Read Rongmei Naga ZEKARIA 4 Bible Online

ZEKARIA 4 - Rongmei Naga bible

ZEKARIA 4

¹Ata kachuc bammei baanchara tei guang datna zipri bam khwanmei ta kumcna ata nchyang thau the.

²“Nang tabui how bu cho” twna kamei rui akhou thanv the. Ai rui daw the, “Kachaekc tuang thaucmai tiangc how e. Katwan khou thauhbungc nai e. Akhat khou mairiang chanei chanei naimei thauhmai chanei mi thaucmai tiangc khou tei nai e.

³Mi thaucmai tiangc tuang baanzat baandau khou tei Olive bang akhat akhat nai e.”

⁴“Mi hei tabui cho?” twna ai rui baanchara khou tei thanv the.

⁵“Mi kabac hei nang thay makna cho,” twna kamei rui akhou sa the.

⁶Nang rui ngam nimei tei rihmei nunc pumtan paan rui hamh e khatni nang pumtan rui ni hamh e tiki abumaengc paan rui ngam nina e.

⁷Chyngbut di dimei kunghmei azuh tei ni nang hu khou amaan kan puni. Nang rui Ravkai tei kasiamh thaudat puni, kumna luailou nimei ntauh tei taplou pwkhou ‘Gay dyng the, Gay dyng the!’ twna meic nunc rui kauc puni.

⁸RINGHPOUC khou rui lat akhat sa guang dat re,

⁹Kamei rui sa the, “Zerubbabel rui Ravkai kaiphwn tei thwanlou the, kumna kamei rui kai tei luailou puni. Mi hei guangtangc pwkhou, ai rui nang ta kaniw khou thouc guangmei tuang e, twmei meic nunc rui thay puni the.

¹⁰Kaniw lung tangkhyn the kalam thu kaniw maanvpaengh mak khe. Tiki Zerubbabel rui Ravkai tei kasiamh thau bammei tei how puni the, kumna kaniw neihla puni the.”

¹¹Khoutei ai rui kumna kakhou thanv the, “Thauhmai baanzat baandau thangc nai bammei Olive bang kanei tei thu tabui kabac cho?

¹²Olive thauc tipatmei tuang kachaekc tuang thauhriang kanei daeng khou naimei Olivechy kanei tei ni tabui kabac cho?”

¹³“Nang thay makna cho?” twna kamei rui akhou thanv the. “Ai thay mak ge” twna ai rui daw the.

¹⁴Khoutei kamei rui sa the, “Mi nei hei kandih kapwm kaipouc tuang siamruai sw khang Ravguangc rui kapahlouna thauh teyloumeipu nei e.”