Read Rongmei Naga ZEPHANIA 2 Bible Online

ZEPHANIA 2 - Rongmei Naga bible

ZEPHANIA 2

¹Guang kaduai tho, guang kaduai tho, he zak thay makmei zaat,

²Phei ta kumc nangniw ta kagamv ganc makmei hu khou, RINGHPOUC tuang chuangc bammei lungpuam nangniw ruc khou guang mak khou, kamei rui kalungpuam lyanloumei tingmik guang makmei hu khou guang kaduai tho.

³RINGHPOUC khou karih guang o, mi kandic khou lungc bammei lungh niamhmei thiule, kalatdanv guay piu bammei nuncle. Nchumhmei tei taanc o, kumna nangniw RINGHPOUC hu khou niamh key o. Kum e thei RINGHPOUC rui lungpuam lyan patpui nungc nangniw duak pwng e.

⁴Gaza kaidai khou meic gaanv khat na sini ganclou lak khe. Askelon hei lungctaekna ganclou puni the. Asdodmei nunc ta tingchung khou rui alay ganc ngamlou puni the, khatni Ekronmei nunc ta kaniw tuang kaidai khou rui alay ganc puni the.

⁵Duipui tin khou lungc bammei Philistinmei nangniw kamut kamai puni the. RINGHPOUC rui nangniw ruc khou kalat baengc pat kan the. Kamei rui nangniw ta swmutlou puni the, kumna nangniw gaanv khat na ta sini nsaekclou lak khe.

⁶Duipui tin khou naimei nangniw ramv guay tei nsa ramv swna lauziu gaenghmei nunc kai khatni lauziu kuanc rana padik puni the.

⁷Judamei theic nsaekcmei nunc rui nangniw kandic khou tei lungc puni the. Kaniw rui hei tei kaniw tuang lauziu nunc byn tiswlou puni the, kumna kaniw Askelon tuang kai guay khou zip puni the. RINGHPOUC kaniw Racguangc rui kaniw ta nduanghlouna kaniw ta tilungcgay chingkhiuhlou dat puni the.

⁸Ngamparymei RINGHPOUC rui sa e, “Moabmei khatni Ammonmei rui amei nunc ta tizakna khatni sinnuina samei khatni kaniw kandic tei kaniw rui asut puni twna sa bammei tei ai chu the.

⁹Ai hei Isaraelmei tuang ringc bammei Ravguangc swmei suai makmei kumcna Moab lev Ammon ta Sodom lev Gomora ta kumc suai makna swmaan puni the. Mi nei hei ntey khunc bamv khatni tingsaeng sw kasicna gancloumei, sauhraengh rui thau padikmei bamv sw puni the. Amei nunc theic nsaekcloumei nunc rui kaniw tuang puat khatni kandih tei laa puni the.”

¹⁰Moabmei khatni Ammonmei ta kaniw tuang daic tuh tuna swmei khatni Ngamparymei RINGHPOUC tuang mei nunc ta tizakmei khang rui dandi tii nimei kiu mi hei the.

¹¹RINGHPOUC rui kaniw ta tipinglou puni. Kamei rui kandihmei tuang rav nunc ta ramhkhat na sini hamhmei tiswlou puni, kumna khou kiu zaatc kathuicna rui kakandic dic khou kata kalum puni.

¹²RINGHPOUC rui Sudanmei nunc ta ni swluai puni.

¹³RINGHPOUC rui kabaancpwam ntyng patna Asiria ta swmaan puni. Kamei rui Nineve kaidai ta meic lungctaekna gancloumei, dui maekmei sypungramv tiswlou puni.

¹⁴Mi hei lauziu pang, khatni khouringh zaat kaguayna zip kariupui bamv sw puni. Sw kasic karoucna lungctaekna gancloumei bamv khou kailat py khou puanhmang nunc tow bam puni. Agaekc nunc rui kaimun py khou towna rah bam puni. Kai guay khou swloumei sidarthing guay tei kathangv ganc puni.

¹⁵Karana kangamv khang heidi kagaengh swna bammei khatni mi khou hei giuga dat khang maek khe twna kakhanh bammei kaidai khou patlou nimei kiu mi hei the. Mi khou bammei nunc tei rui kaniw kaidai hei kandih nam ruc khou daic liangmei di the twna kakhanh e. Mi hei adihkamv simei lungctaekloumei bamv sw puni cho, nwmbangc khouringc nthaekcpui bamv sw puni! Mi khou tei tat ruanloumei kathuihna rui sinnui puni, khatni ‘Apuai’ twna sa puni.