Read Rongmei Naga SINGCHAKH 30 Bible Online

SINGCHAKH 30 - Rongmei Naga bible

SINGCHAKH 30

¹Isaraelmei kaikhwang guay tuang kapy nunc khou Mousi rui kumna dinc the. Mi hei RINGHPOUC rui tiimei latdanv the.

²Thowkumhmei rui RINGHPOUC khang ramh akhat tii ni twna hamh e thei ramh akhat thiangc ni twna latdyng swlou e thei kamei katuang latdyng tei swbak dat nuh mak khe, kamei kum ni twna nrianhloumei tei taanc rap nina di the.

³Kapu kai khou bammei ntumei gaanv khat rui RINGHPOUC khang ramh akhat tii ni twna hamh e thei ramh akhat thiangc ni twna latdyng sw lou e thei

⁴kapu rui mi lam khou tei ramh lat sa mak ge thei thu kamei katuang latdyng tei taanc nina the.

⁵Kum e tiki kapu rui hei tei chu lana thingc e thei thu kamei hei tei taanh mak nuh de. Kapu rui nuh mak tina e twna RINGHPOUC rui kata kuaklou puni de.

⁶Tunac akhat rui kalung dinglouna pwni kakhanh makna pwni RINGHPOUC khou ramhkhat tii khang pwni ramhkhat thiangh khang pwni latdyng swlou e thei,

⁷hei tei kamei mic dat pwkhou kagaanv rui chu lana thingh mak ge thei thu hei tei kamei taanc nina e.

⁸Kagaanv rui nuh mak ge thei thu kamei hei tei taanc mak nuh de. RINGHPOUC rui kata kuaklou puni de.

⁹Amaypui khatni liuchy rui thu kamei rui swloumei latdyng guay tei kalaic nuh mak ge.

¹⁰Mihmeipui gaanv khat rui ramhkhat tii khang hamh e thei thiangh khang latdyng swlou e thei,

¹¹hei tei kagaanv rui thayna thingh mak ge thei kamei rui katuang latdyng tei taanc nina e.

¹²Kum e tiki kagaanv rui thingc e thei thu kamei mi latdyng tei kalaic nuh de. Hei tei kagaanv rui thingc tina e twmei zaeng rui RINGHPOUC rui kata kuaklou puni.

¹³Kamei rui swloumei latdyng tei kalaih khang khatni sw ntiplou khang kagaanv khou ngamv nai e.

¹⁴Tiki kagaanv rui mi lam tei chumei tangv neih khat lungc khou thinghmei tuang maek ge thei thu kamei rui katuang latdyng guay tei nthuihna taanc nina e. Kamei rui chumei nungc tei ramh lat sa mak ge thei thu nuh the twmei tuang di the.

¹⁵Tiki kamei rui katangv thangc mi latdyng tei kalaih khang sa e thei mi latdyng tei taanh makmei tuang khuay kagaanv ruc khou tei keylou puni.

¹⁶Mi hei kapu daeng khou lungc bammei mih makmei khatni mihmei ntumei rui latdyng sw khou tat nimei tuang RINGHPOUC rui Mousi khou tiiloumei riak guay the.