Read Rongmei Naga MAIKA 3 Bible Online

MAIKA 3 - Rongmei Naga bible

MAIKA 3

¹Nking o, he Isaraelmei tuang dihsinpouc nunc! Nchumhmei taanh khang nangniw sw nimei tuang e,

²Tiki gaymei ta nangniw karaeng the kumna simei ta nzian the. Nangniw rui amei nunc ta nringh kagic tac the khatni kaniw rou khou rui kaniw zanctei thuaic the.

³Nangniw rui amei nunc ta tu the, nangniw rui kaniw gic kathangv pat the, kaniw rou siauc bak the, kaniw ta gandim kumc dimpuat paruatlou the.

⁴Nangniw rui RINGHPOUC khou nkhavlou khang kauc nipui ganv guang pw the, kum e tiki kamei rui nangniw tuang ravsuai dawlou lak ge. Kalam thu nangniw rui simei taanv guay hei taanhpui zaeng rui e. Nangniw khou rui kazaw nkamh kan ni the.

⁵Kaniw khang siandui tiimei nunc khang nchu-nzaenghmei lat salou ti makmei nunc khang suc-rih guang nimei lat rui kapinlou twna sa bammei muhzwng nunc rui amei nunc ta guat the. Hei kumhmei muhzwng nunc khou RINGHPOUC rui sa e,

⁶“Muhzwng nuncle, nangniw tuang tingmik luai changh luai puni the; nangniw khang neih key puni the. Nangniw rui amei nunc ta zaylaanhmei zaeng rui nangniw khang ndawman tiilou dat lak khe, kumna nangniw ramh akhat na sini dinckasuakc dat khang nai lak khe.”

⁷Guang nimei tuang dinckasuakc bammei nunc tei guangtangc timakna zak puni the. Kaniw guayna zak puni the kalam thu Ravguangc rui kaniw khou dawlou mak khe.

⁸Kum e tiki akhang thu, RINGHPOUC rui akhou kabumaengc khatni kangamv tipadiklou the, kumna akhou nchumhmei lungning khatni Isaraelmei khou kaniw tuang paap dinc ngam khang pumtan tiilou the.

⁹Ai rui samei hei nking o, he Isaraelmei dihsinpouc nunc nangniw, nzihmei ta karaengmei nchumhmei ta ti-nkhuailoumei nangniw.

¹⁰Nangniw rui Ravguangc tuang kaidai, Jerusalem ta meicbiw-meicdowmei khatni nzih makmei rui kaiphwn swna kasiamh thau the.

¹¹Mi kaidai tuang dihsinpouc nunc hei lanvbiwmei laa tuna taanv taanc the, amuh nunc rui kaphy khang rui latdanv tei hanc the, muhzwng nunc rui siandui khang rui dinckasuakc the, kum bam sini kaniw kathuicna Ravguangc rui kaniw ta nduanghlou bam e twna sa e. “Aniu khou ramh simei guang ni tuang hamh e, RINGHPOUC rui aniu ta nduanghlou bam de,” twna kaniw rui sa e.

¹²Kumna nangniw zaeng rui, Zaion ta lau suak kumc suak puni the, Jerusalem hei sw kasic karoucna ganclou puni the, kumna Ravkai luangcbut tei nwmbangc guanh puni the, kumna baapcraupung sw puni the.