui Balak khou sa the, “Mi nang tuang ravchapaeng daeng khou hei nang ding bam khwan o, RINGHPOUC rui ata ariw pu ni ny ariw pu lak ny ai tat zauc ni he. Kamei rui akhou dinclou loumei ai rui nang khou dinclou dat puni.” Kumna karana chyngtwan akhat khou ku the.

⁴Hei khou tei Ravguangc rui kata ariw the. Balaam rui Ravguangc khou sa the, “Ai rui ravchabamv chanei kasiamh thauna ravchabamv kathuic khou tei guaituamchic akhat lev lauziuchic akhat akhat katlou kan the.”

⁵RINGHPOUC rui Balaam khou kamei rui sa nimei lat tei salou lana kalat tei Balak khou salou khang thouclou dat kan the.

⁶Kumna kamei guang dat pwkhou Balak tei Moabmei tuang kapy nunc lev rawna khaengmei mai daeng khou tei ding bammei ta ariw the.

⁷Balaam rui ravmun dinc thau the: “Moabmei guangc Balak rui ata neihpat biak chyngramv Siria kandic khou rui nduangh guangmei tuang e. ‘Guangna akhang rui suaihiamlou o, Isaraelmei ta sianglou o,’ twna kamei rui sa the.

⁸Ravguangc rui sianglou makpui mei ta ai rui akumhna sianglou nina cho khatni Ravguangc rui gancpat makmei nunc ta akumhna swkamut kamailou khang ai rui sw bam nina cho?

⁹Tautuangc but kauhmei ruc khou rui ai kaniw ta how the; ai rui kaniw ta chyngtwan khou rui phaengc how the. kaniw tei meic pang akhat swna kaniw rana lungc bam e; kaniw rana zaatc akhat swna lungc bammei zaat re; kaniw hei zaatc baih baihmei suangc suaihiam mbuna laatowmei zaat re twmei kaniw thay e.

¹⁰Isaraelmei kikta hei syniang zu geic e— kasing chak dat ngam thay lak khe. Ai hei Ravguangc tuang mei akhat swna tiluailou o, Ravchaptatmeipu akhat kumcna ata nchu-nzaenghna titheiclou o.”

¹¹Khoutei Balak rui Balaam khou sa the, “Nang rui akhou tabui tuang swlou bam tu cho? Ata zauczihmei nunc ta sianglou khang ai nang ta kaw guang di ki, nang rui sa bammei hei thu kaniw khou suaihiamlou bam di the cho.”

¹²Balaam rui sa the, “RINGHPOUC rui sa o twna samei na tei ai thu sa nina di the.”

¹³Khoutei Balak rui Balaam khou sa the, “Isaraelmei gaanvsaekc na ta how nuhmei meic kapwm ta how makmei kabamv baihmei akhat thangc anei tat dat kho. Mi khou tei rui kaniw ta sianglou o.”

¹⁴Kamei rui kata Zophim ramv thangc nduangh tatna Pisga Chyngtwan khou nduangh ku the. Hei khou tei ni kamei rui ravchabamv chanei kasiamh thaulouna ravchabamv kathuic khou guaituamchic akhat khatni lauziuchic akhat akhat khaenglou the.

¹⁵Balaam rui Balak khou sa the, “Mi nang tuang rawna khaengmei daeng khou hei ding bam khwan o, ai mi thangc tei Ravguangc ta ariw tat ni he.”

¹⁶RINGHPOUC rui Balaam ta ariw the. Tabui lat sa nina cho twmei kakhou salou lana katuang lat tei Balak khou salou khang thouclou dat kan the.

¹⁷Kumna kamei guang dat pwkhou, Balak tei Moabmei tuang kapy nunc lev rawna khaengmei daeng khou tei ding bam khwan the. RINGHPOUC rui tabui sa bu cho twna Balak rui thanv the.

¹⁸Khoutei Balaam rui kumna ravmun dincpat the: “Guang tho, Zippor nac mpouh Balak, ai rui sa puni the, nking tho.

¹⁹Ravguangc hei maansei kumcna saraamhmeipu hamh e; maansei kumcna kalung kalaihmeipu ni hamh e. kamei rui nrianhlou kan e thei taanclou rap di the; kamei rui sapat kan e thei taanc rap di the.

²⁰Suaihiamlou khang akhou sa the, Ravguangc rui suaihiamloumei ta tei, ai rui laa ganc dat ngam mak khe.

²¹Isaraelmei tuang theidwan tei ai how the, sansimei khatni ryanramei lungcriu lak ge. RINGHPOUC kaniw Racguangc tei kaniw lev tat nchamc bam e; kamei hei kaniw guangc e twna kaniw kaw bam e.

²²Ravguangc rui kaniw ta Izip khou rui nduangh patlou the; kamei nwmbangc guaituamchic kumcna kaniw khang pumtan di the.

²³Parian paramei rui ni, duaih raengh rui ni Isaraelmei ta pwnrau lak ge. Isaraelmei nunc lam khou meic nunc rui kumna sa puni the, ‘Ravguangc rui taancloumei taanv tei zauclo!’

²⁴Isaraelmei zaat hei tancbauhmei kamangliangpui kumc e; kamangliangpui kumcna thau pw the, siat puat katupclou mak saanv nthaekc mak ge, kamei rui swluailoumei nunc zanc tei tumak saanv zei tei zangv padik mak saanv nthaekc mak ge.”

²⁵Khoutei Balak rui Balaam khou sa the, “Nang Isaraelmei nunc ta sianglou nangh the khatni suaihiam ni tiilou ri tho!”

²⁶Balaam rui daw the, “RINGHPOUC rui samei theilayna ai taanc puni de twna ai sa kan makna cho?”

²⁷Balak rui sa the, “Athei lay o, kabamv baih thangc ai nang ta nduanghlou puni. Mi bamv khou tei rui Ravguangc rui kaniw ta tisianglou kho ni nuh e.”

²⁸Tazikramv phaengc alamvmei bamv Peor Chyngbut twan khou kamei rui Balaam ta nduangh guang the.

²⁹Balaam rui kakhou sa the, “Mi khou hei ravchabamv chanei kasiamhlou o, kumna guaituamchic chanei lev lauziuchic chanei laaguang o.”

³⁰Balak rui hei tei taanclou the, kumna ravchabamv kathuic khou tei guaituamchic khatni lauziuchic akhat akhat khaenglou the.