Read Rongmei Naga NAHUM 3 Bible Online

NAHUM 3 - Rongmei Naga bible

NAHUM 3

¹Saraamhmei, meicbiw-meicdowmei kaidai hei amaan puni the, asut animna laa khang lanv padikna nai the!

²Nking o! takuanh kathamvmei khwan tei, gari haengv luanghmei khwan tei, takuanh pang pakmei khwan tei, takuanh gari guay pak kanukcmei khwan tei!

³Takuanh ricmei nunc adow gut the, baengsaeng guay palikh palik the, buy guay karang the! Phouh khuan nsuang the, phouh hei kasing thay mak khe— meic nunc rui mi ta tei niibin gut the!

⁴Nineve mangcsangmeiluc ta dandi tii the. Kamei hei howgay e theic nuhmei duaih-raengh rui padik ge. Kamei rui zaatc nunc ta nthiam patna bangh tisw the.

⁵Ngamparymei RINGHPOUC rui sa e, “He Nineve, ai rui nang ta dandi tii puni the! Ai rui nang pheybaan kathangv paliuc duaklou puni the, kumna zaatc guay ta nang ta tizauc puni the, nang zakmei lwn tei tizauc puni the.

⁶Ai rui nang ta karaengna sw puni the kumna nang ta tanacmei rui gumbinlou puni the. Meic nunc rui nang ta chanyna zauc puni the.

⁷Nang ta howmei guay rui tangsyn kan puni the. Kaniw rui sa puni e, ‘Nineve hei sw kasic karoucna ganclou bam bu the! Thow rui kata lunghsuhlou nimei naina cho? Thow rui kata swmlou nimei naina cho?’ ”

⁸He Nineve nang hei Izip tuang kaidai Thebes suangc gay mbumei tuang naina cho? Kata ni dui ruina raengh kumcna raenglouna gaek bam khwan e.

⁹Kamei rui Sudan khatni Izip ta sin bam khwan e, kangamv tei kanganv maek khwan e; Libia ta kagiang sw khwan e.

¹⁰Tiki Thebesmei nunc ta bangh nym kan the, chaengkwn kathuic khou kaniw nac nunc ta kathamv luailou kan the. Kaniw khou kapy swmei nunc ta kangriang ntalouna zay tat kan the kumna kaniw ta nymmei nunc khang nzanh kan the.

¹¹He Nineve, nangniw ni zouh zangv mba puni the! nangniw ni nangniw ta zauczihmei nunc khou rui duak khang karamc puni e.

¹²Nangniw tuang rihgaekkai guay tei minhmei tadutthai bang kumc puni the: kabang tei kanukc tina, kathai nang mwang khou keymei tei kumc puni the.

¹³Nangniw tuang ricmei nunc tei ntumei kumc the khatni nangniw kandic tei zauczihmei hu khou rihmei maek kumc puni the. Nangniw tuang raengcmun guay tuang kaikhamvtaan guay tei mai rui ntei mut puni the.

¹⁴Dingbin nimei khang tei dui zu chamdaanvlou la tho, kumna nangniw tuang rihgaekkai sw tanc la tho! Niangtauc kasiamh khang bih buat la tho, kumna niangtauc kasiamhmei khuk tei chamdaanv la tho!

¹⁵Nangniw rui tabui tabui sw bam sini, nangniw ta raw luai puni the hamh e thei rih bamv khou swluai puni the. Phunling tei nkav rui tu ngammei tei kumcna nangniw ta kathamv key puni. Nang hei alunkav kumc geic pat the!

¹⁶Tingpuk gaanchuangcna suangc nang tuang lanvguanh-lanvdaenghmei sing geic the! Tiki ntaw thu kaniw guay tei alunkav samc maan kumc amaan ngam kan the.

¹⁷Nang tuang meicdaihmei nunc tei tingsei khou ngaengsaengc khou thuap padik bammei alunkav pang kumc the. Tiki neihpat pwkhou mi guay tei samc tat kan the, mi guay tei tabui thangc tat kan cho twmei thay dat mak khe.

¹⁸He Asiriamei guangcle, nang tuang dihsinpouc nunc theic the, khatni nang tuang meicdaihmei nunc tingsaeng zip kan the! Nang mei nunc ta chyngbut guay khou zinphaklou kan the, kumna kaniw ta kai khou phungc guanglou dat nimei meic maek khe.

¹⁹Nang zam guay tei tikuak dat khang ramh maek khe, kumna nang tuang zamzei guay tigay dat ngam ni tuang hamh the. Nangniw ta sw kamut kamailoumei chamv chumei guay rui neihlana baanhhiw puni the. Nang tuang kanganv maekmei meic nzimei taanv khou rui thowkumhmei duakmei nai bu cho?