Read Rongmei Naga SINGCHAKH 25 Bible Online

SINGCHAKH 25 - Rongmei Naga bible

SINGCHAKH 25

¹Isaraelmei Akasia nzaengc khou zypui swna bammei douc, Isaraelmei nggaanvmei nunc tei mi khou tei bammei Moabmeiluc nunc lev lungcmaanv lungcmow thau khwan the.

²Moabmei tuang ravkhaengmei tuang ngai khou mi Moabmeiluc nunc rui mi Isaraelmei guay ti hei kaw guang the. Isaraelmei guay tei rui mi ngai khou tei guang tu lana mi rav ta tei kalum the.

³Mi Peor twna kawmei bamv tuang Baal rav ta tei kaniw kalum the. Khoutei RINGHPOUC rui kalungpuamcna,

⁴Mousi khou sa the, “Isaraelmei tuang kapy swmei guay ta tei kaw guang kaduaina, alat piumei swna, kaniw ta tei kalaanv ganv khou swluaina thaengclou nina e. Kum e tw e thei Isaraelmei ta alungpuamcna bammei hei kimkey puni.”

⁵Mousi rui Latzanpouc nunc khou tei sa the, “Peor tuang Baal rav ta kalummei guay ta tei nangniw rui swluai nina e.”

⁶RINGHPOUC tuang kalummei pheykai kaimun khou latluna bammei Mousi khatni Isaraelmei kaniw how takhaanv khaan khou Isaraelmeipu gaanv khat rui Midianmeiluc akhat ta kakai khou laaguang the.

⁷Eleazar nac mpouh Phinehas rui hei tei how lana dingthauna meic pang khou tei rui tat pat kan the. Kamei rui buy laa lana

⁸mi ney ta tei suic gutna kaney gaanv nei mei ta buy tei rui phian alamvphutlou the. Heikumna Isaraelmei pang khou meic ntaamhmei pat bammei tei nthaekc kan the.

⁹Kum e tiki mi hu khou tei meic 24,000 theic tangc kan the.

¹⁰RINGHPOUC rui Mousi khou sa the,

¹¹“Phinehas rui taancloumei taanv zaeng khou tei rui, ai rui, Isaraelmei ta lungpuamc dat mak khe. Ata hamhna rav baihmei ta kalummei ta kamei nuh mak khe, kumhpui zaeng rui ai rui kaniw ta alungpuam khou swkamut kamailou mak khe.

¹²Guang nimei ganv guay khou nganvna nai bam nimei nchu-nzaenghmei latdyng ai kamei lev sw the twna kakhou salou ti tho.

¹³Kamei khatni kakikta guay rui tingsaengzaeng amuh swna bam nina the, kalam thu Ravguangc ata hamhna rav baihmei ta kalummei ta kamei nuh mak ge, khatni meic nunc tuang paap tei kuaklou khang kamei rui swlou the.”

¹⁴Midianmeipui lev gaanv nei mei ta swluaikanmei Isaraelmeipu zanc kiu Zimri e. Kamei hei Salu nac mpouh khatni Simeon kaikhwangmei tuang kapy e.

¹⁵Ntumeipui zanc kiu rui Kozbi twna kaw e. Kapu Zur hei Midianmei kaikhwang akhat tuang kapy e.

¹⁶RINGHPOUC rui Mousi khou latdanv swna sa the,

¹⁷“Midianmei guay ta adowna kaniw ta swkamut kamailou tho,

¹⁸mi hei Peor khou kaniw rui nangniw ta guatna simei taanv taanhmei khatni Peor khou ravpyan guang bam khou swluai kanmeipui Kozbi tuang simei taanv zaeng khou tei rui e.”