Read Rongmei Naga HABAKUK 2 Bible Online

HABAKUK 2 - Rongmei Naga bible

HABAKUK 2

¹Ai atuang rigaanvkai khou kuna RINGHPOUC rui tabui lat sa khang sa puni cho khatni ai rui latphungclou kanmei khou tei kamei rui tabui lat dawlou puni cho twmei nkhwanna bam khwan e.

²RINGHPOUC rui heikumna dawlou the: “Ai rui nang khou lyanloumei tei zauclyanglouna sini pac pat rap nuh khang ntauhpaek khou hylou o.

³Mi hei hyna lou o kalam thu mi hei guangtangh khang kaganv hamh he. Kum e tiki kaganv tei katumcna guang pw the, kumna ai rui nang khou lyanloumei tei guang tangc puni the. Mi hei guang nyan e twna ning nuh e, kum e tiki mi khang tei nkhwanna bam o; hei tei suai makna pat puni de, kumna hei tei tingsaeng lak khe.

⁴Kumna chamv kiu thu mi hei e: ‘Meicgay makmei ringc ngam lak ge, kum e tiki ravchaptatmei nunc tei lwmmei paan rui ringc puni.’ ”

⁵Lanv hei meicguatmei de. Agaamvmei nunc hei daihriw sw e khatni simh simna bam mak ge taruaih padik zat makmei kumc kaniw hei pian tuang nai zat mak ge. Hei zaeng rui kaniw khang kandih akhat tangv akhat laagut the.

⁶Kaniw rui ngamna laagutloumei nunc rui kaniw ta nsihna luhna sa e, “Nangniw tuang hamhmei tei nangniw laa bam sini nangniw lungc amaan mak dyng e! Nangniw pow phunghmei nunc ta namna kaniw pow tikhangc lana asaanh tingsaengna nangniw mbaanv thay bam pw nina cho?”

⁷Kum e tiki meic baihmei ta ngammei nangniw, nangniw mang kumcna meicpow phungc lynna namna nangniw ta kathuay tikhangc puni the. Zauczihmei nunc guangna nangniw ta tikadunh puni the. Kaniw rui nangniw tuang guang asut puni the!

⁸Nangniw rui kandih mpeyna tuang kwam laa the, kum e tiki ntaw thu theic nsaekcloumei nunc rui nangniw tuang kwamlaa dat puni the. Hei tei nangniw rui meicbiw-meicdowmei zaeng rui khatni kandihmei nunc khatni kaidai guay khou abiw adowmei taanv taanhmei zaeng rui e.

⁹Kakai kasaamc gay khang rui khatni simei rui kakou tow mak khang rui twna nchumh makmei thiak khou syan lanv laaguang bammei tei ryanra zaengsi e dav!

¹⁰Kum e tiki nangniw tuang taanv rui nangniw kai kaikhunc khou zakmei phungc guang the. Zaatc mpeyna ta swmutloumei tei rui nangniw ruc khou kamut kamaimei tiguang the.

¹¹Kai ngaengsaengc tuang ntauh guay rui nangniw ruc khou kauc the, kumna kaiphuang guay rui kauc daw the.

¹²Nangniw hei mut puni the! Nangniw rui meic swluai swtiat lana kaidai kasiamh thau the.

¹³Nangniw rui laagutmei kandic guay tei kaniw lak nsa taan the, kaniw rui kasiamh thauloumei guay tei maibwang sw kan the. Mi guay hei Ngamparymei RINGHPOUC rui taanhmei taanv the.

¹⁴Kum e tiki duipui khou dui rui padikmei kumc mbaanv hei RINGHPOUC tuang hym ta thaymei rui padik puni the.

¹⁵Kainingmei ta katuang zouhmuanc khou rui zouh bun patna mbana paliucmei lwn how mak saanv tizangv bammei tei ryanra zaengsimei e dav!

¹⁶Nangniw tikgunc daicna bam nimei phaan nangniw ta zakmei rui duamliamlou lyn puni the. Nangniw ntaw thu zangv mba lyn dat puni the. RINGHPOUC rui nangniw ta nangniw tuang dandi tuang buangc tizangv puni the, kumna nangniw tuang tik hym tei zakmei guanh puni the.

¹⁷Nangniw rui Lebanon tuang ngouh dowkey kan the; ntaw thu nangniw ta dowkey dat puni the. Nangniw rui mi tuang khouringc khounac nunc ta swluai kan the; ntaw thu khouringh ta nangniw ping lyn dat puni the. Mi hei guang nimei lam thu nangniw rui meicbiw-meicdowmei zaeng rui khatni kandihmei maansei nunc ruc khou khatni kandih tuang kaidai guay ruc khou abiw adowmei taanv taanclou kanmei khang tei rui the.

¹⁸Ravmaengc rui tabui gaengmei naina cho? Mi hei maansei rui kasiamhloumei puat na de, kumna mi hei rui saraamhmei hamhna ramh baihmei khat na sini sa mak ge. Mi kumhmei lat na sini sapat ngam makmei ravmaengc hei kasiamh lana kalum bammei nunc khang mi racmaengc rui tabui swlou ngamna cho?

¹⁹Nangniw hei mut puni the! Nangniw rui thingdangv khou “Thau tho!” twna sa e khatni ntauhdwm khou “Ding thau tho!” twna sa e. Ravmaengc rui nang khou tabui salou pw nina cho? Mi hei daandi, kachaekc rui duam bam nuh e, kum e tiki hei tei theihmei de.

²⁰RINGHPOUC hei katuang nthanmei ravkai khou bam e; kandih khou bammei maansei katana kahu khou reih reina bam kandiu.