Read Rongmei Naga METTHIU 12 Bible Online

METTHIU 12 - Rongmei Naga bible

METTHIU 12

¹Kaganv akhat khou Jisu Sabbathneic laupuk khou tat ruan pat khwan e. Kaziap nunc tei ndaapc khwan the, kumna gehu chuncna tu thau khwan the.

²Hei tei Pharisimei nunc rui how lana Jisu khou, “Zauclo, nang ziap nunc Sabbathneic taan nupui taanv taanc bam e,” twna sa the.

³Khoutei Jisu rui kaniw khou sa the, “David khatni kamei nunc tei ndaapcpui ganv khou David rui tabui sw kan tu cho twmei hylou bammei tei nangniw pah makna cho?

⁴Akumhna kamei Ravguangc kai khou gutna amuh nunc na hamhna kamei ni, kamei nunc ni tu numei khaengloupui tyan tei tu kan tu cho?

⁵Sabbathneic ravkai lungc khou bammei amuh nunc rui Sabbathneic ngaek mak sini nkhuai mak ge twmei nangniw Riakdanv khou tei pah mak he nah cho?

⁶Ai rui nangniw khou sa tuang e: Ravkai khang suangc daihmei mi khou hei bam e.

⁷‘Ai kahawmei thu zauzian ta de, khaengmei ta hamh e,’ twna samei kabac hei nangniw thay khwan e thei, kakhuay maekmei nunc ta nkhuai e twna nangniw sa bam lak ni tuang e.

⁸Kalam thu, Meic Nac Mpouh hei Sabbathneic tuang kaipouc e.”

⁹Jisu mi bamv khou tei rui tat pat lana kaniw tuang sinagog khou gut khwan e.

¹⁰Kumna zauclo, mi khou tei kabaanc kabiak khat theihmeipu gaanv khat bam khwan e. Khoutei, “Sabbathneic tigaymei hei kariak thei layna nuh ni nuh mak cho?” twna kaniw rui Jisu khou kakhuay phuna thanv khwan e.

¹¹Khoutei Jisu rui kaniw khou sa the, “Nangniw thowkumhmei tuang lauziu akhat Sabbathneic khunh khou keylou bam e thei, kamei hei tei zay thau dat pu lak nah cho?

¹²Kum e thei, maansei hei thu lauziu khang suangc adih kungc kan tha? Hei zaeng rui, Sabbathneic gaymei taanv taanhmei hei kariak thei layna nkhuai mak ge.”

¹³Khoutei Jisu rui mi pu khou tei, “Nang baanc ntyng pat ro,” twna sa the. Khoutei kabaanc ntyng pat the. Kumna kabaanc akhat tei kumcna gay dat the.

¹⁴Khoutei Pharisimei nunc tei tat pat lana Jisu ta swluai khang kaphianh the.

¹⁵Hei tei thay lana, Jisu mi khou tei rui tat pat kan the. Khoutei meic mpeyna kathei lay tat the, kumna kamei rui kaniw guay ta tigaylou the.

¹⁶Kalam khou rac tat nuh mak ge twna kaniw khou kadylou the.

¹⁷Mi hei muhzwng Isaia khou mi kumcna saloumei tei guang tangh khang the:

¹⁸“Zauclo, ai rui kapahloumei abangc ta, ai pianmei ai nzianmeipu ta. Ai rui kakhou abumaengc tiilou puni; kamei rui zaatc guay khou, nchumhmei latzan kauc ndauh puni.

¹⁹Kamei agina ni kaucna ni bam ni tu hamh e; Meic gaanv khat na sini, kakhwan chaengdai khou chu ni tu hamh e.

²⁰Buap bammei ntou bang ta kamei sw bau ganc lak ge; khou luih lui na bammei mairiang ta kamei sw amit ni tu hamh e, kamei rui nchumhmei latzan rui tingamlou mak saanv;

²¹kumna zaatc guay rui kakhou lwmlou bam puni.”

²²Mi tangv kamik tiat, lat sa thay mak twmei, ravsic gutmeipu gaanv khat ta Jisu daeng khou phungc guang khwan e. Jisu rui tigaylou tina mi pu tei lat sa dat the khatni how dat the.

²³Khoutei meic guay tei ngak the, kumna “Kamei hei David Nac Mpouh kiu lana the ny?” twna sa the.

²⁴Pharisimei nunc rui hei tei chu lana, “Mi pu hei rui ravsic nunc ta nthau patmei hei ravsic guay tuang kaipouc Bilzebul ngamv rui de,” twna sa the.

²⁵Jisu rui kaniw lungning tei thay lana kaniw khou sa the, “Kalangv patna khat khat ta howthou kanmei guangcdic tei mut re, khatni khat khat ta howthouna kalangv pat kanmei kaidai hamh e thei kaikhunc tei ding ngam ni tu hamh e.

²⁶Kumna Seitaan rui Seitaan ta nthau pat re thei karana kata sw bak the; kum e thei akumhna kaguangcdic ding ngam nina cho?

²⁷Ai rui Bilzebul paan rui ravsic nunc ti hei nthau pat tuang e thei, nangniw nac nunc thu tabui paan rui ravsic nunc ta nthau ganh tu cho? Hei zaeng rui kaniw rui nangniw tuang latzanpouc nunc sw puni the.

