Read Rongmei Naga SINGCHAKH 32 Bible Online

SINGCHAKH 32 - Rongmei Naga bible

SINGCHAKH 32

¹Reuben khatni Gad kaikhwangmei tuang guaih mpeyna nai bam khwan e. Jazer lev Gilead ramv tei guaihbamv khang gay e twmei kaniw rui how lana

²kaniw Mousi, Amuh Eleazar khatni Isaraelmei kapy nunc khou guangna sa the,

³Atarot, Dibon, Jazer, Nimra, Heshbon, Eleale, Sebam, Nebo khatni Beon,

⁴“Mi ramv guay hei RINGHPOUC rui Isaraelmei guay hu khou ngamlou kan tu ham cho? Mi bamv hei guaihbamv khang gay e. Nang bangc aniw tuang guaih mpeyna nai e.

⁵Kumhpui zaeng rui mi ramv hei aniw khang tiilou o. Aniw ta Jordan duithuak kaanpatna lungh khang swlou ri tho.”

⁶Mousi rui Gadmei nunc khatni Reubenmei nunc khou tei daw the, “Isaraelmei nunc suc-rih swna bam khou nangniw khou hei dungcna bam nii dina cho?

⁷Nangniw tabui swna RINGHPOUC rui nangniw khang tiiloumei Jordan paengc thangc tei kaanpat mak khang meic nunc lung hei titangkhyn bam tu cho?

⁸Mi kandic tei zauh khang ai rui nangniw pupouc nunc ta Kades Barnea khou rui thouc patpui ganv khou kaniw rui heikumna meic nunc lung tei titangkhyn kanmei tuang the.

⁹Kaniw Eskol nzaengc ngangh tangcna ramv tei how pwkhou, RINGHPOUC rui kaniw khang tiiloumei ramv tei gut laa mak khang meic nunc lung tei sw tangkhyn kan the.

¹⁰Mi nungc tei RINGHPOUC rui kaniw ruc khou lungpuamcna kumna latdyng swna sa the:

¹¹‘Kaniw rui alat piu makmei zaeng rui, Izip khou rui kaanpatmei tingkwm 20 khou rui karuc ku kanmei guay tei ai rui kaniw khang tii ni twna Abraham, Isak, khatni Jakob khou nrianhloumei kandic khou tei kaniw gut ni tuang hamh the twna ai rui latdyng swmei tuang the.’

¹²RINGHPOUC lat piu chuyna bammei Jephunet nac mpouh Kaleb lev Nun nac mpouh Joshua na gut puni.

¹³RINGHPOUC rui kaniw ta lunghpuamcna kata tineihla makmei nunc tei theic ngam kan mak saanv mi kin ta tei tingkwm 40 tazikramv khou tiruanlou khwan e.

¹⁴Ntaw hei nangniw rui nangniw pu nunc phaan nsinna paapcmei meic kin thanh swna RINGHPOUC tuang lungpuam tei Isaraelmei ruc khou tikeylou puni the.

¹⁵Reubenmei khatni Gadmei nangniw rui ntaw RINGHPOUC thei lay nii timak ge thei kamei rui meic nunc ti hei mi tazikramv khou hei mpatlou puni the, kumna kaniw theic e thei hei tei nangniw zaeng rui e.”

¹⁶Kaniw rui Mousi daeng khou guangna sa the, “Reymei khou hei aniw tuang lauziu guay khang khou hei ntauh raengh raenglou khang khatni ntu-pangna guay khang kaidai raengh guay kasiamhlou khang nuhlou o.

¹⁷Kumlou kan e thei chana punav Isaraelmei guay ta kiuc rihbamv khou nduangh gutna kaniw khang tiiloumei bamv khou kiu nduangh tangclou ni de. Kumna tat kanmei ganv khou ntu-pangna guay ta tei mi kandic khou lungc bammei nunc rui sw kasic karouh mak khang raengh raengloumei kaidai guay lungc khou bam kan khang e.

¹⁸Aniw chana punav guay tei kakhang kakhang tiiloumei ramv khou lungc key kan mak saanv aniw kai hanc dat lak ge.

¹⁹Aniw rui mi dui paengc thangc tei kaniw rak khou aniw tuang ramv nai bam lak ge, kalam thu Jordan neihpat biak ramv hei aniw khang tiilou tang the.”

