Read Rongmei Naga SINGCHAKH 3 Bible Online

SINGCHAKH 3 - Rongmei Naga bible

SINGCHAKH 3

¹RINGHPOUC rui Mousi khou Sinai chyng khou kachucloumei ganv khou tei Aron lev Mousi kai kaikhuncmei heikumna nai bam khwan the.

²Aron tei kanac mpouh gaanv padeih e: gaanvthaihmei Nadab, Abihu, Eleazar khatni Ithamar hei nunc hei the.

³Kaniw ti hei thauh teylouna amuh suanglou khwan e,

⁴kum e tiki Nadab lev Abihu ta thu kaniw Sinai tazikramv khou bam khou kaney rui nthan makmei mai rui RINGHPOUC khang khaeng timei zaeng rui swluai kan the. Kaney nac maek khwan e, kumna Aron ringh saanv Eleazar lev Ithamar rui amuh sw khwan e.

⁵RINGHPOUC rui Mousi khou sa the,

⁶“Levimei kaikhwang ta phungc guangna amuh Aron tuang siamruaimei khang kaniw ta suamclou tho.

⁷Atuang kalummei pheykai khou taanc nimei taanv guay tei kaniw rui taanc nina e khatni amuh nunc lev meic nunc khang taanclou nimei taanv guay tei ni kaniw rui taanc nina e.

⁸Pheykai tuang na guay tei kaniw tuang thouc swna zauc nina e khatni Isaraelmei guay khang taanclou nimei thouc guay tei kaniw rui taanc nina e.

⁹Nang rui Isaraelmei maansei kaguayna khou rui Levimei khatni kakikta heizumei ta Aron lev kanac mpouh nunc tuang siamruai sw khang tii patpary nina e.

¹⁰Nang rui Aron khatni kanac mpouh nunc ta tei amuh tuang taanv taanh khang kadahlou nina e; meic baihmei rui nthanmei bamv khou guang ana pw e thei kamei ta swluai nina e.”

¹¹RINGHPOUC rui Mousi khou sa the,

¹²Zauclo Isaraelmei maansei guay khou rui nareimei ta akhang reicpatloumei phaan tei Levimei ta reicpatlou dat the. Levimei hei atuang e.

¹³Nareimei guay tei atuang e. Ai rui Izipmei nareimei guay ta swluaimei ganv khou tei Isaraelmei tuang maansei ni khouringh ni nareimei guay ta atuang swna reicpatlou khwan e. Ai hei RINGHPOUC e.

¹⁴Sinai chyng tuang tazikramv khou bam khou tei RINGHPOUC Mousi khou sa the.

¹⁵Levimei nggaanvmei bw khat khatni akhat ruc mei guay puinac puinac mpouhlang mpouhlang swna zanh hy tho.

¹⁶Kumna Mousi rui hei tei taanc the.

¹⁷Levi tei kanac mpouh gaanv thumh Gershon, Kohat khatni Merari hei nunc hei nai khwan e.

¹⁸Gershon tuang kaikhwang zanc phunghmei kanah nunc kiu Libni khatni Shimei e.

¹⁹Kohat nac nunc kaikhwang zanc phunghmei ruina Amram, Izhar, Hebron khatni Uzziel e.

²⁰Merari nac nunc kaikhwang zanc phunghmei ruina Mahli khatni Mushi e. Mi guay hei Levi tuang mpouhlang zanc nunc the.

²¹Gershon puinac khou mpouhlang kanei Libni lev Shimei nai e.

²²Mi puinacmei bw akhat suangc gaanvthaihmei zanc hyloumei nggaanvmei sing rui 7,500 e.

²³Mi puinac hei pheykai tuang kaithei biak neihkey biak thangc zypuikai sw nina e.

²⁴Lael nac mpouh Eliasap hei mi puinac tuang kapy the.

²⁵Kaniw tuang thouc khang tiiloumei thu: pheykai, kalungcmei gwm, kapaengcmei kainam, kaimun tuang kaikhamvphey,

²⁶pheykai tuang raengv phey, karaengv tuang kaimunphey hei khou taanc nimei thouc naimei kaguayna tei kaniw rui taanh khang e.

