Read Rongmei Naga SINGCHAKH 36 Bible Online

SINGCHAKH 36 - Rongmei Naga bible

SINGCHAKH 36

¹Josep nac pang khou rui Manase rui puanhmei Makir nac mpouh Gilead kaikhwangmei kapy nunc rui Mousi khatni Isarael tuang kapy nunc hu khou guang sa the.

²Kaniw rui sa the, “San zaucna Isaraelmei khang ramv tei nzanh o twna RINGHPOUC rui nangniw khou latdanv tiilou kan the. Aniw riangluaic mei Zelophehad tuang ramv tei kanac aluhpui nunc khang nzanhlou tio twna ni kamei rui nangniw khou latdanv tii kan the.

³Kum e tiki kaniw rui kaikhwang baihmei khou miclou e thei kaniw tuang ramv tei mi kaikhwang tuang tei sw kan puni the, kumna aniw tuang ramv hei nthyam key puni the.

⁴Jubili ganv guang pwkhou ramv guay tei kakaipouc khou hanclou datmei ganv khou Zelophehad nac aluhpui nunc tuang ramv tei kaniw rui micloumei kaikhwang khang tei tingsaeng khang hanclou kan ni the kumna aniw kaikhwang khang thu amaan the.”

⁵RINGHPOUC rui samei theilayna Isaraelmei guay khou Mousi rui sa the, “Manase kaikhwangmei rui samei hei nzih the,

⁶kumhpui zaeng rui Zelophehad nac aluhpui nunc hei kaniw rui miclou nii niimei khou miclou nuh e, kum e tiki kaniw kaikhwang lungc khou na miclou nina e.

⁷Isaraelmei kaikhwang guay tuang ramv tei kakaikhwang khwang khou kalaic makna nai bam nina e.

⁸Kapu kapouc ramv laamei Isaraelmei ntumei guay tei kakaikhwang khwang khou na miclou nina e. Heikumna Isaraelmei rui kapu kapouc ramv laamei riak hei tat nina e.

⁹Kaikhwang akhat tuang ramv tei kaikhwang akhat thangc phungc tat nuh mak ge. Kaikhwang kathuic tei katuang katuang tei kalaic makna bam nina e.”

¹⁰Zelophehad nac aluh nunc RINGHPOUC rui Mousi khou latdanv tiimei kumcna taanc the.

¹¹Zelophehad nac aluh nunc Mahla, Tirza, Hokla, Milka khatni Nouha kapu chana nac nunc now sw the.

¹²Josep nac mpouh Manase tuang kaikhwang lungc khou naimei puinac pang khou na kaniw tei miclou the kumna kaniw tuang ramv tei kaniw kaikhwang tuang sw tanh tan guang the.

¹³Mi guay hei Jeriko khou rui Jordan paengc akhat thangc naimei Moab nzaengc khou RINGHPOUC rui Isaraelmei khang Mousi khou tii guangmei riak guay the.