Read Rongmei Naga SINGCHAKH 8 Bible Online

SINGCHAKH 8 - Rongmei Naga bible

SINGCHAKH 8

¹RINGHPOUC rui Mousi khou sa the,

²“Aron kamei rui thauhmai chanei tei kahyang khou tei loupui ganv khou kariw tei hu biak thangc gaanc pat khang swna lou o twna kakhou sa tio.”

³RINGHPOUC rui Mousi khou latdanv tiiloumei kumcna Aron rui hei tei piuna thauhmai guay tei thauhmai hyang biak tei karih louna lou the.

⁴Thauhmai hyang tei katwan khou rui kabam nganv dymei kachaekc rui Mousi khou lyanloumei lwn kahak kumcna kasiamh the.

⁵RINGHPOUC rui Mousi khou sa the,

⁶“Levimei ta Isaraelmei pang khou rui reic patna kaniw ta sw nthan o.

⁷Sw nthan nimei kiu heikumna sw nina e: Kaniw khou sw nthanmei tuang dui kazinhlou tho kumna kaniw pumc kapwm tei guat lana kaniw tuang pheybaan sou nthan khang sa tho. Kum kan e thei kaniw tei nthan puni the.

⁸Kum kan e thei guaituamchic launa khatni mi khou tei gut nimei Olive thauc loumei ntyan buay lev twna kaniw rui phungc guang nina e. Paapc khang khaeng khang ni guaituamchic akhat laaguang nina e.

⁹Mi tangv tei Isaraelmei guayna ta kaw guang kaduaina Levimei guay ta pheykai kaimav khou tei ahu khou tidinglou nina e.

¹⁰Isaraelmei guay rui Levimei guay py khou kaniw baanc mbaenglou nina e.

¹¹Kumna kaniw rui ataanv taanh khang Aron rui kaniw ta tei Isaraelmei tuang kaipat swna akhou katgutlou nina e.

¹²Paapc khang khaeng nimei khatni rawna khaeng nimei guaituamchic kanei ruc khou tei Levimei nunc rui kaniw baanc mbaenglou nina e. Heikumna Levimei ta sw nthanmei tuang taanv tei taanc nina e.

¹³“Levimei nunc ta tei nkunmei puatkat swna akhang katgutlou nina e, kumna Aron khatni kanac mpouh nunc ta kaniw ta zauhmei khang lou nina e.

¹⁴Levimei nunc tei atuang sw diu khang heikumna kaniw ta Isaraelmei pang khou rui reic pat nina e.

¹⁵Levimei nunc tei kaniw ta nang rui sw nthanna katgutlou tang kan e thei kaniw tei kalummei pheykai khou tei taanvtaanc nuh the.

¹⁶Isaraelmei nac mpouh nareimei guay phaan tei ai rui kaniw ta laamei tuang the, kumna kaniw hei atuang e.

¹⁷Ai rui Izipmei nareimei guay ta swluaimei ganv khou tei Isaraelmei mpouh nareimei guay khatni kaniw tuang puanc reymei khouringh guay ta atuang swna reic patloumei tuang the.

¹⁸Ntaw thu Isaraelmei mpouh nareimei phaan tei Levimei ta laa datmei tuang the.

¹⁹Isaraelmei nunc khang kalummei pheykai khou taanvtaanh khang ai rui Levimei ta Isaraelmei tuang puatkat swna Aron khatni kanac mpouh nunc khou tiilou kan the. Mi hei Isaraelmei rui Nthanmei bamv khou guang dingpui zaeng rui ryanramei guanglou nimei tei keylou mak khang e.”

²⁰Kumna RINGHPOUC rui Mousi khou latdanv tiimei theilayna Mousi, Aron khatni Isaraelmei guay rui Levimei nunc ta katgutlou the.

²¹Levimei nunc tei pumh nthan lana kaniw tuang pheybaan sou the, kumna Aron rui kaniw ta nkunmei kaipat swna RINGHPOUC khou katgutlou the. Kariak theilayna sw nthanmei tuang taanv tei ni kamei rui kaniw khou taanclou kan the.

²²Levimei lam khou RINGHPOUC rui Mousi khou latdanv tiimei guay tei meic nunc rui taanc nthuihlou the. Kumna Levimei guay tei Aron khatni kanac mpouh nunc bangc khou taanv sw nuh the.

²³RINGHPOUC rui Mousi khou sa the,

²⁴“Levimei guay tei tingkwm 25 tangc e thei atuang kalummei pheykai khou kathouc taanc nuh the

²⁵kumna tingkwm 50 tangc e thei kataanv nthaekc nina the.

²⁶Mi tangv tei kamei tei Levimei pheykai khou taanvtaanhmei nunc ta tei nkhav bam nuh e, kum e tiki karana thu taanc nuh mak khe. Mi hei nang rui Levimei nunc ta taanv titaanc nimei thiak the.”