Read Rongmei Naga METTHIU 10 Bible Online

METTHIU 10 - Rongmei Naga bible

METTHIU 10

¹Kamei rui kaziap ruhna kanei ta kaw patna simei bumaengc guay ta nthau ganh khang khatni ravpuat guay khatni sunu guay tigay khang kaniw khou ngamv tiilou the.

²Latdiutatmei ruhna kanei zanc kiu mi hei e: reymei khou, Pitar twna kawmei Simon khatni kakainac Andriu; Zebedi nac Jakob khatni Jahon;

³Philip khatni Bartholomiu; Thomas khatni dihkhav kakhamei Metthiu; Alphia nac Jakob khatni Thaddia;

⁴Kananai kawmei Simon khatni Jisu ta zuanctumei Juda Iskariot.

⁵Mi ruhna kanei ti hei Jisu rui ndiulouna, kaniw khou mi kumcna kadylou the: “Nangniw Zentelmei khou tat riu, Samariamei tuang kaidai guay khou ni tat riu;

⁶tiki maan kanmei lauziu—Isaraelmei khou tat ro.

⁷Nangniw tatna, ‘Tingkauh guangcdic ana the,’ twna dinc tat ro.

⁸Nnaumei ta tigay o, theihmei ta tiringcthau o, mphaanhmei ta tigay o, ravsic guay ta nthau ganc o. Nangniw kamanv tii makna laa the, kamanv laa makna tii o.

⁹Nangniw bungkam khou syan—kachaekc tuang ni, daandi tuang ni, kuanri tuang ni phungh riu.

¹⁰Nggin khau ni phungh riu; thiula saplai lev phaythuapc ni phungh riu; builwang ni sin riu. Taanv taanhpui mei khang thu kabung khang tiilou puni.

¹¹“Kaidai khou pw ni, namv khou pw ni, nangniw gut pwkhou, nangniw bangvloumei kai khang phu o, kumna nangniw tat dat mak saanv mi kai khou tei bam o.

¹²Mi kai khou tei nangniw gut pwkhou chuzaenghmei suaihiam suaiclou o.

¹³Mi kai tei nangniw ta riulou e thei, nangniw tuang chuzaenghmei tei mi kai khou tei nai bam kan diu; tiki nangniw ta riulou mak ge thei nangniw tuang chuzaenghmei tei nangniw khou hanc guang dat kan diu.

¹⁴Nangniw ta laalou mak ge thei khatni nangniw lat nkinglou mak ge thei, nangniw mi kai khou tei rui hamh e thei mi kaidai khou tei rui tat pat dat ni khou, nangniw phay niang tei kadiw keylou ducna tat ro.

¹⁵Ai rui nangniw khou kaling siakna sa tuang e: latzan tingmik nungc kiu mi kaidai tuang latzan tei Sodom lev Gomora tuang latzan suangc nrit puni.

¹⁶“Zauclo, nangniw ta, lauziu ta angiw pang khou ndiulou kumc ndiulou tuang e. Hei zaeng rui nangniw nrui kumc ntak nrak go khatni akhouhna kumc nriakc go.

¹⁷Nangniw suriak thay o; meic nunc rui nangniw ta peikai khou tiilou puni khatni kaniw tuang sinagog khou bai puni.

¹⁸Alam khou rui nangniw ta guanghkhyn nunc khatni guangh nunc hu khou zay guang puni. Hei tei rui kaniw khou khatni Zentelmei nunc khou nangniw alam khou dinclou khang e.

¹⁹Kaniw rui nangniw ta latzan bamv khou zay guang pwkhou, tabui lat sa nina cho khatni tabui kumhna sa nina cho twna lungh katuakc riu. Nangniw sa nimei lat kadyng khou tiilou puni.

²⁰Kalam thu, nangniw rui sa nina hamh e; nangniw Pu tuang Bumaengc tei rui nangniw ta tisa nina de.

²¹“Chana rui kachana ta, khatni pu rui kanac ta swluai khang tii pat puni. Nah nunc rui kapui kapu ta akhangv adangvna swluai puni.

