Read Rongmei Naga ZEPHANIA 1 Bible Online

ZEPHANIA 1 - Rongmei Naga bible

ZEPHANIA 1

¹Mi hei Amon nac mpouh Josia rui Judamei guangc swna bammei douc Zephania khou RINGHPOUC rui tii guangmei lat re. (Zephania hei Amaria, Gedalia, khatni Kushi khou rui keymei guangh Hezekia kikta e.)

²RINGHPOUC rui sa the, “Kandih nam ruc khou naimei ramh katana ta ai swmaan puni the,

³Maansei khatni khouringh khounah, nruay khatni khav, ga katana ta swmaan puni. Ai rui meicsimei nunc ta swmaan puni the. Ai rui maansei kaguayna ta swmaan puni the, kumna theic nsaekcloumei nai lak khe. RINGHPOUC ai rui sa pat kan the.

⁴“Ai rui Jerusalemmei nunc ta khatni Judamei guayna ta dandi tii puni. Baal ta kalummei tuang kamaan kamuina nganvna suicna ai rui swmutlou puni. Khatni kasiamruai swmei kamaengh kalummei amuh nunc ta tei meic gaanv khat na rui sini ningtow bam dat lak khe.

⁵Kainam khou kuna neihmik, bw, khatni gaanchuangcna guay ta kalum bammei nunc ta ai rui swmutlou puni. Ata kalum lana khatni alat piuna lungc ni twna latdyng swlou lana Molek rav zanc khou latdyng sw dat kanmei nunc ta tei ai rui swmaan puni.

⁶Thei hanc lana athei lay dat makmei nunc, akhou guang makmei nunc khatni kaniw ta chaengzaylou khang akhou sa makmei nunc ta ai rui swmutlou puni.”

⁷RINGHPOUC tuang tingmik kiu, Ravguangc rui taanv sw nimei tingmik kiu ana the; kumhpui zaeng rui kahu khou reih reina bam o. RINGHPOUC rui kamei nunc ta ravkhaengmei khouringc dow kumhna thimluai key khang chamdaanv bam the.

⁸RINGHPOUC rui sa e, “Mi thimluai nimei nungc kiu, ai rui meicdaihmei nunc, guanghnac nunc, khatni zaatc baihmei thak layluaih bammei nunc ta dandi tii puni.

⁹Ravriak baihmei tatmei nunc kumcna rav baihmei ta kalummei nunc khatni asut guangmei puat rui kaniw tuang Ravkai tipadiklou khang houcna khatni swluai swtiatna bammei nunc ta ai rui dandi tii puni.”

¹⁰RINGHPOUC rui sa e, “Mi tingmik nungc kiu, Jerusalem khou Khav raengcmun khou kauc rah ndymei khwan chu puni. Kaidai thanh langv khou tei rui kap ngiuh ngiumei khwan chu puni khatni luanghbut guay khou kachin karo guangmei khwan chu puni.

¹¹Nangniw mi kaidai tuang lanvguanhmei bamv bamv khou lunghmeithiu, mi khwan tei chu pwkhou kapna huay tho, kalam thu lanvguanh lanvdaengmei nunc tei khatni kaphut lanvguanhmei nunc tei theic ngam kan puni the!

¹²“Mi ganv khou kiu ai thauhmai sinna Jerusalem khou phu lana karana kakhou pianna khatni karana kata lwmna ‘RINGHPOUC rui ramhkhat na sini sw bam ni tuang hamh e,’ twna kakhanh bammei nunc ta tei ai rui dandi tii puni.

¹³Kaniw tuang lanv tei asut kan puni the khatni kaniw tuang kai guay sw amaan puni the. Kaniw rui sw bammei kai khou hei kaniw lungc ni tuang hamh the khatni kaniw rui lingc bammei drakhathai dui hei kaniw zangv ni tuang hamh the.”

¹⁴RINGHPOUC tuang daihmei tingmik ana the nadut na di the kumna katumcna guang pw the! Mi tingmik kiu nkhucmei tingmik puni the, tancbauhmei rihmei nunc nganvna lungh kabiuna kap rah ndy puni the!

¹⁵Hei tei lungpuam tingmik, hei tei ryanra zaengsimei tingmik, swkamut kamaimei tingmik, zinghmei tingmik, muangh zingh miuh miumei tingmik,

¹⁶rih tuang bianggun khwan khatni raengh raengloumei kaidai guay khatni kauhmei rihgaekkai guay ta adowna rihmei nunc rui khwmmei khwan rui padikmei tingmik puni the.

¹⁷RINGHPOUC rui sa e, “Ai rui maansei nunc ruc khou hei kumhmei sw kasic karoucmei tiguang puni, twmei thu miktiatmei kumcna meic kathuicna kathamna tat puni. Kaniw rui aruc khou paapc taanc the, kumna kaniw tuang zei tei dui kumcna bunpat puni the, kumna kaniw tuang theihmei phouh tei kandih khou taamcna ganclou puni the.”

¹⁸RINGHPOUC rui kalungpuam lyan patpui nungc, kaniw tuang daandi kachaekc rui kaniw ta kanlou dat ngam lak khe. Kalungpuam mai rui kandih kapwm hei swmutlou puni. Kandih khou bammei kaguayna khang thay mak daekna nkhamhmei tingmik guang puni.