Read Rongmei Naga SINGCHAKH 4 Bible Online

SINGCHAKH 4 - Rongmei Naga bible

SINGCHAKH 4

¹RINGHPOUC rui Mousi khatni Aron khou kumna sa the;

²Levimei phwam khou rui Kohatmei langv baicna puinac khatni mpouhlang tuang swna hy thau tho.

³Tingkwm 30 khou rui 50 kak khoumei nggaanvmei guayna ta RINGHPOUC tuang pheykai khou siamruai sw khang hy o.

⁴Kaniw tuang taanv tei Nthan Liangmei bamv khou taanc nimei tuang taanv the.

⁵RINGHPOUC rui kabangc khoumei lat guay hei ni dinclou the. Zypui kalaic nipui ganv khou, Aron khatni kanac mpouh nunc tei kalummei pheykai lungc khou tei gutna Latdyng Khuk hu khou thaengcloumei khamthinghphey tei laa keyna mi phey tei rui mi khuk tei gumbin nina e.

⁶Kaniw rui mi ruc khou tei ramhgic gaymei rui gumbinlou nina e. Mi ruc khou tei nrymmei phey gumlou nina e. Kumlana puanc nimei phuang kanei tei kanu khou tei karilou nina e.

⁷RINGHPOUC khang ntyan kat nimei tuang paeng khou tei phey nrymmei rui gumlouna mi ruc khou tei ramh kuak guay, agaw kuak guay, puatkat kuak guay, khatni drakhadui kat nimei tuang muanh tei lou nina e. Mi paeng ruc khou tei ntyan nai tanh tan bam nina e.

⁸Kaniw rui mi ruc khou tei phey haenghmei gumlou nina e, mi tangv gaymei ramhgic tuang gwm rui gumlou nina e, kumlana puanc nimei phuang kanei tei kanu khou tei karilou nina e.

⁹Kaniw rui thauhmai hyang tei, thauhmai, tiangkap, puanh kuak, khatni thauhhaan hei guayna ti hei phey nrymmei rui gumbin nina e.

¹⁰Kaniw rui thauhmai hyang khatni mi tuang na guay ti hei gaymei ramhgic rui duamna puanc nimei taulai khou tei mbaenglou nina e.

¹¹Mi tangv kaniw rui kachaekc tuang ravchapaeng ruc khou tei phey nrymmei rui gumlouna puanc nimei tuang phuang tei kanu khou tei karilou nina e.

¹²Nthanmei Bamv khou sinswmei tuang kuak guay tei kaniw rui laa lana mi guay ta tei nrymmei rui duamlou nina e. Kumlana gaymei ramhgic rui hei tei duamlou nina e. Hei tei ni puanc nimei tuang taulai khou mbaenglou nina e.

¹³Kaniw rui ravchapaeng mbut tei laa ganc lana ravchapaeng ruc khou tei haengcnrymmei phey rui gumlou nina e.

¹⁴Ravchapaeng khou sinswmei na guay: maikuak, rwang, suakkuak, zeisiankuak hei guay hei mi ruc khou tei mbaenglou nina e.

¹⁵Zypui kalaic nimei ganv khou Aron khatni kanac mpouh guay rui nthanmei tuang puat guay tei duamlou ngam pwkhou rui Kohat puinac nunc rui guangna mi guay tei puanc nina e. Kohat puinac mei nunc tei nthanmei puatc tei kahi nuh mak ge; kahilou e thei kaniw theic puni. Kalummei pheykai tei kalaihpui ganv khou Kohat puinac mei rui taanc nimei thouc guay kiu mi hei the.

¹⁶Aron nac mpouh amuh Eleazar rui pheykai, mai thauc, agaw, taektw puatkat, teymei thauc, khatni RINGHPOUC khang katgutlou kanmei pheykai khou naimei katana tei kathouc sw nina e.

¹⁷RINGHPOUC rui Mousi lev Aron khou sa the,

¹⁸Levimei phwam khou rui Kohatmei puinac mei nunc mut kan mak khang sw nina e.

¹⁹Kohatmei nunc nthan liangmei bamv khou gut bam sini theih mak khang Aron khatni kanac nunc rui gutna Kohatmei kathuic khou sw nimei thiak dinclou nina e.

²⁰Tiki Kohatmei nunc rui gutna nthanmei puat nunc ta zauc nuh mak ge, zauc e thei theic puni.

²¹RINGHPOUC rui Mousi khou sa the;

²²Levimei Gershomei nunc ta ni puinac puinac mpouhlang mpouhlang swna meicsing hy o.

