Read Rongmei Naga SINGCHAKH 31 Bible Online

SINGCHAKH 31 - Rongmei Naga bible

SINGCHAKH 31

²“Midianmei nunc ta tei kaniw rui Isaraelmei ta sina swloumei zaeng rui khwm laa o. Nang hei tei taanc tang pwkhou theic puni the.”

³Kumna Mousi rui meic nunc khou sa the, “Midianmei ta kaniw rui RINGHPOUC ta sina swmei zaeng rui dandi tii khang kaniw ruc khou rihkey puni the. Hei zaeng rui nangniw chamdaanv tho.

⁴Isaraelmei kaikhwang kathuic khou rui rihphyan ching khat ching khat tiipat nina e.”

⁵Kaikhwang kathuic khou rui meic ching khat ching khat tii guangna rihphyan 12,000 chamdaanv the.

⁶Mousi rui kaniw ta tei amuh Eleazar nac mpouh Phinehas rui kapy swna thouclou kan the. Phinehas rui Isaraelmei tuang nthanmei puat khatni bianggun tei sinna tat the.

⁷RINGHPOUC rui Mousi khou latdanv tiimei kumcna kaniw rui Midianmei ta adowna nggaanvmei guay ta dowluai ngam the.

⁸Midianmei guangc gaanv panguh: Evi, Rekem, Zur, Hur, khatni Reba kaniw ta swluai the. Beor nac mpouh Balaam ta ni swluai kazauh the.

⁹Isaraelmei rui Midianmei ntumei nunc khatni alauc nunc ta nym the, kaniw tuang khouringh khounah guay ta laa the, kaniw tuang syan lanv guay asut the, kumna

¹⁰kaniw tuang kaidai khatni zypui guay mai ntei the.

¹¹Kaniw rui maansei, khouringh khounah puatchei mpeyna laa the.

¹²Kumna Jeriko phaengc arwnmei Jordan duithuak daeng Moab tuang nzaengc khou zypui swna bammei bamv khou tei mi guay tei Mousi lev Eleazar khatni Isaraelmei guay khou phungc guang the.

¹³Mousi, Amuh Eleazar khatni Isaraelmei kapy nunc tei guang datmei rihmei nunc ta ariw khang zypui khou rui tat pat the.

¹⁴Rihbamv khou rui guang datmei meic 1000 tuang rihpy nunc khatni meic 100 tuang ricmei nunc ta tei Mousi kalungpuamc the.

¹⁵“Ntumei guay ta kiuc swluai makna loubam di tha? Twna kamei rui sa the.

¹⁶Mi ntumei nunc hei rui Balaam tuang lat piuna Peor khou Isaraelmei nunc ta RINGHPOUC khou rui zay mbianghlou kan tuang e, hei zaeng khou tei rui Isaraelmei ruc khou ravpyan tiguang kanmei tuang e twmei ningtow o.

¹⁷Nggaanvmei nac guay ta tei khatni nggaanvmei ta thay kanmei ntumei guay ta tei swluai o.

¹⁸Nggaanvmei ta thaylou makmei tunac guay ta tei nangniw khang lou tho.

¹⁹Ntaw thu mi swluai kanmei khatni theihmei pumc ta kahi kanmei nangniw kathuicna zaeng chanei zypui paengc thangc bam nina e. Zaeng neih thumh nungc khatni chaneimei nungc nangniw khatni nangniw rui nym guangmei nunc ta tei sw nthan nina e.

²⁰Nangniw tuang pheybaan, ramhgic rui khatni ramhhiw rui khatni thing rui kasiamhmei puat guay ni sw nthan nina e.”

²¹Rihbamv khou rui guang datmei nunc khou tei amuh Eleazar rui sa the, “RINGHPOUC rui Mousi khou tiiloumei latdanv kiu mi hei the.

²²Mai raw lak nimei kachaekc, daandi, tanzinc, tin khatni misi;

²³mai hamcna sw nthan nina e. Tiki hei tei sw nthanmei dui rui ni sw nthan nuh e. Kumlana mai rui raw nimei puat tei thu dui rui sw nthan nina e.

²⁴Zaeng chaneimei nungc nangniw tuang pheybaan sou dat nina e, kum e thei nangniw nthan dat the kumna zypui khou gut dat nuh the.”

