Read Rongmei Naga MAIKA 5 Bible Online

MAIKA 5 - Rongmei Naga bible

MAIKA 5

¹He Jerusalemmei nunc, nangniw tuang ricmei guay khuam kariu tho! Aniu ta ding haengv the! Kaniw rui Isaraelmei tuang kaipouc ta adow bam the!

²RINGHPOUC rui sa e, “Bethlehem Ephratha, nang hei Juda khou nthyam liangmei kaidai akhat re, tiki nang khou rui ai rui Isaraelmei tuang kaipouc tiguang puni, kakai khwang tei rey nungc kin thangc rui suic guang tuang e.”

³Naruai bammeipui tei mpouh puanc pat mak saanv RINGHPOUC rui kamei nunc ta kaniw ta zauczihmei nunc baanc khou ganclou puni. Khou kiu ginramc thangc meic bangc bamtatmei kakandicmei nunc tei baihmei nunc tei lev guang kariu dat puni.

⁴Kamei guang pwkhou, kamei rui kamei nunc ta RINGHPOUC khou rui guangmei pumtan khatni RINGHPOUC Ravguangc tuang tikgunc kahak rui sin puni. Kamei nunc giuga makna bam puni kalam thu kandih namruc khou bammei maansei kaguayna rui katik kahym thay puni,

⁵khatni kamei rui nchu-nzaenghmei phungc guang puni. Asiriamei nunc rui aniu kandic khou rih keyna aniu tuang raengc guay sw bak gut pwkhou, kaniw ta adow khang lauziu gaenghpouc chanei khatni kapy gaanv tachat thoucpat puni.

⁶Buy-baeng sin swna kaniw rui Asiriamei ta ngam puni, Asiriamei nunc rui rih key pwkhou kaniw rui aniu ta kanlou puni.

⁷Isaraelmei theic nsaekcloumei nunc tei zaatc mpeyna khang RINGHPOUC rui tii guangmei tikaluanloumei zikdui, ramhbwan thaupat khou riu keyloumei tingdui kumc puni the. Kaniw tei maansei khou hamhna Ravguangc khou ngangvlou puni.

⁸Zaatc nunc ding khou ganclouduhmei nunc tei kamangliangpui rui ngouh khou hamh e thei khouringhbyn khou kataek phu bammei kumc puni the. Kamei rui lauziu pang khou gut the, nym the, kumna kaniw ta tei siat puat paruat ruatlou the, kanlou dat nimei maek khe.

⁹Isaraelmei nunc rui kata zauczihmei nunc ta ngam puni khatni kaniw guay ta swmutsutlou puni.

¹⁰RINGHPOUC rui sa e, “Mi ganv khou kiu ai rui nangniw tuang takuanh guay ta laa ganc kan puni khatni nangniw tuang takuanh gari guay ta sw kasic ngamlou puni.

¹¹Ai rui nangniw kandic tuang kaidai guay tei swmutlou puni khatni nangniw tuang rihgaekkai guay swpangvlou puni.

¹²Nangniw tuang duaih-raengh tuang guay swmaan ngam puni kumna ravtow amuc nai dat lak khe.

¹³Ai rui nangniw tuang ravmaengc nunc khatni ravmaengc tuang ntauhtiangc guay tei swmaan puni, nangniw rui kasiamhmei puat ta tei nangniw kalum bam dat lak khe.

¹⁴Nangniw kandic khou naimei Asherapui tuang maengc guay tei ai rui sw kasic puni kumna nangniw tuang kaidai guay tei swmutlou puni.

¹⁵Kumna lat piu makmei zaat guay ta alungpuam dai khou khwm khangc puni.”