Read Rongmei Naga SINGCHAKH 24 Bible Online

SINGCHAKH 24 - Rongmei Naga bible

SINGCHAKH 24

¹Balaam kamei rui Isaraelmei ta suaihiamloumei ta RINGHPOUC rui kahaw e twmei thay lapui zaeng rui kamei daanh ni saanc dat mak khe. Kamei rui tazikramv thangc tei phaengc pat pwki

²Isaraelmei tei kaikhwang kaikhwang swna zypui swna bammei tei how the. Ravguangc bumaengc rui kata sinna

³kamei mi ravmun hei dinc pat the: “Beor nac mpouh Balaam rui dinc patmei lat re, how nthanna howmeipu lat re.

⁴Ravguangc rui samei ta chumeipu lat re. Ngamparymei Racguangc rui lyanloumei ndawman howmeipu lat re. Pun nkhum key sini kamik tanguih makmeipu lat re;

⁵Adih how gay kan tu cho Jakob tuang pheykai guay tei! How gay e nangniw tuang zypui kai guay tei he Isarael;

⁶Tadanv bang pang karian karian ding bam kumc e, duithuak daeng khou naimei pikwan kumc e, RINGHPOUC rui lingcloumei maruai bang kumc e, dui daeng khou thaumei sidar bang kumc e.

⁷Kaniw khang tingdui tii chuyna tii keylou puni, khatni dui gaymei bamv khou kaniw bwan thau puni. kaniw tuang guangc tei Agag suangc daic puni, kaguangh kandic tei mpeyna daic puni.

⁸Ravguangc rui kaniw ta Izip khou rui phungc patlou the; kamei rui kaniw khang rui nwmbangc guaituamchic apwan kumc adowlou the. kaniw rui kaniw tuang zauczihmei ta swmutlou the, kaniw rou swpiaklou the, katuang saucpai rui adow puni

⁹Isaraelmei hei adow khang kamangliangpui kumcna nchwanna dup be; Kamangliangpui kumcna zip bam pwkhou thow rui nchyang thau ngam puni? Kamei rui zip bammei ta meic gaanv khat na rui sini nchyang thau bauc mak ge. Isaraelmei ta suaihiamloupui mei ta suaihiamlou puni, Isaraelmei ta siangloupui mei ta sianglou puni.”

¹⁰Balak rui kalungpuamcna kabaanc kanei dap kariuna sa the, “Ata zauczihmei ta sianglou khang ai nang ta kawmei tuang e, kum e tiki nang rui kaniw ta suaihiamlou kathumh kan the.

¹¹Nang kai thangc tat dat kan tho! Ai nang khang swan tii ni twna latdyng swloumei tuang e, tiki RINGHPOUC rui tilaa mak khang thingc kan the.”

¹²Balaam rui Balak khou sa the, “Ai rui nang latdiu tatmei nunc khou salou kan tu hamh cho?

¹³Balak tuang daandi kachaekc kai khat lou padikmei akhang tii bam sini Ravguangc rui dincloumei khou rui twanna simei taanh khang pwni, gaymei taanh khang pwni ai dinc ngam mak ge. RINGHPOUC rui samei na tei ai sa puni.”

¹⁴Balaam rui Balak khou sa the, “Ntaw thu ai akandih thangc tat dat kan puni the, kumna Isaraelmei rui thei thangc nang tuang mei nunc ruc khou taanclou pw nimei tei ai dinclou duc puni the.”

¹⁵Kumna kamei rui mi lat hei dincpat the: “Beor nac mpouh Balaam khou tii guangmei lat re, how nthan thiakh thiakna howmeipu lat re,

¹⁶Ravguangc rui samei ta chumeipu, Kauh Liangmeipu rui tiimei ningting laatowmeipu lat re. Ngamparymei Racguangc rui lyanloumei ndawman howmeipu lat re. Pun nkhum key sini kamik tanguih makmeipu lat re.

¹⁷Neihkhatpui tingmik khou guang nimeipu ta ai how the; ai how the kata ntaw na thu hamh e! Karangmei gaanchuangcna kumhmei guangh akhat mi zaat khou tei chapat puni. Lauthwan gaanphiu kumcna kamei Isaraelmei khou rui pat puni. Kamei rui Moabmei kapy nunc ta hiw key puni khatni Setmei nunc ta bai key puni.

¹⁸Kamei rui katuang zauczihmei nunc ta Edom khou rihngam puni kumna kaniw tuang ramv guay tei kaniw rui laa puni. Isaraelmei rui rihngamna bam puni.

¹⁹Jakob khou rui patmeipu rui guanghtu puni, kaidai khou bammei nunc ta swmutsutlou puni.”

²⁰Mi tangv tei Balaam rui Amalekmei ta katuang ndawman khou how lana kumna sa the: “Amalekmei hei zaatc guay pang khou tanc liangmei zaat akhat re, tiki nkhamh khou mi zaat tei tingsaengzaeng amaan mutsut puni.”

²¹Katuang ndawman khou Kenmei ta ni howna kumna sa the: “Nang bammei bamv hei giuga khang maekmei bamv the, khowtau khou swloumei nruaybou kumc e,

²²tiki Kenmei nangniw ta swmutlou puni the, Asiriamei rui nangniw ta bangh khang zay pwkhou”

²³Balaam rui kumna ravmun dincpat dat re: “Dihpy biak thangc guang kachwn bammei hei tabui swmei nunc cho?

²⁴Rihkeymei nunc tei Saipras khou rui rungh tuangcna guang puni. Kaniw rui Asiria khatni Eber ta rih ngamna kaniw bangc khou lou puni, tiki kaniw ni tingsaengzaeng amaan mutsut kan puni.”

²⁵Mi tangv tei Balaam kakai thangc hanc dat kan the. Balak ni hanc dat kan the.