²⁵RINGHPOUC rui Mousi khou sa the,

²⁶“Nang lev Amuh Eleazar khatni Isaraelmei kapy swmei guay rui nuam guangmei puat khatni nym guangmei maansei khatni khouringh khounah guay tei kasing chak nina e.

²⁷Mi guay tei kapaek kapaek rih tatmei nunc khang lev Isaraelmei guay khang nzanh nina e.

²⁸Rihmei nunc dam khou tei rui RINGHPOUC khang maansei pwni, guaih, kuanniam, lauziu, khatni ziuh pwni 500 pum akhat akhat tii nina e.

²⁹Kaniw tuang puat kapaek khou tei rui laa patna RINGHPOUC khang nkunmei puatkat swna amuh Eleazar khang tii nina e.

³⁰Baihmei Isaraelmei guay tuang dam khou tei rui maansei ni, guaih, kuanniam, lauziu, khatni ziuh ni 50 pum akhat akhat RINGHPOUC khang tii nina e. Hei tei RINGHPOUC tuang kalummei pheykai khou taanv swbammei Levimei guay khang tii nina e.”

³¹Mousi lev Amuh Eleazar rui RINGHPOUC rui latdanv tiimei kumcna hei tei nzanhlou the.

³²Rihbamv khou rui laaguangmei puat pang tei rihmei nunc khang tii tang pwkhou nai bam duhmei puat guay hei kaguayna lauziu 6,75000 e,

³³guaichic 72,000,

³⁴kuanniam 61,000 khatni

³⁵maansei nggaanvmei ta thaylou makmei ntumei 32,000 e.

³⁶Rihmei nunc tuang dam lauziu khatni ziuh kariuna kasing kaguayna 3,37,500 e,

³⁷RINGHPOUC khang lauziu lev ziuh kariuna 675 hei tii the.

³⁸Guaichic kasing 36,000 khou rui RINGHPOUC khang 72 tii the.

³⁹Kuanniam hei kasing 30,500 khou rui RINGHPOUC khang 60 tii the.

⁴⁰Maansei sing rui 16,000 khou rui RINGHPOUC khang meic 32 tii the.

⁴¹Kumna mi guay tei Mousi rui Amuh Eleazar khang tii the.

⁴²Mousi rui rihmei nunc tuang dam khou tei rui kapaek khat Isaraelmei nunc khang laa patlou the,

⁴³meic geihmei khang kapaek khat baicna laa patmei kiu lauziu lev ziuh hei 3,37,500 e,

⁴⁴guaichic 36,000,

⁴⁵kuanniam 30,500

⁴⁶khatni maansei 16,000 ge.

⁴⁷RINGHPOUC rui latdanv tiimei kumcna Mousi rui maansei ni khouringh khounah ni 50 khou akhat akhat laa lana Levimei RINGHPOUC tuang kalummei pheykai khou siamruai swmei nunc khang tiilou kan the.

⁴⁸Rihbamv khou nduangh tatmei 1000 tuang, 100 tuang kapy nunc tei rui Mousi khou guangna

⁴⁹sa the, “Aniw rui nduangh tatmei rihmei guay ta tei kathai the kumna meic gaanv khat na sini amaan mak khe.

⁵⁰Kumhpui zaeng rui kachaekc tuang karuhpwan guay, tadiu, ntah, baanrwn, tadip, khatni ntuh aniw meic kathuicna rui laaloumei kaguayna phungc guangmei tuang the. RINGHPOUC kamei rui gaeklou khang mi hei aniw ta thuakmanv swna RINGHPOUC khang tiimei tuang the.”

⁵¹Mousi lev Eleazar rui mi kachaekc guay tei ntuh-ntah swna laalou the.

⁵²Rihmei 1000 kang khatni 100 kang tuang rihpy guay khou rui laana Mousi lev Eleazar rui RINGHPOUC khang katloumei kachaekc tei Kilogram 200 dou e.

⁵³Rihphyan kapy hamhmei guay rui thu kamei kamei rui laaloumei guay tei kakhang kakhang lou the.

⁵⁴RINGHPOUC rui Isaraelmei ta gaeklou diu khang rui Mousi lev Eleazar rui mi kachaekc guay tei kalummei pheykai khou tei phungc guang the.