²⁰Mousi rui daw the, “Nangniw sa bammei hei kachangc changhna sa bam tuang e thei thu, rihbamv khou tat khang ntaw RINGHPOUC hu khou hei chamdaanv tho.

²¹Nangniw tuang rihphyan guay tei Jordan kaanpat nina the kumna RINGHPOUC tuang latdanv theilayna zauczihmei ta tei RINGHPOUC rui ngamlou mak saanv nangniw adow gut nina the,

²²kumna mi kandic tei nangniw rui laa nina the. Mi tangv tei nangniw hanc dat nuh the. Kalam thu RINGHPOUC khou khatni nangniw tuang chana punav nunc khou taanclou nimei thouc guay tei nangniw taanclou tang kan the. Kumlou kan e thei mi Jordan neihpat ramv hei nangniw tuang di the twmei RINGHPOUC rui nuhlou puni the.

²³Kum e tiki mitei nangniw rui tatkey mak ge thei thu, nangniw hei RINGHPOUC ruc khou nuh muna paapc taanc the. Kumna thaylo nangniw paap rui nangniw ta ndauh pat puni.

²⁴Kumhpui zaeng rui nangniw tuang kaidai guay ni kasiamh bam o, lauziu raengc ni raeng bam o, kum e tiki nangniw rui taanc ni twna nrianhloumei tei thu nangniw taanc nina de.”

²⁵Gadmei khatni Reubenmei nunc rui sa the, “Kaipoucle, nang tuang latdanv theilayna aniw taanc ni de.

²⁶Aniw nownac nunc, aniw tuang guaic khatni lauziu guay thu mi Gilead tuang kaidai guay khou hei bam duc kan di tho.

²⁷Kum e tiki aniw nggaanvmei guay thu RINGHPOUC tuang latdanv theilayna rihbamv khou gut ni the. Aniw rui daw kanmei kumcna Jordan kiu kaanpatna adow ni the.”

²⁸Kumna Mousi rui Eleazar, Joshua khatni Isaraelmei kaikhwang tuang kapy nunc khou tei sa the,

²⁹“RINGHPOUC tuang latdanv theilayna Gadmei khatni Reubenmei rui Jordan kaanpatna kaniw rui nkhavloumei paan rui mi kandic tei nangniw laa e thei, Gilead ramv hei kaniw khang tii nina e.

³⁰Kum e tiki kaniw rui nangniw ta Jordan paengc suanc pat mak ge thei thu, kaniw ni nangniw lev nchamcna mi Jordan paengc thangc tei kaniw ramv sw muay nina e.”

³¹Gadmei khatni Reubenmei rui daw the, “Kaipoucle, RINGHPOUC tuang latdanv aniw piuna taanc ni de.

³²Katuang latdanv theilayna aniw ni Kanaan kandic thangc kaanpatna rihbamv khou kiu tat ni de. Kumna Jordan neihpat biak ramv hei aniw tuang sw khang sw ni de.”

³³Kumna Amormei guangc Sihon khatni Bashanmei guangc Og tuang ramv khatni mi khou tei naimei kaidai namvdaih guay Mousi rui Gadmei, Reubenmei khatni Manasemei kapaek tuang ramv khang tii kan the.

³⁴Gadmei nunc rui Dibon, Atarot, Aroer,

³⁵Atrot Sophan, Jazer,Jogbeha,

³⁶Bethnimra khatni Beth-haran hei guay ta raengh raeng the kumlana khouringh khounah guay khang ni raeng the.

³⁷Reubenmei nunc rui Heshbon, Eleale, Kiriathaim,

³⁸Nebo, Baalmeon,(ramvzanc asaekc thu kalaic the ) khatni Sibma hei guay hei raengh raeng the khatni khouringh khounah guay khang ni raeng the.

³⁹Manase nac mpouh Makir puinacmei rui Gilead ramv khou rih keyna khou tei bammei Amormei nunc ta alay gancna mi ramv tei kaniw laa the.

⁴⁰Kumna Mousi rui Gilead tei Makir puinac mei khang tiina kaniw khou tei lungc the.

⁴¹Manase kaikhwangmei Jair rui namv asaekc ta adowna laa the mi guay zanc tei “Havvot Jair” twna phuaklou the.

⁴²Noba rui Kenat kaidai khatni mi tuang namv guay khou rih keyna laa the, kumna kamei rui hei tei kazanc khou Noba twna phuaklou the.