²⁸Tiki ai rui ravsic nunc ta nthau ganhmei hei Ravguangc tuang Bumaengc rui e. Mi rui lyanmei thu Ravguangc guangcdic nangniw khou guang tangc the twmei tuang e.

²⁹“Hamh e thei kapumc tanhmei meic gaanv khat kai khou gutna kai nuam ni tw e thei, kapumc tanhmeipu ta tei karakclou rey mak ge thei kakai gut ngam mak ge. Karakclou rey tang khou rui kakai nuam nina de.

³⁰“Abiak liangh makpui mei tei ata howmumei e, khatni ai khuam kaduaimei khou kazauh makpui mei tei hac ganhmei nunc e

³¹Hei zaeng rui ai rui nangniw khou sa tuang e: Meic nunc paap guay khatni Ravguangc ta sa kasicmei[12] guay tei kuaklou nuh de. Tiki Bumaengh ta sa kasicpui mei ta tei thu kuaklou mak ge.

³²Meic Nac Mpouh ruc khou sina samei ta tei thu kuaklou nuh de, tiki Bumaengh Nthanmei ruc khou sina samei ta tei thu ntaw ni, guang nimei zuk thangc ni, kuaklou dat mak khe.

³³“Kabang tei karav gay ti thei kathai gay the; kabang tei karav si ti thei kathai si the. Kabang ta tei kathai khou tei rui thay the.

³⁴Nangniw nrui nac nunc! Nangniw sina akumhna gaymei lat sa ngam nina cho? Kalam thu lungning khou padikna naimei khou tei rui mwang rui sa pat tuang e.

³⁵Meicgaymeipu tei katuang gaymei lanvkhuk khou rui gaymei nrou pat re, khatni meicsimeipu tei katuang simei lanvkhuk khou rui simei nrou pat re.

³⁶“Ai rui nangniw khou sa tuang e: Latzan tingmik nungc kiu meic nunc rui kakhanh makna saloumei lat kathuic lam tei ni kaniw daw dat puni.

³⁷Kumna nang tuang lat thei layna nang ta latzan sw puni.”

³⁸Khoutei mundawna Riakdanv dinhpouc nunc khatni Pharisimei gaanvsaekc rui Jisu khou, “Dinhpouc, sw-nchinmei taanv akhat taancloumei ta aniw kahaw e,” twna sa the.

³⁹Khoutei mundawna kamei rui kaniw khou sa the, “Meicsimei khatni ravchap tat makmei mei nunc hei rui sw nchinmei ta phu e. Muhzwng Jona khou swlou kanmei sw-nchinmei tei hamhna baihmei sw-nchinmei lyanlou ni tu hamh e.

⁴⁰Jona tei khavdaih bung lungc khou zingbangc kathumh kalaanv kathumh bam kanmei tei kumcna, Meic Nac Mpouh hei zingbangc kathumh kalaanv kathumh kandih lungc khou bam puni.

⁴¹Ntaw kin tuang mei nunc ti hei latzan sw pwkhou Ninevemei nunc thauna mi meikin ti hei nkhuaimei e twna sa puni; kalam thu kaniw thu Jona rui latdinc pwkhou lungh laic kan the. Kumna zauclo, Jona khang suangc daihmei mi khou hei bam e.

⁴²Mi meikin ta latzan swpui nungc kiu, dihba thangcmei liammavpui thauna mi meikin ti hei nkhuaimei e twna sa puni. Kalam thu kamei Solomon tuang ningting tei nking khang kamei kandih tin thangc rui guang khwan e. Kumna zauclo, Solomon suangc daihmei mi khou hei bam e.

⁴³“Nthan makmei bumaengc akhat meic gaanv khat khou rui tat pat lana, zaeng nthaekcloupui bamv khang phuna dui maekpui bamv khou ruan tat the, tiki phu tow mak pwkhou,

⁴⁴‘Ai tat patmei akai khou tei hanc guang dat ni the’ twna sa the. Kumna kamei guang pwkhou mi kai tei gey nthanlouna, lunghpui nanw lou chuy rih rina kairaeng ding bammei ta ariw the.

⁴⁵Khoutei kamei tat lana kakhang suangc simei bumaengc chanei ta nduangh guangna mi kai khou tei gut lungc the. Kumna mi pu tuang nkhamhmei lwnlung tei rey khou lwnlung khang tei suangc si the. Mi simei meikin khou hei ni mi hei kumcna guanglou puni.”

⁴⁶Jisu rui meic kangdai khou tei lat sa bam khou, kapui lev kachana nunc kata kachuc niina kaizaeng khou ding bam khwan e.

⁴⁷Kumna meic gaanv khat rui kakhou, “Zauclo, nang pui lev nang chana nunc nang ta kachuc niina kaizaeng khou ding bam e,” twna sa the.[13]

⁴⁸Mundawna Jisu rui mi pu khou tei sa the, “Thow tei apui cho? Thow tei achana cho?”

⁴⁹Khoutei kaziap nunc ruc khou kabaanc haamv patna sa the, “Zauclo, apui khatni achana nunc kiu mi hei the.

⁵⁰Kalam thu tingkauh thangc bammei apu rui ningmei taanhpui mei tei achana the khatni apui the.”