Read Rongmei Naga SINGCHAKH 27 Bible Online

SINGCHAKH 27 - Rongmei Naga bible

SINGCHAKH 27

¹Mahla, Nouha, Hokla, Milka, khatni Tirza kaniw hei Zelophehad nac aluh nunc e. Zelophehad hei Josep nac Manase rui puanhmei Makir rui puanc datmei Gilead nac Hepher rui puanhmei mpouh e.

²Zelophehad nac aluh nunc tei RINGHPOUC tuang kalummei pheykai kaimun khou Mousi, Amuh Eleazar, kapy nunc khatni meic guayna hu khou guang dingna sa the,

³“Aniw pu tei kanac mpouh gaanv khat na sini ganclou duh makna tazikramv khou theic kan the. Kamei hei RINGHPOUC ta liammei Kora thei laymei hamh e, kamei kapaap zaeng rui theihmei tuang de.

⁴Kanac mpouh maekmei zaeng khou na rui, tabui swna apu zanc hei Isaraelmei pang khou maek bam nina cho? Aniw pu tuang chana punav pang khou aniw khang ni ramv nzanhlou o.”

⁵Mousi rui kaniw tuang lat bamv tei RINGHPOUC khou poulou the,

⁶kumna RINGHPOUC rui kakhou sa the,

⁷Zelophehad nac aluh nunc rui sa bammei tei nchumh the; kaniw pu chana punav pang khou kaniw khang ni ramv tiilou ti tho. Katuang tampy tei kaniw ni luak kan di tho.

⁸Thowkumhmei rui kanac mpouh ganclou duh makna theic kan e thei, kanac aluh rui tampy luak nina e twna Isaraelmei nunc khou sa ti tho.

⁹Kamei kanac aluh ni maek ge thei, kachana nunc rui katampy luak nina e.

¹⁰Kamei kachana maek ge thei kapu chana nunc rui laa nina e.

¹¹Kachana khatni kapu chana maek ge thei kata ana liangmei kariang kaluaic tei rui hei tei laa nina e kumna hei tei katuang sw nina e. RINGHPOUC ai rui tiilou kanmei latdanv tei kumcna, Isaraelmei kathuic rui kariak swna tat bam nina e.

¹²RINGHPOUC rui Mousi khou sa the, “Abarim Chyng khou ku lana ai rui Isaraelmei nunc khang tii nimei kandic ta tei zauc o.

¹³Nang hei tei how tangv pwkhou, nang chaic Aron kumcna nang ni theic puni the,

¹⁴kalam thu nangney gaanv nei Zin tazikramv khou alat liam e. Meriba khou Isaraelmei kapwm rui nutna sa pwkhou, nangney rui atuang nthanmei ngamv kaniw hu khou lyanlou nii mak khe.” (Meriba hei Zin tuang tazikramv khou Kades twna kawmei bamv khou naimei duipuakkai akhat re.)

¹⁵Mousi rui RINGHPOUC khou kumna huayney the,

¹⁶“He RINGHPOUC Ravguangc, panty kaipouc, nang tuang mei nunc hei gaengcloumei maekmei lauziu pang kumc bam mak khang meic nunc ta zaylou ngammei

¹⁷khatni rihbamv khou meic guay ta nduangh tat ngammei khatni nduangh guang dat ngammei, nang mei nunc hei gaengcloumei maekmei lauziu pang kumc bam mak khang meic akhat kadahlou khang ai huay e.”

¹⁸RINGHPOUC rui Mousi khou sa the, “Nun nac mpouh Joshua, bumaengh rui lungcloumeipu ta tei kaw lana kapy khou nang baanc bouclou tho.

¹⁹Kata amuh Eleazar lev meic guayna hu khou tidinglouna kamei nang phaan lyn nimeipu the twna kauc patlou ti tho.

²⁰Isaraelmei kapwm rui kalat piu diu khang nang tuang ngamv asaekc kakhou tiilou ti tho.

²¹Urim lev Thummim sin lana achwn phu bam nimei amuh Eleazar khou kamei ngangvlou bam puni. Katuang latdanv khou rui Isaraelmei nunc tat pat puni khatni guang dat puni.”

²²RINGHPOUC rui kakhou latdanv tiimei tei kumcna Mousi rui taanc the. Kamei rui Joshua ta amuh Eleazar khatni Isaraelmei kapwmna hu khou tidinglou the.

²³RINGHPOUC tuang latdanv theilayna Mousi rui Joshua py khou kabaanc bouclouna kata kaphaan lynmeipu the twna kauc patlou kan the.