²³RINGHPOUC tuang pheykai taanv taanc nuhmei tingkwm 30 khou rui 50 kak khoumei nggaanvmei guay ta zanh hy thau nina e.

²⁴Kaniw tuang thouc thu kabangc khoumei puat guay hei puanhmei e:

²⁵pheykai, mi tuang kalungcmei phey, kapaengcmei gwm, karuc khou gumbinloumei tuang gaymei ramhgic, kaimunphey,

²⁶pheykai raengvphey lev kariang guay, kairaenghmun phey, khatni mi guay hei katinghloumei tuang na guay hei e. Mi puat guay khou hei taanclou nimei tuang thouc naimei guay tei kaniw rui taanh khang e.

²⁷Gershonmei nunc rui phunghmei puni hamh e thei baihmei taanv pwni taanhmei guay tei Aron khatni kanac nunc rui dincloumei khou tei taanc nina e. Puatc phungc nimei mung guay kaniw dam sw khang katiulou nina e.

²⁸Gershon puinac mei rui kalummei pheykai khou taanc nimei thouc guay kiu mi hei the. Amuh Aron nac mpouh Ithamar rui kaniw ta dinc nina e.

²⁹Merarimei nunc ta tei puinac puinac mpouhlang mpouhlang swna meicsing hy o twna sa the.

³⁰RINGHPOUC tuang pheykai taanv taanc nuhmei tingkwm 30 khou rui 50 kak khoumei guayna sing hy o.

³¹Kaniw tuang thouc swna puanc nimei kiu thu: Katiangc, kaphuang, kalang, katiangc bam,

³²kairaengv tuang ntiangh, ntiangh bam, muihtiangc, kariang, khatni hei tei suamcthau nimei na guay hei the. Meic kathuicna puat langv akhat akhat puanc khang e.

³³Merari puinacmei rui pheykai khou taanc nimei tuang thouc kiu mi hei the. Amuh Aron nac mpouh Ithamar rui dincloumei theilayna kaniw taanh khang e.

³⁴Kumna Mousi, Aron khatni Isaraelmei kapy nunc rui Kohatmei nunc ta puinac puinac mpouhlang mpouhlang swna meicsing hy thau khwan e.

³⁵RINGHPOUC tuang pheykai khou taanvtaanc biuhmei tingkwm 30 khou rui 50 kak khoumei guay ta zanh hylou the.

³⁶Kaniw rui puinac puinac swna zanh hyloumei sing hei 2,750 khwan e.

³⁷Mi hei RINGHPOUC rui Mousi khou latdanv tiilouna pheykai khou siamruai sw bammei Kohatmei nunc ta puinac puinac theilayna Mousi lev Aron rui meicsing hyloumei e.

³⁸Gershonmei nunc ta tei puinac puinac mpouhlang mpouhlang swna hyloumei kiu

³⁹RINGHPOUC tuang pheykai taanv taanc biuhmei tingkwm 30 khou rui 50 kak khoumei ta e.

⁴⁰Kaniw rui puinac puinac mpouhlang mpouhlang swna hyloumei sing hei 2,630 e.

⁴¹Mi hei RINGHPOUC tuang latdanv theilayna pheykai khou siamruai sw bammei Gershonmei nunc ta puinac puinac swna Mousi lev Aron rui meicsing hyloumei e.

⁴²Merari nac mpouh nunc tuang kaikhunc sing puinac puinac khatni mpouhlang mpouhlang tuang kaikhunc guay

⁴³tingkwm 30 lev 50 kak khoumei kalummei pheykai khou siamruai sw nuhmei

⁴⁴kaikhunc sing chak pwkhou 3,200 e.

⁴⁵Mi guay hei RINGHPOUC latdanv theilayna Mousi lev Aron rui chakloumei Merari nac mpouh nunc tuang kaikhunc pang e.

⁴⁶Mousi lev Aron khatni Isaraelmei kapy swmei guay rui Levimei kaikhunc khatni kaniw pupouc tuang kaising chaklou e,

⁴⁷tingkwm 30 lev 50 kak khoumei kalummei pheykai tuang siamruai taanv taancna karith phungc ngammei

⁴⁸kaniw rui chakpatloumei sing kiu 8,580 khwan e.

⁴⁹RINGHPOUC rui Mousi khou latdanv tiimei theilayna meic kathuicna zanc hy the; khatni Mousi khou tii guangmei RINGHPOUC tuang latdanv theilayna meic kathuicna khou siamruai taanv khatni phungc puanhmei taanv tiilou the.