Read Rongmei Naga ZEKARIA 8 Bible Online

ZEKARIA 8 - Rongmei Naga bible

ZEKARIA 8

¹Ngamparymei RINGHPOUC rui mi lat hei Zekaria khou tiguang the:

²“Ai Jerusalem ta nkhavlou nii e kalam thu ai kamei nunc ta nzian e, kata nzianmei zaeng rui kata zauczihmei nunc ruc khou mai patna alungpuamc the.

³Jerusalem atuang nthanmei kaidai khou guang datna khou tei ai lungc bam puni. Mi ta tei lwmnuhmei kaidai twna thay puni, khatni Ngamparymei RINGHPOUC tuang chyngbut tei Nthanmei chyngbut twna kaw puni.

⁴Builwang nsunna tat bammei karapouc karapeic mpeyna mi kaidai tuang chaengluang guay khou bam padik bam dat puni.

⁵Khoutei chaengdai guay khou ntumei nac nggaanvmei nac nunc rui palup padik bam dat puni.

⁶“Ntaw bammei meicsaek meicdaek nunc khang mi hei guangtangc lak nimei lat kumc puni e, tiki mi hei akhang thu ngam makmei tuang hamh e.

⁷Ai rui amei nunc ta kaniw ta laa tat kanmei kandic guay khou tei rui kanlou dat puni,

⁸kumna neihpat neihkey thangc rui Jerusalem khou phungc guanglou datna kaniw hei amei nunc sw puni khatni ai hei kaniw tuang Racguangc sw puni. Khou kiu kaniw ta lwmnuhmei swna khatni nchumhna sin puni.

⁹“Bauc o! Kalam thu Ravkai tei kasiamh thau dat khang kaibamv thwan kahouh bammei douc tei muhzwng nunc rui sa kanmei lat kahak tei nangniw ntaw ni chu bam the.

¹⁰Mi hu khou tei meic gaanv khat na sini maansei khang pwni khouringh khang pwni kaphy tii ngam lak khwan e. Khatni meic gaanv khat na sini kaniw ta zauczihmei nunc khou rui kadan makna bam ngam mak khwan e. Ai rui meic nunc ta kaniw khat lev khat ta howthou khang tiswlou khwan e.

¹¹Tiki ntaw thu meicsaek meicdaek nunc ti hei reynungc tei kumcna sw dat ni tuang hamh the.

¹²Kaniw tei suc-rih ping makna kailau taancna lungc puni the. Kaniw tuang drakhaluai nthai dat puni the, kandih rui nap-bi tiipat dat puni the, khatni tingdui riu chuyna riu key dat puni the. Ai rui mi suaihiam guay hei nsaekcloumei amei nunc khou tiilou puni the.

¹³Juda khatni Isaraelmei nunc! Tat kanmei ganv khou tei zaatc baihmei nunc rui ‘Juda khatni Isaraelmei khou keylou kanmei kamut kamaimei tei nang khou key kan diu,’ twna kaniw khat khat ta syang bam khwan e. Tiki ai rui nangniw ta kanlou dat puni the, kum pwkhou kiu mi zaatc baihmei nunc tei Juda khatni Isaraelmei khou tiiloumei suaihiam tei nangniw khou tiilou pw diu o, twna khat khat khou sa dat puni the. Hei zaeng rui bauc tho, ping dat ri tho.”

¹⁴Ngamparymei RINGHPOUC rui sa the, “Nangniw pupouc nunc rui alung tipuamclou pwkhou, ai rui kaniw ruc khou tiguang ni the twna dingloumei sw kamut kamaimei tei, alung kalaic datmei tuang maekna tiguang kan the.

¹⁵Tiki ntaw thu ai rui Jerusalem khatni Judamei nunc ta suaihiamlou khang alung ding the. Hei zaeng rui ping dat ri tho.

¹⁶Nangniw rui sw nimei kiu mi hei the: Khat lev khat khou nchumhmei lat sa o. Latzan kai khou nchumhna latzan sw o, nchu-nzaengh khang sw o.

¹⁷Khat lev khat ta sw kasic khang sw riu. Nkhuaina syangdyng swna sakhi sw riu. Lat saraamhmei, nchumh makmei, khatni meicngam meicliammei taanv ta ai karaeng e.”

¹⁸Ngamparymei RINGHPOUC Ravguangc rui mi lat hei Zekaria khou tiguang the:

¹⁹“Padeihmei, panguhmei, chaneimei, khatni ruhmei bw khou munthiangc bammei tei Judamei nunc khang neihla zaenggaymei tuang khum ngay sw dat puni the. Kumhpui zaeng rui nangniw nchumhmei khatni nchu-nzaenghmei ta kahaw nina e.”

²⁰Ngamparymei RINGHPOUC rui sa the, “Kaidai mpeyna khou rui meic nunc Jerusalem khou guang nimei ganv guang the.

²¹‘Aniu Ngamparymei RINGHPOUC ta kalum khang khatni katuang suaihiam ney khang tat puni the. Khei o, aniw thei lay la tho!’ twna kaidai akhat khou mei nunc rui kaidai baihmei akhat khou mei nunc khou sa puni the.

²²Zaatc mpeyna khatni pumtan naimei zaatc nunc ni Ngamparymei RINGHPOUC ta Jerusalem khou guangna kalum puni khatni kasuaihiam ney puni.

²³Mi ganv khou kiu zaatc baihmei gaanv ruh rui Jihudimei gaanv khat ta kapheytin zamcna, ‘Aniw nang thei lay tat nii e, kalam thu Ravguangc nangniw pang khou bam e twmei chu e,’ ” twna sa puni.