Read Rongmei Naga SINGCHAKH 9 Bible Online

SINGCHAKH 9 - Rongmei Naga bible

SINGCHAKH 9

¹Isaraelmei Izip khou rui tatpatmei tangv kaneimei kwm reymei bw khou Sinai tuang tazikramv khou RINGHPOUC rui Mousi khou kachuclou khwan the RINGHPOUC rui sa the,

²Isaraelmei guay rui katuang nthuihmei ganv khou kaanpatmei ngai ngay kan diu.

³“Mi bw tuang zaeng 14 puinungc, neihkey rap khou rui thauna Isaraelmei guayna kaanpatmei ngai, taanc nimei thiak riak guay tei taanc nthuihna ngaek nina e.”

⁴Kumna Mousi rui meic nunc khou tei Kaanpatpui Ngai ngay khang sa the,

⁵kumna reymei bw tuang zaeng 14 nungc tingzyn mi ngai tei kaniw Sinai tuang tazikramv khou ngay the. Meic nunc tei rui ramh kaguayna Mousi khou RINGHPOUC rui latdanv swna tiimei tei nthuihna taanc the.

⁶Kum e tiki kaniw khou theihmei ta kahilouna nthan makmei meic gaanvsaekc naina kaniw thu mi nungc tei Kaanpatmei Ngai tei ngay ngam kan mak khe. Kaniw tei rui Mousi lev Aron daeng khou guangna

⁷sa the, “Theihmei ta kahilouna aniw hei nthan mak khe, tiki tabui swna aniw ni Isaraelmei lev twna RINGHPOUC tuang puatkat kat makna bam nina cho?”

⁸“RINGHPOUC rui nangniw lam latdanv akhou sa guangdat mak saanv nkhwan o.” twna Mousi rui daw the.

⁹RINGHPOUC rui Mousi khou sa the,

¹⁰Kumna Isaraelmei guay khou sa o: “Nangniw khatni nangniw kikta guay kaanpatmei ngai nungc theihmei ta kahilouna nthan makna bam nangcna hamh e thei ruan ducna nggin tat bam nangcna ngay tei thu ngaek nii e tw e thei

¹¹kumhmei nunc tei bw akhat kasuanh patna kaneimei bw tuang 14 nungc ngay nuh e. Hei tei khay loumakmei ntyan khatni nkhucmei nuy tuna ngay nina e.

¹²Mi ngai tuang khouringh rou tei akhat na sini swbau nuh mak ge, kazanc tei ni tu ngam makna nthuanh khang daeklou nuh mak ge. Kaanpatpui Ngai tei kariak tei suicna ngay nina e.

¹³Kum e tiki thowkumhmei kapumc nthan makmei ni hamh nggin tatna ni hamh twna mi ngai tei ngay makpui mei ta tei thu amei pang khou rui alay ganc puni, kalam thu kamei tei kakloumei ganv lungc khou akhang puatkat kat mak khe. Kamei kapaap tuang dandi mphang nina e.

¹⁴“Nangniw pang khou lungc bammei gin nunc rui Kaanpatpui Ngai tei ngay nii e thei, mi tuang thiak-riak guay tei ngaekna ngay kan diu. Dilungmei pwni zaatc baihmei pwni kariak akhat na tei tat nina e.”

¹⁵RINGHPOUC tuang kalummei pheykai kasiamhloupui nungc tei, muangh keyna mi ta tei gumbin the, mi muangc tei tingzyn khou rui tinggaanc pat datmei lauthwan nganv gumbin e kumna mi ta kiuc mai kumcna how e.

¹⁶Hei tei kalaanv pum muangh rui gum e khatni zinghmei ganv khou mai swna how e. Heikumna tatkey bam khwan e.

¹⁷Muangh tei ku dat kan e thei, Isaraelmei nunc tei kaniw tuang zypuikai ra lana muangh tei keylou datmei bamv khou tei kasiamh thau dat the.

¹⁸Meic nunc tei RINGHPOUC tuang latdanv theilayna zypuikai rakey the, khatni kalatdanv theilayna kasiamh thau dat the. Muangh tei rui pheykai khou tei bam saanv kaniw mi zypui khou tei bam the.

¹⁹Muangh tei kalummei pheykai khou tei bam saengcna bampui kaanc khou, kaniw RINGHPOUC lat piuna kalaic dat mak ge.

²⁰Kabamv asaekc khou thu muangh tei mi kalummei pheykai ruc khou tei zaeng ramhbiuc dou na bamlou e; tabui bui pwni kaniw zypui kalaihmei hei RINGHPOUC tuang latdanv theilayna kalaihmei tuang e.

²¹Kabamv asaekc khou thu muangh tei tingzyn khou rui lauthwan nganvmei na bamlou the, kumna muangh tei ku dat kanpui lev kaniw tat thau dat the. Zingbangc pw kalaanv pw muangh tei rui ku kan e thei kaniw tat thau dat the.

²²Zaeng ruh pwni, bw khat pwni, tingkwm akhat pwni, tingsaeng pwni, muangh tei rui pheykai khou tei bam saanv, kaniw tat dat mak khe; tiki hei tei ku dat kan pwkhou kaniw tat thau dat the.

²³Kaniw zypuikai kasiamh thaumei khatni rakey datmei hei RINGHPOUC rui Mousi khou latdanv tiimei tei piuna taanc the.