Read Rongmei Naga ZEKARIA 10 Bible Online

ZEKARIA 10 - Rongmei Naga bible

ZEKARIA 10

¹Lauphwnswan ganv khou RINGHPOUC khou ting ney tho. Muangh tiguangna ting tiriu chunh chunlouna meic kathuicna khang laupuk ti-ndiakc rih riloumei hei RINGHPOUC rui e.

²Meic nunc rui ravmaengc khou khatni mangmuc nunc khou thanv e, tiki kaniw khou rui laatowmei latdaw guay tei saraamhmei e khatni kaba maek ge. Gaanvsaekc rui mang mban e, tiki hei tei rui nangniw ta zay laanh e. Kaniw rui diw tigayloumei lat guay tei nsa de. Kumna meic nunc tei amaanmei lauziu kumcna ruan bam e. Kaniw hei zayloumei maekna ryanrana bam the.

³RINGHPOUC rui sa the, “Amei nunc ta sin bammei zaatc baihmei nunc ta tei ai lunghpuamc the, kumna ai rui kaniw ta dandi tii puni the. Judamei nunc hei atuang e, Ngamparymei RINGHPOUC, ai rui kaniw ta kadanlou puni. Kaniw tei atuang tanhmei rih takuanc nunc sw puni the.

⁴Amei nunc ta sin khang kaniw pang khou rui dihsinpouc nunc, kapy nunc khatni rihpy nunc lungc pat puni.

⁵Rihmei nunc rui zauczihmei ta mbut nii kumc nii gutmei tei kumcna Judamei nunc hei rihngam puni the. RINGHPOUC rui nduanghloumei paan rui, kaniw adow puni kumna zauczihmei tuang takuanh ricmei nunc ta nganv kaniw ngam puni.

⁶“Ai rui Judamei nunc pumtan titanclou puni; ai rui Isaraelmei nunc ta kanlou puni. Ai rui kaniw ta nzianlou puni kumna kai khou phungc guanglou dat puni. Kaniw tei ai rui ganc patlou zat makmei nunc kumc dat puni. Ai hei RINGHPOUC kaniw tuang Racguangc e; kaniw rui huayneymei ai rui dawlou puni.

⁷Isaraelmei nunc tei rihmei nunc kumc tanc puni the, zouh zangvloumei nunc kumc neihla puni the. Kaniw kikta guay rui mi rih ngammei ti hei ningtow bam puni the kumna RINGHPOUC rui taancloumei taanv khang tei rui kaniw neihla puni the.

⁸“Ai rui amei nunc ta kabai puni kumna kaniw ta khuam kaduai puni. Ai rui kaniw ta kanpatlou puni kumna kahunungc kumcna meic tikingc nkiuclou dat puni.

⁹Ai rui kaniw ta kandih baih baih thangc zinphaklou khwan sini, duh thangc rui nganvna kaniw ata ningtow puni. Kaniw khatni kaniw nac nunc theih makna guang kariu dat puni.

¹⁰Izip khatni Asiria khou rui ai rui kaniw ta phungc guang dat puni kumna kaniw ta kaniw kandic khou tilungclou dat puni. Ai rui kaniw ta Gilead lev Lebanon khou ni tilungclou puni; kumna mi kandic kapwm hei maansei rui padik puni.

¹¹Kaniw ryanramei duipui khou tat kaan pwkhou, RINGHPOUC ai rui kamuatcmei duipui ta kathamv puni, kumna Nail duithuak tei kasyng thip tangc puni. Daic tuh tumei Asiriamei nunc tei niamhkey puni, kumna pumtan daihmei Izip kapumtan amaan puni.

¹²Ai rui amei nunc pumtan titanclou puni; kaniw ata kalum puni khatni alat piu puni.” Mi hei RINGHPOUC rui sa kan the.