Read Rongmei Naga HAGAI 1 Bible Online

HAGAI 1 - Rongmei Naga bible

HAGAI 1

¹Persiamei guanghdaihmei Darias guanghtumei tuang kaneimei kwm charukmei bw tuang reymei tingmik nungc, muhzwng Hagai khou RINGHPOUC rui lat tiguang khwan e. Hei tei Shealtiel nac mpouh Juda tuang guanghkhyn Zerubbabel khatni Jehozadak rui puanhmei Tingkuh Joshua khang khwan e.

²Ngamparymei RINGHPOUC rui Hagai khou sa the, “Ntaw hei Ravkai sw thau dat nimei ganv hamh he twna meic nunc rui sana bam e.”

³Khoutei RINGHPOUC rui meic nunc khang muhzwng Hagai khou mi lat hei tiguang the:

⁴Amei nuncle, atuang Ravkai tei kamut kamaina ganclouna tabui swna nangniw thingpaek kai gay gaymei kasiamhna lungc bam tu cho?

⁵Nangniw khou pat bammei hei nangniw how makna cho?

⁶Nangniw mpeyna lingclou e katit na tay tu dat re. Nangniw tu bam sini tu nggu khang maek khe, zangv bam sini zangv padik khang maek khe, nsuay mbaanv bam sini lumc biuh khang maek khe. Nangniw syandui ntaanv bammei guay tei phoumei khau khou phaiclou khang ntaanv bam di the.

⁷Tabui zaeng rui mi guay hei kumc bam tu cho twmei nangniw thay makna cho?

⁸Chyngbut thangc tei kuna thing downa Ravkai tei kasiamh thau dat tho. Kum pwkhou ai rui kwnlou dat puni kumna ai atik ahym daicna guanglou dat puni.

⁹Nangniw nap-bi laa geic pwng the twna lwmgay the, tiki katit na laa the. Kai khou laaguangloumei thaengvna tei sini, ai rui amuan ganc the. Tabui zaeng rui cho? Kalam thu atuang Ravkai ra kasic karoucna ganclou bam ki nangniw kakai kakai khang na tynna bammei zaeng rui e.

¹⁰Hei zaeng rui tingpuk rui ni tingdui tikey mak khe kandih rui ni ramh bwan tithau mak khe.

¹¹Ai rui luanghbut guay khou, laupuk guay khou, drakhalau guay khou, Olive lau guay khou, kandih khou thaupatmei phunling phunlu guayna khou, maansei khou, kiruai guay khou khatni nangniw rui lingc keyloumei phunling phunlu guayna khou tingdui tikeylou mak khe.

¹²Khoutei Zerubbabel ni Joshua ni Babilon thangc rui guang datmei guay tei ni twna RINGHPOUC kaniw Racguangc rui samei tei piu the. Kaniw tei ping the kumna RINGHPOUC tuang latdiu tatmei muhzwng Hagai rui samei tei piu the.

¹³Khoutei “Ai nangniw ta nduanghlou puni twna RINGHPOUC rui sa e,” twna RINGHPOUC tuang latdiu tatmei Hagai rui meic nunc khou tei salou the.

¹⁴Shealtiel nac mpouh, Judamei guangckhyn Zerubbabel, Jehozadak nac mpouh tingkuh Joshua khatni meic guayna lungning RINGHPOUC rui tichuangc thaulou dat khwan e. Kumna Ngamparymei RINGHPOUC kaniw Racguangc kai khou guangna taanvtaanh thau dat khwan e.

¹⁵Hei tei charukmei bw tuang 24mei tingmik nungc khwan e.