Read Rongmei Naga SINGCHAKH 28 Bible Online

SINGCHAKH 28 - Rongmei Naga bible

SINGCHAKH 28

¹RINGHPOUC rui Mousi khou sa the,

²Mi hei latdanv tiina Isaraelmei nunc khou sa o: RINGHPOUC ta tipianloumei mai rui rawna khaengmei taektw puatkat guay tei nrianhloumei kaganv khou RINGHPOUC khang kat ro twna sa the.

³RINGHPOUC khang tii nimei taektw puatkat kiu mi hei the: tingmik pum rawna khaeng khang hiaksuimei tingkwm akhatmei lauziuchic kanei,

⁴hei tei lauthwan akhat tingzyn akhat khaeng nina e.

⁵Lauziu akhat khou gehu buay gaymei handwang akhat khatni gay liangmei Olive thauc kaduk akhat kariulouna kat kazauh nina e.

⁶Mi hei ntei mutsutna tingmik pum khaeng nimei tuang e. Mi hei karym rui RINGHPOUC ta tipianloumei taektw puatkat swna Sinai Chyng khou kat rey liang kanmei tuang tei the.

⁷Lauziu akhat khat katmei ganv khou zangv nimei drakhadui kadam padeih khou akhat bunlouna nthanmei ravchapaeng khou tei kat nina e.

⁸Tingzyn tei ni lauthwan kat kanmei tei kahak kumcna kat nina e. Mi hei karym rui RINGHPOUC ta tipianloumei taektw puatkat re.

⁹Sabbathneic ni hiaksuimei tingkwm akhatmei lauziuchic launa kanei, Olive thauc loumei gehu buay kaduk kanei khatni drakhadui kat nina e.

¹⁰Mi Sabbathneic tuang puatkat hei tingmik pum kat bammei khou tei kat haapmei tuang de.

¹¹Bw khou rey liangmei tingmik kathuic RINGHPOUC khou kumna khaeng nina e: guaituamchic launa kanei, lauziuchic akhat, tingkwm akhatmei lauziuchic chanei kat nina e. Mi guay hei hiaksuimei rana nina e.

¹²Olive thauc loumei gehu buay ni mi hei kumcna kat nina e: guaituamchic akhat pum handwang kathumh kathumh; lauziuchic akhat pum kanei kanei;

¹³khatni lauziunac akhat pum handwang akhat akhat. Mi rawna khaengmei hei karym rui RINGHPOUC ta tipianloumei puatkat re.

¹⁴Drakhadui rui guaituamchic akhat khou kaduk kanei, lauziuchic akhat khou kaduk akhat kapaek khatni lauziunac akhat khou kaduk akhat kat nina e. Mi hei tingkwm saanvsaengh bw khou reymei tingmik kathuic kat bam nimei puatkat the.

¹⁵Tingmik kathuic rawna khaengmei khou drakhadui kat kazauhna bammei ruc khou tei ziuchic akhat ni paapc khang khaeng nina e.

¹⁶Reymei bw tuang zaeng 14 nungc RINGHPOUC ta chakhwang swmei tuang Kaanpatmei Ngai ngay nina e.

¹⁷Zaeng 15 nungc rui ngai tei kahouhna zaeng chanei ngay nina e. Mi ganv lungh khou tei khay loumakmei ntyan na tu nina e.

¹⁸Ngay thau reymei nungc tei kalum khang guang kaduai nina e, kumna mi nungc tei kalwnlung taanv akhat na sini taanc nuh mak ge.

¹⁹Taektw puatkat swna RINGHPOUC khang rawna khaeng nina e: guaituamchic launa kanei, lauziuchic akhat khatni tingkwm akhatmei lauziuchic launa chanei khaeng nina e. Mi guayna tei hiaksuimei nina e.

²⁰Olive thauc loumei gehu buay ni mi hei kumcna kat kazauh nina e: guaituamchic pum kaduk kathumh; lauziuchic pum kaduk kanei kanei

²¹khatni lauziunac pum kaduk akhat khat swna lauziu chanei khou tei khaeng nina e.

²²Ziuchic akhat ni paapc khang khaeng nina e. Mi hei kumcna meic nunc ta sw nthanmei tuang thouc tei sw nina e.

²³Lauthwan pum rawna khaengmei khou tei mi hei haaploumei tuang e.

²⁴Hei tei kahak kumcna zaeng chanei tei tingmik pum RINGHPOUC khang tipianloumei swna kat tanh tan bam nina e. Mi hei tingmik pum rawna khaengmei khatni drakhadui katmei khou tei taanc haapmei tuang e.

²⁵Chaneimei nungc tei ni kalum khang guang kariu nina e, taanvtaanh nuh mak ge.

²⁶Lautay Ngai tuang reymei tingmik, nangniw rui RINGHPOUC khang napthanc katmei ganv khou tei, nangniw kalum khang guang kaduai nina e, kumna taanvtaanc nuh mak ge.

²⁷Mi nungc tei guaituamchic launa kanei, lauziuchic akhat, khatni tingkwm akhatmei lauziuchic launa chanei RINGHPOUC ta tipianlou khang rawna khaeng nina e. Kaguayna tei hiaksuimei rana nina e.

²⁸Olive thauc loumei gehu buay ni mi hei kumcna kat kazauh nina e: guaituamchic akhat khou handwang kathumh, lauziuchic akhat khou handwang kanei

²⁹khatni lauziunac akhat khou handwang akhat kat nina e.

³⁰Paapc khang ni ziuchic akhat khaeng nina e. Hei kumcna meic nunc ta sw nthanmei tuang thouc sw nina e.

³¹Tingmik pum rawna khatni taektw puatkat swna kat bammei ruc khou tei rui mi puatkat hei drakhadui puatkat lev kat haap nina e. Kaguayna tei hiaksuimei rana nina e.