Read Rongmei Naga ZEKARIA 12 Bible Online

ZEKARIA 12 - Rongmei Naga bible

ZEKARIA 12

¹Tingpuk laamv ntyng patloumeipu, kandih damhmeipu, khatni maansei khou ringhmei tiiloumeipu RINGHPOUC rui Isaraelmei lam khou tii guangmei kiu mi hei the. Kamei rui sa the,

²“Ai rui Jerusalem ta zouhbuangc tiswlou puni the; kadaeng khou bam nkuay bammei zaat nunc rui hei tei zangv mbana tarut bam puni the. Kaniw rui Jerusalem ta ding haengv pwkhou, Juda kaidai baihmei guay ta ni ding haengv muay puni de.

³Tiki kaganv guang pwkhou, ai rui Jerusalem ta nritmei tautuangc tiswlou puni. Hei tei puanc thau khang swmei zaat guay tei kabiu puni. Kata adow khang kandih khou naimei zaat guay kariu puni.

⁴Mi ganv khou kiu ai rui kaniw tuang takuanh guay ta tipinglou puni khatni kaniw tuang takuanc tuanghmei guay ta ti-mbalou puni. Ai rui Judamei nunc ta zauc bam puni, tiki kaniw ta zauczihmei nunc tuang takuanh nunc mik titiatlou puni.

⁵Mi ganv khou kiu ‘Ngamparymei RINGHPOUC Ravguangc rui Jerusalem khou bammei kamei nunc khou pumtan tiilou the,’ twna Juda puinacmei rui sa puni the.

⁶“Mi ganv khou kiu ai rui Juda kaikhwang ta nwmbangc khou hamh e thei napminhmei laupuk khou mai rui ramhacmai kumc tiswlou puni the, kadaeng khou bam nkuay bammei zaat guay ta kamei rui swmutlou puni the. Jerusalemmei nunc kaidai lungc khou giuga makna bam puni the.

⁷“RINGHPOUC, ai rui Juda khwang tuang ricmei nunc khou rih ngammei tiilou rey liang puni, hei tei David kikta khou khatni Jerusalemmei nunc rui laa nimei chakhwang champouhloumei tei baihmei Juda khwang hei rui laa nimei tei suangc daic mbu mak khang e.

⁸Mi ganv khou kiu Jerusalem khou lungc bammei nunc ta RINGHPOUC rui gaeklou puni, kumna kaniw pang khou nsuan liangmei tei sini David kumc tanc puni. David kikta nunc rui kaniw ta RINGHPOUC tuang baanchara kumc, Ravguangc kamei kahak kumcna chaengzay puni.

⁹Mi ganv khou kiu Jerusalem ta rih key khang sw bammei zaat guayna ta ai rui swmutlou puni.

¹⁰“Ai rui David kikta nunc khatni Jerusalemmei nunc khou zauzian khatni huayneymei chwn tipadiklou puni. Kaniw rui biwluai kanmeipu ta kaniw zauc puni, kanac akhat namei theic kanmei ta huaymei kumcna kaniw kakhang rui kapna huay puni. Nareimei mpouh theic kanmei ta huay kumc kaniw kaucdai kaucna huay puni.

¹¹Mi ganv khou kiu Jerusalem rui kapmei tei Megiddo nzaengc khou Hadadrimmon khang kapmei kumc ranvna kap puni the.

¹²Mi dic khou bammei kaikhunh kathuic kaikhunh kaikhunh swna kap puni the: David khou rui lungc keymei kaikhunc, Nathan khou rui lungc keymei kaikhunc,

¹³Levi khou rui lungc keymei kaikhunc, Shimei khou rui lungc keymei kaikhunc,

¹⁴khatni baihmei kaikhunc guay kaikhunh kathuic tei kaikhunh kaikhunh swna kap puni the. Nggaanvmei langv ntumei langv baicna kap puni the.