Read Rongmei Naga ZEKARIA 13 Bible Online

ZEKARIA 13 - Rongmei Naga bible

ZEKARIA 13

¹RINGHPOUC rui sa the, “Mi ganv kiu guang pwkhou, David kikta nunc khatni Jerusalemmei nunc ta kaniw paap khatni kaniw tuang ravmaengc kalummei khou rui sw nthan lou khang duipuakckai akhat laanclou puni.

²Mi ganv khou kiu ravmaengc guay zanc tei mi kandic khou rui laa ganclou puni, kumna meic gaanv khat na sini hei tei ningtow dat lak khe. Muhzwng e twna sa bammei nunc ta tei khatni nthan makmei bumaengc ta tei ai rui laa ganc puni.

³Kum pwkhou thowkumhmei rui ravmun dinc bam e thei, kata swluai puni twna kapui kapu rui kakhou sa puni, kalam thu kamei Ravguangc lat sa tu e tu lana saraamcna sa e. Kamei rui ravmun dinc pwkhou, kapui kapu rui kata biw luai nina e.

⁴Mi ganv tei guang pwkhou, meic gaanv khat na sini katuang ndawman khang kagaengh sw dat pw lak khe, muhzwng thak ni sw dat pw lak khe, khatni meic nunc ta guat khang muhzwng phey piu dat pw lak khe.

⁵Mi phaan tei kaniw rui kumna sa puni the, ‘Ai muhzwng hamh e. Ai thu lautaanhmeipu de apanty khou launa taancna lungc bammeipu de.’

⁶Khou kiu, ‘Nang ngaengv khou zam guay tei thu tabui cho,’ twna thowkumhmei rui thanv ti thei, ‘Apammeipu kai khou rui nzamh lana de,’ twna kamei daw puni.”

⁷Ngamparymei RINGHPOUC rui sa the, “Thau tho, he baengsaengle, akhang taancloumei lauziu gaenghmeipu ta adow tho! Kata swluai tho, kumna lauziu nunc tei pakphak tat puni the. Ai rui amei nunc ta adow puni,

⁸kumna kandih kapwm khou meic kadam kathumh tuang kanei thu theic puni the.

⁹Theic nsaekcloumei kathumhmei langv ta tei ai rui nchanv puni the khatni daandi, kachaekc ta mai rui sw nthanmei kumc ai rui kaniw ta sw nthan puni. Khou kiu kaniw akhou huayney puni, kumna ai rui dawlou puni. Kaniw hei amei e twmei ai rui kaniw khou sa puni khatni ai hei kaniw Racguangc e twna kaniw sa puni.”