Read Rongmei Naga MALAKAI 1 Bible Online

MALAKAI 1 - Rongmei Naga bible

MALAKAI 1

¹Mi hei Isaraelmei nunc khou salou khang Ravguangc rui Malakai khou tii guangmei lat re.

²“Ai nangniw ta nzian tanh tan bam e,” twna RINGHPOUC rui kamei nunc khou sa e. Tiki “Nang rui akumhna aniw ta nzian bamna cho?” twna sa daw e. RINGHPOUC rui kumna daw e, Esau lev Jakob hei chana e, tiki ai rui Jakob kakik kata ta nzian e,

³tiki Esau khatni kakik kata ta ai karaeng the. Ai rui Esau tuang chyngramv tei nsa ramv tiswlou the, kumna mi ramv tei nwmbangc khouringc bamv khang ganclou the.

⁴Esau kikta, Edommei nunc rui “Aniw tuang kaidai guay sw kamut kamailou the, kum bam sini aniw rui hei tei kasiamh thau dat puni,” twna sa pw e thei, RINGHPOUC rui kumna daw dat puni, “Kaniw kasiamh thau dat bam sini ai rui mi guay tei rakey dat puni. Meic nunc rui kaniw ta ‘meicsi meicroucmei kandic’ khatni RINGHPOUC lungpuam keyloumei zaat” twna kaw puni.

⁵Isaraelmei nunc rui mi hei kaniw mik kahak rui how puni, kumna “RINGHPOUC hei Isarael kandic paengc thangc sini kangamv daicna bam e!” twna kaniw sa puni.

⁶Ngamparymei RINGHPOUC rui amuh nunc khou sa e, “Kanac rui kapu ta chakhwang sw e, khatni bangh rui kakaipouc ta chakhwang sw e. Ai hei nangniw pu e tabui swna nangniw ata chakhwang sw mak tu cho? Ai hei nangniw kaipouc e tabui swna nangniw ata chakhwang sw mak tu cho? Nangniw ata ramhsak mak khe, kumlana ‘Akumhna aniw nang ta ramh sak makna cho?’ twna sa dat re.

⁷Mphuammei puat atuang ravchapaeng khou katna bammei tei ata ramh sak makmei taanv e. Kum bam lana ‘Akumhna aniw nang ta chakhwang sw makna?’ twna daw bam e. Atuang ravchapaeng ta chakhwang sw makna bammei tei ata chakhwang sw mak tuang e.

⁸Nangniw rui akhang kamik tiatmei, kaphay baumei, nsuan-simei khouringc kat bammei hei nkhuaimei tuang maek ge twna nangniw ningna cho? Mi kumhmei khouringc tei guanghkhyn khang tii zauc o! Kaniw hei tei pianna nangniw ta zauc nzianlou puni dai?”

⁹“Amuh nuncle, hei kumhmei tuang puatkat tei katna Ravguangc tuang zauzian ney zauh o, kamei rui laalou puni dai cho?” twna Ngamparymei RINGHPOUC rui sa e.

¹⁰Ngamparymei RINGHPOUC rui kumna sa e, “Atuang ravchapaeng khou nsa mai sw bam mak khang thowkumhmei gaanv khat rui ravkai kaikhamv mbanghlou kan e thei gay ni e. Ai nangniw ta pian mak ge; nangniw rui akhang katmei puatkat tei ai laa mak ge.

¹¹Kandih kwn padeih rui ata chakhwang champouhna bam e. Kabamv kathuicna khou kaniw agaw nteina nthanmei puatkat khaeng bam e, kaniw kaguayna rui ata chakhwang swna bam e!

¹²Atuang ravchapaeng hei nsa de twna ningna malamei puat khaengna nangniw ata thouh sw makmei tuang sw the.

¹³‘Aniw liat lak khe!’ twna nangniw sa the kumna nangniw chy maleclou the. Houc guangmei khouringc, kaphay bau, suanbaengmei khouringc akhang katloumei ai rui laalou puni de twna nangniw ningna cho?

¹⁴Akhang tii ni twna nrianhloumei khouringc gaymei kakhouringc pang khou nai lana, laalou nuh makmei khouringc khaeng bammei meic guatmei nunc khou tei syang nai diu tho! Kalam thu ai hei guangh daihmei e, kumna zaatc kapwmna rui ata ping bam e.”