Read Rongmei Naga ZEKARIA 3 Bible Online

ZEKARIA 3 - Rongmei Naga bible

ZEKARIA 3

¹Ndawman akhat khou, Tingkuh Joshua RINGHPOUC tuang baanchara hu khou ding bammei ta akhou lyanlou the. Hei khou tei Joshua tuang khuay sa khang Seitaan kadaeng khou ding chamdaanv bam the.

²RINGHPOUC tuang baanchara tei rui Seitaan khou tei sa the, “Seitaan, RINGHPOUC rui nang ta luh e! Jerusalem ta nzianmei RINGHPOUC rui nang ta luh e. Mi pu hei mai khou rui laa pat datmei maiswm kumh tuang e.”

³Joshua tei taniap tiaph tiapmei pheybaan piuna baanchara hu khou tei ding bam the.

⁴“Katuang tanacmei pheybaan tei luak ganc kan tho,” twna kahu khou ding bammei nunc khou tei baanchara tei rui sa the. “Ai rui nang paap guay tei laa ganc kan the kumna nang khang pwan thanh tii dat puni the,” twna kamei rui Joshua khou sa the.

⁵Joshua py khou pygwm thanh gumlou khang kamei rui latdiumei nunc khou tei sa the. Kaniw rui hei tei swlou the, kumna kaniw rui kakhou pwan thanh piulou the. Mi ganv khou tei RINGHPOUC tuang baanchara dingbam khwan e.

⁶RINGHPOUC tuang baanchara tei rui Joshua khou kady the,

⁷Ngamparymei RINGHPOUC rui sa the: “Nang rui atuang latdanv guay tei ngaek ge thei khatni ai rui nang khou tiiloumei thouc guay tei taanc e thei nang atuang Ravkai tei phungc tanh tan bam puni, khatni adaeng khou bammei baanchara nunc ravsuai ai rui chulou bammei kumcna ai nang tuang ravsuai chulou puni.

⁸Tingkuh Joshuale, mi hei nking o; sangaymei Joshua pammei nunc ni nking o: Kachy twna kawmei asiamruaimeipu ta ai rui nangniw khou lyanlou puni!

⁹Kazaw chanei naimei tauhbut akhat ai rui Joshua hu khou lou the. Ai rui mi khou tei latkaeng hianlou puni, kumna zaeng neih khat na khou mi kandic tuang paap guay ai rui laa ganc puni.

¹⁰Mi tingmik kiu guang pwkhou, nangniw kathuicna rui kaining kaigeimei ta drakha pikwan khatni tadut bang rui bam nkuaymei bamv khou nchu-nzaenghna giuga makna bam khang kabai puni the.”