Read Rongmei Naga NAHUM 1 Bible Online

NAHUM 1 - Rongmei Naga bible

NAHUM 1

¹Mi hei Elkosmei Nahum rui Nineve lam khou how kanmei ndawman tuang lat re.

²RINGHPOUC rui kata adapui mei gaanv khat na ta sini zauc bam ngam mak ge; kata akhangvpui mei ta kamei rui dandi tii e. Kalungpuam khou kaniw ta khwm khangclou e.

³RINGHPOUC thu lungpuamh nuangh mak ge, tiki kamei hei pumtan naimei e kumna khuay naipui mei ta dandi tii makna mpatlou mak ge. RINGHPOUC thei pwanzingh lay tat re; muangh hei kaphay rui tat katungh thaumei mbut re!

⁴Kamei rui duipui khou latdanv tii tina hei tei thip kan the! Kamei rui duithuak ta tithiplou the. Bashan tuang ramvpaek kangc the, Karmel Chyng kamv ngam the, khatni Lebanon tuang mwnpwang guay tuai ngam the.

⁵RINGHPOUC hu khou chyngbut guay kadunh the; kahu khou chyngbut guay nungc key the. RINGHPOUC pat pwkhou kandih kadunh the; kandih khatni kandihmei guay kadunh the.

⁶Kamei lungpuamc pwkhou, thow rui dingchaek ngam ni? Kareic patna lungpuamhmei tei thow rui akhangv ngam ni? Kalungpuam mai kumcna bunpat the; kahu khou khowtauh guay ni piakna mbut mbaih kan the.

⁷RINGHPOUC hei gay e; ryanramei ganv khou kamei rui kamei nunc ta gaeklou e; kakhou karih guangmei guay ta kamei rui kadanlou e.

⁸Luangc ranvna luangc guangmei duidai kumcna kamei rui kata zauczihmei nunc ta swmaanlou e; kata akhangvmei nunc ta kamei rui theihmei khou nthaulou e.

⁹RINGHPOUC ruc khou nangniw tabui tuang mbinhmei raeng raengc bam tu cho? Kamei rui nangniw ta swmaanlou puni. Meic gaanv khat na sini kata akhangv kaneilou khang maek ge.

¹⁰Sauhraengh bang kumc khatni napgou kumc, nangniw ta ntei puni!

¹¹He Nineve, simei raeng rui padikmeipu, RINGHPOUC ta sw kasic khang sw nimeipu gaanv khat nang khou rui guang e.

¹²RINGHPOUC rui kamei nunc Isaraelmei khou samei kiu mi hei e: “Asiriamei nunc tei tanc sini khatni kasing geic sini, kaniw ta tei swmutlou puni, kumna amaan kan puni. Amei nuncle, ai rui nangniw ta tiryanralou the, ai rui nangniw ta rai dat lak khe.

¹³Nangniw ruc khou Asiriamei ngamv nai bammei tei ntaw thu laa ganclou puni the khatni nangniw ta bangcloumei kangriang guay tei swtaplou puni the.”

¹⁴RINGHPOUC rui Asiriamei lam khou heikumna latdanv pat kan the: “Kaniw zanc tei phungc nsuk key khang kaniw kikta nai lak khe. Kaniw tuang ravkai guay khou nai bammei ravmaengc nunc tei ai rui swmaanlou puni the. Ai rui Asiriamei khang tarou kasiamhlou bam the kaniw hei ringc bam khang biuh mak khe!”

¹⁵Zauc lo, chyngbut thangc tei, latdiumeipu gaychamv phungcna guang pw the! Kamei rihngammei chamv kauc ndauh khang guangmei tuang e! Judamei nuncle, nangniw tuang khumngai guay tei ngay tho kumna nangniw rui kakhang tii ni twna nrianhloumei guay tei tii tho. Meicsimei nunc rui nangniw kandic khou rihkey dat pw lak khe. Kaniw ta swmaan mutsutlou kan the!