Read Rongmei Naga SINGCHAKH 35 Bible Online

SINGCHAKH 35 - Rongmei Naga bible

SINGCHAKH 35

¹Jeriko paengc thangc, Jordan paengc khou Moab tuang nzaengc khou RINGHPOUC rui Mousi khou sa the,

²“Isaraelmei tei kaniw khang tiiloumei ramv lungc khou rui kaidai asaekc khatni mi kaidai guay daeng khou naimei khouringh byn asaekc Levimei khang reicpat nina e twna Isaraelmei khou tei sa o.

³Mi kaidai guay tei Levimei khang e kumna kaniw mi khou tei lungc nina e. Khouringh byn guay tei kaniw tuang khouringc byn khang e.

⁴Kaniw tuang kaidai guay khou tei khouringh byn khang raengh khou rui chowbuk 1000 tuang ramv nai nkuay nina e.

⁵Kumna kanaek padeih chowbuk ching nei ching nei nai nkuaymei chung khou kaidai tei nai nina e.

⁶Levimei khang kaidai tiimei khou tei meicdow maanvloupui ganv khou paklouna duploumei bamv sw khang kaidai charuk kazauh nina e, mi ruc khou tei rui kaidai 42 tii haap nina e.

⁷Mi guay khou tei khouringh byn kazauh nina e. Kumna kaniw khang kaidai 48 tii nina e.

⁸Levimei khang ramv tii nimei hei ramv daihmei kaikhwang khou rui daicna khatni ramv nthyammei nunc tuang khou tei rui nthyamna laa patna tii nina e.”

⁹RINGHPOUC rui Mousi khou sa the,

¹⁰Isaraelmei nunc khou kumna sa o: nangniw rui Jordan kaanna Kanaan kandic gut pwkhou

¹¹thowkumhmei rui meic gaanv khat ta swluai swtiat maanvmei tuang nai e thei duploumei bamv khang duploumei tuang kaidai khang nangniw rui kadahlou nina e.

¹²Theihmeipu riangluaic rui khwm khangc nimei khou rui kamei khou tei dup duak khang e. Meicdowpui mei ta tei charuangc khou latzan sw makna swluai nuh mak ge.

¹³Paklouna duploumei kaidai khang kaidai charuk kadahlou nina e:

¹⁴Jordan neihpat thangc kathumh khatni Kanaan kandic khou kathumh twna kaidai charuk kadah nina e.

¹⁵Mi guay hei Isaraelmei dilungmei khatni kaniw pang khou khuam bammei zaatc baihmei guay rui ni duploupui bamv sw khang e. Thowkumhmei maanvna meic swluai swtiatmei tuang nai e thei mi khou tei duplou khang e.

¹⁶Thowkumhmei rui ntanh sinna meic gaanv khat ta swluai e thei kamei tei meicdowmei e; meicdowmei ta thu swluai dat nina e.

¹⁷Thowkumhmei rui ntauh sin lana meic gaanv khat ta swluai e thei kamei meicdowmei e; meicdowmei ta thu swluai dat nina e.

¹⁸Thowkumhmei rui thingdangv sinna meic gaanv khat ta swluai e thei kamei meicdowmei e; meicdowmei ta thu swluai dat nina e.

¹⁹Meicdowpui mei ta tei swluai datmei hei theihmeipu tuang riangluaic tuang thouc the. Kamei rui ariw e thei thu swluaimei tei kathouc the.

²⁰Meic gaanv khat rui gaanv khat ta karaengna thui bowna pwni, ramhkhat rui ndatna pwni,

²¹kabaanc duay rui diangcna pwni swluai e thei kamei tei meicdowmei de kumna kata tei swluai nina de. Khwm khanghmei tei ana liangmei riangluaic akhat rui khangc nina e. Kamei rui kata ariw e thei swluai rap nina di the.

²²“Thowkumhmei gaanv khat rui gaanv khat ta karaengmei tuang maekna, diangc bowna ni hamh, ramh akhat rui ndatna ni hamh, twna maanvna swluai the.

²³Hamh e thei kamei rui zauczih bam makmei gaanv khat ta ntauh rui ndat maanvna theic the.

²⁴Mi kumhmei tuang latbamv khou thu maanvmeipu ta tei kandihmei rui gulou nina e, khwm khangh khang sw bammeipu ta tei nkhavlou lak nina e.

²⁵Maanvmeipu ta tei kanlou khang meic geihna rui sw nina e, kumna kata tei kamei rui duploumei kaidai khou tei suanclou dat nina e. Mi ganv khou tingkuh sw bammeipu tei theih mak saanv kamei hei khou tei lungc bam nina e.

²⁶Mi maanvmeipu tei kamei duploumei kaidai khou tei rui kapaengc patna bam khou

²⁷theihmeipu riangluaic tei rui ariw nangcna mi pu ta tei swluai e thei, mi kumcna khwm khanghmei hei meicdowmei hamh e.

²⁸Meic swluaimeipu tei kamei duploumei kaidai khou tei mi ganv khou bammei Tingkuh tei theih mak saanv bam nina e, Tingkuh tei theic kan e thei kamei kakai hanc dat nuh the.

²⁹Mi riak hei nangniw kikta tabui bui bam khou bam pwni tat bam nina e.

³⁰“Meicdowpui mei ta tei sakhi kanei hamh e thei kathumh nai pwkhou rui swluai nina e, sakhi akhat na khou rui thu meicdowmei e twmei laa nuh mak ge.

³¹Meicdowpui mei ta tei swluai nina e. Kamei syan tiina duak nuh mak ge.

³²Duploumei kaidai khou pakloupui mei ta tei syan tiina Tingkuh tei theih mak khou kakai titat dat nuh mak ge.

³³Nangniw rui kumna sw e thei, nangniw lungc bammei kandic ti hei nangniw rui swtanac puni the. Meicdowmei rui kandih ta sw tanac e, meicdowpui mei ta tei swluai datmei hamhna mi kandic ta tei sw nthan datmei chaeng baihmei maek ge.

³⁴Nangniw rui lungc bammei kandic ta sw tanac riu, kalam thu ai hei RINGHPOUC e kumna ai Isaraelmei pang khou lungc bam e.”