Read Rongmei Naga MAIKA 1 Bible Online

MAIKA 1 - Rongmei Naga bible

MAIKA 1

¹Jotham, Ahaz, khatni Hezekia rui Judamei guangc swna bammei douc, Moreshet kaidai khou bammei Maika khou RINGHPOUC rui mi lat hei tiguang khwan e. RINGHPOUC rui mi guay hei Maika khou Samaria lev Jerusalem lam khou ndauhloumei tuang e.

²Mi hei nking o, zaatc guaynale; mi hei chu lo, kandih nam ruc khou lungc bammei maansei katana! Kauh Liangmei RINGHPOUC rui nangniw khuay kalauh puni the. Nking o! Katuang tingkauh ravkai khou rui kamei sa pat puni the.

³RINGHPOUC kamei katuang nthanmei bamv khou rui pat pw the; kamei keyna luanghbut guay twan ruc khou tat puni the.

⁴Khou kiu luanghbut guay tei khuailiu nungh kumc nungc puni the; luanghkauh thangc rui dui luangc key kumc hei tei nzaengc baek khou luangc key puni the.

⁵Isaraelmei rui paapc taancna liammei zaeng rui mi guay hei pat puni the. Isaraelmei rui lat liammei hei thow zaeng rui cho? Kaniw kaidai Samaria rui the! Juda khou ravmaengc kalum bammei hei thow khuay cho? Jerusalem khuay e!

⁶Kumhpui zaeng rui RINGHPOUC rui sa e, “Ai rui Samaria ta meic lungc taekna gancloumei bamv, drakha linghpui bamv tiswlou puni. Mi kaidai tuang rakeyloumei ntauh raan guay tei nzaengc baek thangc bun keylou puni, kumna mi kaidai tei laa nkyduaklou puni.

⁷Mi tuang kunghmei ravmaengc guay tei diangcpuat paruatlou puni, ravkai tuang mangcsangmeiluc nunc khou tiiloumei puat guay tei mai rui swmaan puni, kumna mi tuang ravmaengc guay tei kakhuan swna ganclou puni. Samaria rui mi guay hei kingckiucmei rav khou thouh swmei khou piu khang nthah boulahmei tuang manv khou rui khuamloumei tuang puat pang e, ntaw thu mi guay tei kabamv baih thangc kalum tat khang kata zauczihmei nunc rui phungc tat kan puni the.”

⁸Khoutei Maika rui sa the, “Hei zaeng rui ai huayna latlu ni the. Alung kabiumei lyanna ai pumtang aphay nsyn rui ruan ni the. Ai asacsi muh kumc kap ni the khatni ostrich kumc huay ni the.

⁹Samariamei zam guay tigay dat ngam pu lak khe. Juda ni hei tei kumcna ryanramei ariw puni the; sw kamut kamaimei tei amei nunc lungc bammei kaidai Jerusalem kaidai raengckat guay khou guang tangc the.”

¹⁰Gat khou bammei aniw ta zauczihmei nunc khou tei aniw ta zaw tisiloumei chamv hei dinclou riu; nangniw kap bammei ta kaniw khou tihow riu. Beth Leaphramei nuncle, mbut ding khou niangcna nangniw lungh kabiumei lyan o!

¹¹Saphirmei nunc nangniw, pumtang zakna tatpat tho. Zaanan khou lungc bammei nunc kaniw tuang kaidai khou rui tat twan pat bauh mak khe. Bethezelmei nunc rui latluna kapmei nangniw chu pwkhou, hei khou tei duploupui bamv maek khe twmei nangniw thay puni the.

¹²Marotmei nunc duakpat khang lunghgeicna nkhwan bam e, kalam thu RINGHPOUC rui tiguangmei sw kamut kamai nimei Jerusalem raengckat daeng khou guang tangc the.

¹³Lakis khou lungc bammei nuncle, takuanh nunc khou tei gari goulou tho. Nangniw rui Isaraelmei paap lailuaih the kumna nangniw rui Jerusalem ta paapc tisw the.

¹⁴Ntaw thu Judamei nuncle, Moreshet Gat kaidai khou ntamvmei lat kadylou la tho. Akzip kaidai rui Isaraelmei guangh nunc ta nkhavlou dat pw lak khe.

¹⁵Mareshamei nuncle, RINGHPOUC rui nangniw ta nangniw kaidai laa khang guangmei zauczihmei nunc baanc khou tiilou puni the. Isaraelmei tuang katik kagunc daihmei kapy nunc tei Adullam khowlang khou nkamh puni the.

¹⁶Judamei nuncle, nangniw nzianmei alauc nunc khang rui huayna nangniw py guat tho. Nangniw py langdia py kumcna guat nkyduakh duaklou tho, kalam thu nangniw nac nunc ta tei nangniw pamv khou rui bangh khang zaytat kan puni the.