Read Rongmei Naga ZEPHANIA 3 Bible Online

ZEPHANIA 3 - Rongmei Naga bible

ZEPHANIA 3

¹Jerusalem hei mut the, mphuam kanmei, meicliammei kamei nunc ta rai kanmei kaidai hei.

²Kamei RINGHPOUC lat chulou mak khe khatni kamei rui riap ntwnloumei ta laalou mak khe. Kamei RINGHPOUC lat lwmlou mak khe khatni kamei rui nkhavlou khang ney mak khe.

³Katuang meicdaihmei nunc tei nin bammei kamangliangpui nunc kumc the; katuang latzanpouc nunc tei ndaapcmei angiw nunc kumc the, tu nii langvna ramh rou tei tinggaanh mak saanv na sini ganclouna nkhwan liat lak khe.

⁴Muhzwng nunc tei kaniw thouc thay mak khe khatni meicguatmei rui padik the, amuh nunc rui nthanmei bamv ta sw mphuam the, khatni kaniw khang kadow chamei theilayna Ravguangc tuang latdanv guay ta kariang kadat the.

⁵Tiki RINGHPOUC tei mi kaidai khou tei bam di he; kamei nchumhmei tei taanc bam e, nkhuaimei taanc zat mak ge. Nzuanh zat makna kamei rui lauthwan kathuic, kamei rui kamei nunc khou nchumhmei phungc guang e. Tiki khou tei bammei ravchaptat makmei nunc rui nkhuaimei taancna bam e kumna zak mak ge.

⁶RINGHPOUC rui sa e, “Ai rui zaatc kapwmna ta swmaan the; ai rui kaniw tuang kaidai guay tei swmutlou the, kumna kaniw tuang raengh khatni kai guay tei sw kasicna ganclou the. Kaidai guay tei lungctaekna ganclou the; chaengdai guay tei karaeng di the, meic gaanv khat na ta sini daeklou mak khe.

⁷Kum pwkhou amei nunc rui ata chakhwang champouh sw pwng e, khatni ai rui riap ntwnloumei laalou pwng e, kumna ai rui kaniw khou nchamloumei para kaniw amuc dat zat pw lak khe twna ai kakhanh khwan e. Tiki kaniw tei kalwnlung kumna si dat nuangc kan de.”

⁸RINGHPOUC rui sa e, “Nkhwan o, ai rui zaatc nunc tuang khuay sa pat khang dingthau nimei tingmik ta nkhwan o. Alungpuam ngamv kaniw ta tithaylou khang guanghdic guay khatni zaatc guay ta khuam kaduai khang alung dinglou tang the. Alungpuam mai rui kandih kapwm ta swmutlou puni the.

⁹“Khou kiu ai rui zaatc guay tuang mei nunc ti hei tikalaihlou puni the, kumna kaniw rui rav baihmei khou hamhna akhou na kalum puni the. Kaniw kaguayna rui alat piu puni the.

¹⁰Duhmei Sudan thangc rui nganvna lungc nraanv tat kanmei amei nunc rui akhang puatkat phungc guang puni the.

¹¹Hei ganv khou kiu, amei nunc, nangniw alat liam khwan e twna zak dat bam khang nai lak khe. Daihsw gaenghswmei kathuicna ta ai rui laa ganc puni, kumna atuang nthanmei chyngbut khou nangniw ata liam dat pw lak khe.

¹²Niamhmei, nkhavlou khang akhou guangmei nunc ta ai rui hei khou tei tilungc puni.

¹³Theic nsaekcloumei Isaraelmei nunc rui meic gaanv khat na khou sini nkhuaimei taanv taanclou lak ge, saraamc lak ge, khatni meicguat lak ge. Kaniw tei lungcgay chingkhiuh puni khatni giuga lak ge, meic gaanv khat na ta sini ping lak ge.”

¹⁴Neihlana suan o, kauc o, Isaraelmei nuncle! Nang lung kapwm neihla o, he Jerusalem!

¹⁵RINGHPOUC rui nang ta dandi tiimei tei luai the; nang tuang zauczihmei guay ta kamei rui laa ganclou kan the. RINGHPOUC, Isaraelmei guangc, nangniw lev bam e; ntaw thu ping dat khang kalam maek khe.

¹⁶Jerusalem khou kumna sa nimei ganv guang pw the, “Ping riu, Zaion kaidai! Nang baanc zay zuatri bam ri tho!

¹⁷RINGHPOUC nangniw Racguangc nangniw pang khou bam e; kangamv rui nangniw khang rih ngammei tiilou the. RINGHPOUC rui nangniw ta neihla puni, khatni karamzian khou kamei rui nangniw khang panty thanh tiilou puni. Kamei rui nangniw ruc khou lu suanlou puni khatni neihlalou puni,

¹⁸meic nunc rui khumngai khou neihlamei ramneihla kumcna.” RINGHPOUC rui sa e, “Kamut kamai khang pingmei tei tiluailou kan the, khatni nangniw tuang zakmei laa ganclou kan the,

¹⁹kaganv kiu guang pw the! Nangniw ta rairiumei nunc ta ai rui dandi tii puni; phaybaumei guay ta ai rui kanlou puni khatni ginramdic thangc zaytat kanmei guay ta phungc guang dat puni. Ai rui kaniw tuang zakmei tei champouhmei khou guanhlou puni, kumna kandihmei guay rui kaniw ta thuanc puni.

²⁰Kaganv kiu guang pw the! Zinphak tat kanmei nang mei nunc ta ai rui kai khou phungc guang dat puni; ai rui nangniw ta kandih kapwm khou nangniw zanc titatlou puni kumna nangniw ta tilungcgay chingkhiuhlou dat puni.” RINGHPOUC rui sa pat kan the.