Read Rongmei Naga MALAKAI 2 Bible Online

MALAKAI 2 - Rongmei Naga bible

MALAKAI 2

¹Ngamparymei RINGHPOUC rui amuh nunc khou sa e, “Mi latdanv hei nangniw khang e:

²Nangniw taanv rui nangniw ata chakhwang sw nina e. Ai rui samei hei nangniw chulou mak ge thei asiang nangniw khou keylou puni khatni nangniw tuang suaihiam khou tei sianglou puni; nangniw rui atuang latdanv ta thouh sw makmei zaeng rui ai rui mi khou tei siang ni sianglou kan the.

³Ai rui nangniw nac nunc ta dandi tii puni khatni nangniw rui khaengmei khouringc nunc gankui phakloumei khou tei nangniw zaw zay sap kariulou puni, kumna nangniw ta bav zungc khou tei zaypatlou puni.

⁴Heikum pwkhou kiu, ai lev Levi kikta amuh nunc kak khou swloumei latdyng tei sw bak mak khang rui mi latdanv tei ai rui tiimei tuang e twmei nangniw thay puni.

⁵“Atuang latdyng khou tei ai rui kaniw khang ringhmei khatni lungcgay amanvmei nrianhlou the, kumna kaniw rui ata chakhwang sw bam diu khang rui ai rui kaniw khang hei tei tiilou the. Kalam thu mi douc tei kaniw ta chakhwang sw e khatni ping e.

⁶Kaniw nchumhmei dinc e, kaniw mwang khou rui laanhmei pat mak ge. Kaniw ai lev lung akhat na swna lungc e; kaniw kakhang khang na nchumhna lungc bammei tei na hamhna, meic baihmei mpeyna ta ni simei khou rui ti-ngalanc guang e.

⁷Amuh nunc tuang thouc kiu Ravguangc tuang nchumhmei lat dinc bam khang e. Achwn thanv khang meic nunc rui kaniw khou guang bam nimei tuang e, kalam thu kaniw hei Ngamparymei RINGHPOUC tuang latpaumei nunc e.

⁸“Tiki amuh nunc, nangniw ntaw thu nchumhmei chaeng khou rui tat mbiangh kan the. Nangniw latdyn rui meic mpeyna ta tiphaysuy the. Ai nangniw lev sw kanmei latdyng tei nangniw sw bak the.

⁹Hei zaeng rui, Isaraelmei nunc rui nangniw ta mala khang tiswlou puni the, kalam thu nangniw achwn piu mak khe, khatni nangniw tuang latdyn khou tei zawkhu zawru sw the.”

¹⁰Aniu hei pu akhat na nac nunc hamhna cho? Aniu kaguayna ta Ravguangc akhat na rui damclou tu hamhna cho? Kum e tw e thei tabui swna aniu khat lev khat khou latdyng sw bak bam tu cho, khatni tabui swna Ravguangc rui aniu pupouc khou tiiloumei latdyng tei thouhsw makna bam tu cho?

¹¹Judamei nunc kaniw rui Ravguangc khou swlou kanmei latdyng tei kaniw sw bak the kumna Jerusalem khou khatni kakandih kabamv kathuic khou karaeng kadangmei taanv taanc the. RINGHPOUC rui nzianmei Ravkai ta tei kaniw rui swtanac the. Rav baih baihmei ta kalummei luc nunc ta kaniw kaw laa the.

¹²Thow pwni heikumna sw bammei guay ta RINGHPOUC rui Isaraelmei pang khou rui laa ganclou pw diu. Isaraelmei aniu rui Ngamparymei Racguangc khou puatkat phungc guangmei khou tei kaniw kazauh dat mak kan diu o.

¹³Nangniw rui heikumna ni sw bam dat di he; Mi kiu thu nangniw rui RINGHPOUC khou phungc guangmei puatkat tei kamei rui laalou dat timakna kaucna nangniw mikdui rui RINGHPOUC tuang ravchapaeng thum the.

¹⁴Tabui swna kamei rui hei tei laalou dat mak tu cho twna nangniw thanv bam e. Hei tei nangniw chabwan sw bammei douc kawmei now khou nrianhloumei latdyng tei nangniw sw bakmei tei kamei thay e. Nangniw now tei ringhting khaamv e tiki nangniw rui Ravguangc hu khou kakhou swloumei nowsuanh latdyng tei sw bak dat the.

¹⁵Ravguangc rui nangniw ta pumh khat bumaengh akhat na tiswlou tu hamhna cho? Heikumna kamei rui swloumei hei tabui lam khang cho? Mi hei Ravguangc tuang meic ling swmei nangniw kikta lungcpat khang e. Hei zaeng rui nangniw gaanv khat na sini kanow khou swlou kanmei latdyng tei sw bak riu.

¹⁶RINGHPOUC Isaraelmei Racguangc rui sa e, “Now mumei ta ai karaeng e. Mi kumhmei zauzian maekmei taanv kaniw khou taanhmei ti hei ai karaeng e. Now khou lwm nuhmei sw ni de twna dinglou kanmei latdyng tei swbak dat mak khang ramh thay o.”

¹⁷Nangniw latsa rui RINGHPOUC ta tiryanra the, “Akumhna aniw rui kata tiryanrana?” twna nangniw sa e. “Simei taanv taanhmei guay tei gay e twna Ngamparymei RINGHPOUC thu kakhanh e; hei tei kamei kahaw e,” twna sa bammei lat tei rui the. “Nchumhmei Ravguangc kiu tabui thangc naina cho?” twna thanv bammei latthanv hei rui the.