²⁷Kohat puinac khou Amram, Izhar, Hebron, khatni Uzziel mpouhlang nai e.

²⁸Mi puinacmei bw akhat ruc mei zanh hymei nggaanvmei kaguayna meic 8,600 e.

²⁹Mi puinacmei hei pheykai tuang dihba biak thangc zypuikai sw the.

³⁰Uzziel nac mpouh Elizaphan rui kaniw tuang kapy sw the.

³¹Kaniw tuang thouc khang tiiloumei kiu thu: Latdyng Khuk, ntyanpaeng, Nthanmei Bamv khou amuh nunc rui sinswmei kuak guay, thauhmai tiangc, ravchapaeng Nthan Liangmei bamv daengcthingloumei khamthinghphey hei guay khou taanc nimei thouc naimei kaguayna tei kaniw tuang thouc the.

³²Levimei nunc tuang kapy hei amuh Aron nac mpouh Eleazar e. Kamei hei Nthanmei Bamv khou taanvswmei nunc ta zauhmeipu e.

³³Merari puinacmei khou mpouhlang kanei Mahli khatni Mushi nai e.

³⁴Mi puinacmei bw akhat ruc mei nggaanvmei zanh hyloumei meicsing hei 6,200 e.

³⁵Mi puinacmei hei pheykai tuang dihpy biak tei kaniw tuang zypuikai sw nina e. Abihail nac mpouh Zuriel rui mi puinac tuang kapy the.

³⁶Kaniw thouc sw khang tiiloumei kiu thu: kalummei pheykai tiangc, kaluang, katiangc, kabam, khatni mi khou tei duancloumei na guay hei the. Mi na guay khou sw nimei taanv guay tei kaniw thouc the.

³⁷Kairaengv tuang tiangc, kabam, muytiangc khatni riang guay tei ni kaniw tuang thouc the.

³⁸Mousi, Aron khatni kanac mpouh nunc tei pheykai kaihu, neihpat biak tei kaniw tuang zypuikai katingh nina e. Nthanmei Bamv khou Isaraelmei khang taanc nimei taanv guay tei kaniw tuang thouc the. Meic baihmei rui nthanmei bamv khou guang anapui mei ta swluai nina e.

³⁹RINGHPOUC tuang latdanv theilayna Mousi rui Levimei nggaanvmei bw akhat khou rui karuc ku kanmei guay ta zanh hyloumei meicsing hei 22,000 e.

⁴⁰RINGHPOUC rui Mousi khou sa the. Isaraelmei nareimei nggaanvmei guay bw khat khatni mi ruc kukanmei guay zanc hy thau o.

⁴¹Isaraelmei nareimei phaan Levimei ta akhang laalou o khatni Isaraelmei tuang puancreymei khouringh khounah phaan Levimei tuang puancreymei khouringh khounah tei laalou o. Ai hei RINGHPOUC e.

⁴²RINGHPOUC rui latdanv tiiloumei theilayna Mousi rui Isaraelmei nareimei guay zanc hy the.

⁴³Nareimei bw khat khatni mi ruc mei nggaanvmei kaguayna zanc hyloumei sing kiu 22,273 e.

⁴⁴RINGHPOUC rui Mousi khou sa the,

⁴⁵“Ntaw thu Isaraelmei mpouh nareimei phaan tei Levimei ta akhang katgutlou nina e, khatni Isaraelmei tuang khouringh puanc reymei phaan tei Levimei tuang khouringc tei katgutlou nina e.

⁴⁶Isaraelmei mpouh nareimei guay tei Levimei suangc 273 geic mbu the, hei zaeng rui mbumei mpouh guay tei nangniw rui thuak nina e.

⁴⁷Meic gaanv khat khang daandi paek panguh tiina thuak nina e.

⁴⁸Mi tuang syan hei Aron khatni kanac mpouh nunc khang tii nina e.”

⁴⁹Levimei nunc rui thuakpatloumei tangv meicsing mbumei manv tei Mousi rui laa the.

⁵⁰Isaraelmei nareimei nunc khou tei rui Ravkai tuang dath theilayna shekel 1365 laa the.

⁵¹RINGHPOUC rui dincloumei theilayna thuakmei manv tei Aron khatni kanac nunc khou tei tii kan the.