Read Rongmei Naga NAHUM 2 Bible Online

NAHUM 2 - Rongmei Naga bible

NAHUM 2

¹He Nineve, nang ti hei adow khang guang pw the! Nang ta swmutlou nimei ngamv guang pw the. Nang tuang rigaanvbamv guay khou maansei lou la tho! chaeng tei rigaanv la tho! Rih khang chamdaanv la tho!

²(Zauczihmei nunc rui rihkeyna laa kan makmei hu khou nai bammei Isaraelmei tuang tikgunc tei RINGHPOUC rui tiguanglou dat puni.)

³Zauczihmei tuang ricmei nunc tei nggih haenghmei phungc e khatni haenghmei pwan piu e. kaniw adow khang chamdaanv bam the! Kaniw tuang takuanh gari guay mai kumcna palik pat the! kaniw tuang takuanh nunc kapitc pat the!

⁴Takuanh gari guay mbamei kumcna chaengdai guay khou saeng pat the, kaidai tuang chaengdai guay khou saeng padik pat the. Kaniw tei mairam kumc palik pat the khatni tingpalikmei kumc kachan pat the.

⁵Meicdaihmei nunc ta kaw guang the; kaniw tei phay kalanvna pak guang the. Adow guangmei nunc tei raengh khou saeng guang the, rihmei nunc tei raengh khou pak guangna nggih rui kailaak sw ku the.

⁶Duithuak daeng khou naimei raenghmun guay ra pat the; guangh kai khou tei pingmei rui padik the.

⁷Liammav ta rihnym kan the; kabangcpui nunc akhouhna kumcna huay the khatni lungh kabiuna kaniw ngaengv hiw the.

⁸Zeih phak patmei kumcna meic nunc tei Nineve khou rui pak pat the. “Ding o! Ding o!” twna kauc the— tiki meic gaanv khat na sini karih guang dat mak khe.

⁹Daandi tei laa kan the! kachaekc tei laa kan the! Kaidai tei lanv rui padik the!

¹⁰Nineve hei swmutlou the, lungctaeklou the, ganc rimh rimlou the! Pingmei rui kaniw buh-baengh maek khe; kaniw khubut kadunh kalakh lak the, kaniw pumtan maek khe, kaniw zaw ndavdyan dian the.

¹¹Kamangliangpui kuanc kumc bammei kamang launa ta aluatc bammei bamv, kamangchic khatni kamangkui rui luan padikna kanac nunc kadan makna bammei kaidai tei tabui thangc tat kan thena cho?

¹²Kamangliangpui tei rui kataek khang swluaina kakui khatni kanac nunc khang thaek puat paruatlou the; kakuanc tei siat puatloumei zanc rui ganc padik the.

¹³Ngamparymei RINGHPOUC rui sa e, “Ai nang tuang zauczihmei e! Ai rui nang tuang takuanh gari guay tei mai ntei puni. Nang tuang ricmei nunc ta tei rih khou swluai puni, kumna nang rui meic baihmei khou rui laaguangmei guay tei ai rui laa ganc dat kan puni. Kandih nam ruc khou nang ngamv tei chu dat pw lak khe.”