Read Rongmei Naga HAGAI 2 Bible Online

HAGAI 2 - Rongmei Naga bible

HAGAI 2

¹Mi kwm tei chaneimei bw tuang zaeng 21 puineic muhzwng Hagai khou RINGHPOUC tuang lat tiguang dat the.

²Guanghkhyn Zerubbabel, Tingkuh Joshua khatni meic guayna khou tei sa tho twna RINGHPOUC rui kumna sa guang the,

³“Ra kanmei Ravkai ramgai tei howloumei thowkumhmei nangniw pang khou nai tu cho? Ntaw thu hei tei akumh bam tha? Mi hei ramhkhat na sini maek kumc the.

⁴Kumna nangniw ntaw thu Zerubbabel ni, Joshua ni khatni nangniw meicguayna bauc tho. Kalam thu ai rui nangniw ta nduanghlou bam e.

⁵Nangniw Izip khou rui tatpatmei ganv khou tei ai rui nangniw ta nduanghlou puni twna nrianhlou kanmei tei kumna ai nangniw ta nduanghlou bam e kumna ping dat ri tho.

⁶Ai rui asaanh makmei lungc khou tingpuk kandih, duipui, ramvkiang ta kanukc dat puni he.

⁷Zaatc kaguayna ta ai rui kanukc dat puni, khou kiu zaatc guayna tuang lanv khou hei phungc guang puni, kumna Ravkai tei lanv rui padik puni.

⁸Kachaekc ni kaphut ni atuang e.

⁹Kasiamh thau dat nimei Ravkai hei ra kanmei khang tei suangc gay puni the. Kumna amei nunc ta lungcgay amanvna lungh khang ai rui tiilou puni the.” Ngamparymei RINGHPOUC rui kumna sa the.

¹⁰Darias Guanghtumei tuang kaneimei kwm chakiumei bw tuang zaeng 24mei nungc Ngamparymei RINGHPOUC rui muhzwng Hagai khou sa guang dat re.

¹¹RINGHPOUC rui kumna sa e, “Mi tuang latbamv hei amuh nunc rui sa nthanlou khang kaniw khou kumna thanv o:

¹²Thowkumhmei rui khaengmei tuang nthanmei zanc kaphey tin khou sianguangna kaphey tei rui ntyan khou pwni, gan khou pwni, drakhadui khou pwni, thauh khou pwni, tabui bui tuang tuzangvmei tuang khou pwni kahilou e thei, mi taektw tei nthanmei taektw sw puni dai?” Mi lat thanv khou tei “Kumh mak ge,” twna amuh nunc tei rui daw the.

¹³Khoutei Hagai rui thanv dat re, “Meic gaanv khat rui theihmei pumc ta kahiloumei zaeng rui kamei mphuam the, kumna kamei rui mi taektw ti hei kahilou e thei mi taektw tei ni mphuam puni dai? “Ngguay,” twna amuh nunc rui daw the.

¹⁴Khoutei Hagai rui sa the, “Isaraelmei zaat khatni kaniw rui taancpatmei taanv kaguayna tei hei tei kumc rap di the; kumna kaniw rui ravchapaeng khou katloumei kathuicna tei ni kamik zaw khou mphuam ngam the.”

¹⁵Aseic khou rui thauna pat pw nimei tei zauc o. Ravkai kasiamh thau makmei ntauh akhat rui akhat ruc khou loubammei tei,

¹⁶akumh bam khwan cho? Napzungc khou tei kadath 200 nai bam khwang e twna guang khou kadath 100 na nai the. Drakhadui khunc khou kaduk 50 nai khwang e twna guang khou 20 na nai the.

¹⁷Mpwan suhmei khatni nrihthai rui nangniw rui lingc keyloumei phunling phunlu guay swmutsutlou the, kum bam sini nangniw lunghlaih mak ge.

¹⁸Aseic hei bw chakiumei tuang zaeng 24mei tingmik, Ravkai kabam lang luailoumei tingmik nungc hei rui chak thau tho.

¹⁹Ntaw napphwn lingc key makna saamh khou lou bam sini, drakha bang, tadut bang, puc-heithai, Olive bang khatni tingthai guay ntaw nthai pat mak bam sini, aseic khou rui thauna ai rui nangniw khou suaihiamlou puni the.

²⁰Mi bw tuang zaeng 24mei nungc kahak tei RINGHPOUC rui

²¹Juda tuang guangckhyn Zerubbabel khang kaneimei lat Hagai khou tiguang dat re: “Ai rui tingpuk kandih ta kanukc puni the

²²Kumna guanghdic guay ta swkeyna kaniw tuang pumtan guay tiluailou puni the. Ai rui kaniw tuang takuanh gari guay khatni kakaipouc guay ta kalatc khanlou ngam puni; takuanh nunc khatni takuanh thouc bammei guay tei bow key puni the kumna kaniw nchamc khat khat tuang buy-baeng hu khou theic puni the.

²³Mi nungc kiu, Zerubbabel, azanc khou nang rui kandih sin khang ai rui nang ta suamclou puni the. Ai rui nang ta kapahlou the.” Ngamparymei RINGHPOUC rui sa the.