Read Rongmei Naga MAIKA 2 Bible Online

MAIKA 2 - Rongmei Naga bible

MAIKA 2

¹Simei taanh khang zip makna kakhanhna bammei nunc tei sansimei e dav! Tinggaanc pat pwkhou, kaniw khang kadow chamei ariwpui lev, kaniw kakhanh bammei simei taanv tei taanc the.

²Kaniw rui kahaw hawmei lauphung asut the; kaniw rui kahaw hawmei kai laa the. Meic gaanv khat na kai kaikhunc khatni puatc guay tei tinggiu makna bam khang maek khe.

³Kumna RINGHPOUC rui sa e, “Ai rui nangniw ruc khou sw kamut kamaimei tiguang puni the, nangniw mi khou tei rui duak dat ngam pw lak khe. Nangniw ryanra ryanriuna lungc puni the, kumna nangniw kauh rauh rauna tat bam dat ngam pw lak khe.

⁴Mi ganv kiu guang pwkhou, nangniw tuang pary hei meic nunc rui kamut kamaimei khou champanhmei pary sw puni the kumna kaniw rui nangniw ruc khou guangloumei ryanramei lam khou tei lu phuakna kumna suan puni the: Aniw ta ntoumutsutlou the! RINGHPOUC rui aniw tuang kandic laa tat kan the kumna hei tei aniw ta bangh zay tatmei nunc khang tiilou kan the.”

⁵Kumna RINGHPOUC rui kamei nunc khang ramh tii dat nimei ganv guang pwkhou nangniw dam nai pw lak khe.

⁶Meic nunc rui akhou sa e, “Aniw khou mi kumhmei lat hei dinc dat ri tho. Ravguangc rui aniw ta tizakclou ni tuang hamh e.

⁷Isaraelmei nunc hei siangloumei di the twna nang ningna cho? RINGHPOUC kalungpuamc the twna ningna cho? Kamei rui hei kumhmei hei swlou changh puni dina cho? Nchumhmei taanhmei nunc khou kamei nzianna salou tu hamhna cho?”

⁸RINGHPOUC rui daw the, “Nangniw rui amei nunc ta zauczihmei nunc ta kumc adow the. Rihbamv khou rui hanc guang datmei kumc, ramhping ramrouh tuang maekna tat bammei nunc tuang kamanv kunghmei pheybaan guay tei nangniw asut laa the.

⁹Nangniw rui maypui nunc ta kaniw rui nzianmei kai khou rui alaypat the, kumna kaniw nac nunc khou rui asuaihiam nangniw rui asut kan the.

¹⁰Thauna tat tho; mi bamv khou hei tinggiu makna bam dat bam khang maek khe. Nangniw tuang paap rui mi bamv ti hei sw kamut kamailou puni the.

¹¹“Mi mei nunc hei saraamhmei khatni meic guatmei lat rana sana ‘Drakhadui khatni zouh nangniw khang luangc guang puni the,’ twna sa tat bammei muhzwng nunc ta tei kahaw e.

¹²“Kum e tiki nsaekcloumei Isaraelmei nangniw ta ai rui khuam kaduai puni. Lauziu nunc ta kakuanc khou gaengcguang kaduai datmei kumcna ai rui nangniw ta khuam guang kariu dat puni. Khouringh byn puk tei lauziu rui padik bammei kumcna nangniw kandic hei meic rui padik dat puni e.”

¹³Ravguangc rui kaniw khang chaeng laanclouna meic bangc bamtatmei khou rui zaypat dat puni. Kaniw rui kaidai raengckat guay swbak pat lana nyng swna tatpat puni. Kaniw tuang guangc, RINGHPOUC kamei kahak rui kaniw ta nduangh pat puni.