²²Nangniw ta meic guay rui, azaeng rui karaeng puni, tiki katwan nganvna khaengv ngampui mei ta tei kanlou puni.

²³Nangniw ta kaidai akhat khou rai pw e thei, baihmei kaidai akhat thangc pak tat ro. Ai rui nangniw khou kaling siakna sa tuang e: Meic Nac Mpouh guang makmei hu khou nangniw Isarael tuang kaidai guay khou taanc liklou ngam ni tu hamh e.

²⁴“Ziap akhat tei kata nchamloumeipu suangc mbu mak ge; bangh tei ni kakaipouc suangc mbu mak ge.

²⁵Ziap akhat tei kata nchamloumeipu khatni bangh tei kakaipouc kumc e thei biuc the. Tamvpypouc ta Bilzebul[9] twna kaw e thei, kakai kaikhunhmei nunc ta thu mi suangc adih sina kaw puni tha!

²⁶“Hei zaeng rui, kaniw ta ping riu. Ntaw gum binlou bammei hei laanc pat pu ni, khatni nkamhlou bammei hei ndauh pat puni.

²⁷Ai rui nangniw khou zingh khou saloumei hei, nangniw kalaanv gaanh khou sa nina e; nangniw nukuanc khou suaina saloumei hei, kainam khou rui kauc nina e.

²⁸Meic pumc ta swluai ngam sini bumaengh ta thu swluai ngam makmei nunc ta tei ping riu; tiki pumh ta ni bumaengh ta ni maikwam khou swmaan ngammeipu ta ping o.

²⁹Tingkavna kanei manv paic akhat na hamhna cho? Kum sini, nangniw Pu rui nuhloumei maekna tingkavna akhat na sini kandih khou taek key ni tu hamh e.

³⁰Nangniw ta thu nangniw tuang sam lu guay nganv kasing chaklou bam tuang de.

³¹Hei zaeng rui, ping riu; nangniw thu tingkavna mpeyna khang suangc sini kamanv kunghmei de.

³²“Thowkumhmei, kamei amei e twna meic nunc hu khou sa ndauhpui mei ta tei, ai rui ni tingkauh thangc bammei aPu hu khou kata amei e twna sa puni.

³³Tiki meic nunc hu khou kamei amei hamh e twna sapui mei ta tei, ai rui ni tingkauh thangc bammei aPu hu khou kamei amei hamh e twna sa puni.

³⁴“Ai guangmei hei kandih khou chuzaenghmei phungc guang tuang e twna ning riu. Ai guangmei hei chuzaenghmei phungc guang khang hamh e; suc-rih phungc guang khang de.

³⁵Kalam thu ai guangmei hei kanac lev kapu kak khou, kanac aluh lev kapui kak khou, kamauc lev kaneic kak khou tizauczihlou khang de.

³⁶Kaikhunh akhat na khou khat khat ta zauczih puni the.

³⁷“Ata suangc kapui kapu ta nzian mbupui mei tei amei sw khang biuh mak ge; ata suangc kanac mpouh aluh ta nzian mbupui mei tei amei sw khang biuh mak ge.

³⁸Khatni katuang kros phungcna athei lay makpui mei tei amei sw khang biuh mak ge.

³⁹Thow pw ni karingcpaan daekloupui mei tei, hei tei maan puni; tiki thow pw ni akhang rui karingcpaan maanloupui mei tei ringhpaan laatow puni.

⁴⁰“Nangniw ta laaloupui mei tei ata laalou tu e, khatni ata laaloupui mei tei ata ndiu guangmeipu ta laalou tu e.

⁴¹Muhzwng akhat ta muhzwng e twna laaloupui mei tei muhzwng tuang swan lay laa puni, khatni ravchaptatmeipu ta kamei ravchaptatmei e twna laaloupui mei tei ravchaptatmeipu tuang swan lay laa puni.

⁴²Mi nthyammei nunc ti hei sini kamei aziap be twna duichu buangc sini tiiloupui mei tei, ai rui kaling siakna sa tuang e: Katuang swan khat sini maan lak ge.”