Read Rongmei Naga METTHIU 13 Bible Online

METTHIU 13 - Rongmei Naga bible

METTHIU 13

¹Mi nungc tei Jisu mi kai khou tei rui tat pat lana Galili zeiclat paengc khou dungckey the.

²Khoutei meic kangdai kadaeng khou huamc guang ti khou kamei hih akhat khou gutna dungc the; kumna meic kangdai tei dui paengc khou tei ding bam the.

³Khoutei kamei latgiam swna lat mpeyna dinclouna sa the: “Zauclo, lau taanhmeipu gaanv khat napphwn nrou khang tat pat the.

⁴Kamei rui nrou pat khou, nap thw asaekc chaengluang khou keylou the, kumna nruayna nunc guangna hei tei khuaic tu kan the.

⁵Baihmei asaekc rui taniang geih makmei ntauh rou ding khou keylou the, kumna taniang chalah tipui zaeng rui katumcna kak pat the.

⁶Tiki neih suc pat pwkhou mi bwan nunc ta tei nggaan the, kumna kamaan zangc key ti mak khena, hei tei theic kan the.

⁷Napthw asaekc sauh bwan ding khou keylou the, kumna sauh bwan pang tei daic thauna zyn luai the.

⁸Asaekc rui kandih gaymei khou keylou the, kumna kathai nthai the. Ngguay asaekc rui kathw phay khat, asaekc rui riakcharuk, asaekc rui tamruc nthai the.

⁹“Nukuanc naimei kathuic chu kan diu.”

¹⁰Khoutei kaziap nunc tei Jisu daeng khou guangna sa the, “Tabui swna nang kaniw khou latgiam swna sa tu cho?”

¹¹Khoutei kamei rui mundawna sa the, “Kalam kiu thu, Ravguangc guangcdic tuang ntheihloumei tei nangniw thay khang dinclou tuang e, kaniw khou thu hamh e.

¹²Kalam thu, asaekc naipui mei khang tei, liamh laihna nai khang tiilou puni; tiki khat sini maekpui mei khang tei thu, kakhou katitna naimei tei sini laa pat kan puni.

¹³Kaniw howna howna how makpui zaeng rui, chuna chuna chu makpui zaeng rui, khatni kabah thay makpui zaeng rui, kaniw khou latgiam swna sa tuang e.

¹⁴‘Kaniw chuna chuna kabah thay mak puni; Kaniw zaucna zaucna how mak puni. Kalam thu kaniw lungning mpang the, kaniw nu nkat ngam the, khatni kaniw mik ni tiat ngam the, hamh e thei kaniw mik rui how ni tuang e, kaniw nu rui chu ni tuang e, khatni kaniw lungning rui kabah thay ni tuang e, kumna kaniw akhou hanc guangna, ai rui kaniw ta tigaylou ni tuang e,’ twna Isaia rui dinc kasuakcloumei tei kaniw khou guang tangc the.

¹⁵

¹⁶“Nangniw thu adih sangay cho! Nangniw mik how the, nangniw nu chu the.

¹⁷Ai rui nangniw khou kaling siakna sa tuang e: muhzwng nunc khatni ravchaptatmei nunc mpeyna nangniw howmei hei how nii khwan e, tiki kaniw how tow kan mak khe khatni nangniw chumei hei chu nii khwan e, tiki kaniw chu tow kan mak khe.

¹⁸“Hei zaeng rui, napphwn nroumei latgiam kabac hei nking o.

¹⁹Guanghdic tuang latdyn hei chu laki kabah thay makpui mei khou tei rui kalungc khou nrouloumei lat ta tei simeipu rui guangna laa tat kan the.

²⁰Ntauh rou ding khou keyloumei thw kiu thu, lat tei chupui lev neihlana laaloupui mei tei e.

²¹Tiki hei tei kalung syng khou laalou mak ge, kumna hei tei tingsaengh mak ge. Kumna lat zaeng khou tei rui ryanramei hamh e thei rai riumei guang pwkhou kamei hei tei mpat dat nuangc the.

²²Sauh bwan ding khou keyloumei kiu thu, kamei lat tei chu the, tiki mi panty khang kapaamvmei khatni lanv ta kahawmei rui lat ta tei zyn luai the. Kumna lat tei kathai nthai mak khe.

²³Kandih gay khou keyloumei thw kiu thu, lat tei chu lana kabah thaypui mei ta tei e. Kaniw kathai nthai e—asaekc rui kathai phay khat, asaekc rui riakcharuk, khatni asaekc rui tamruc nthai e.”

²⁴Jisu rui kaniw khou latgiam baihmei akhat sa dat re, “Tingkauh guangcdic hei, mi hei kumh tuang e: Lau taanhmeipu gaanv khat rui kalaupuk khou gaymei napphwn nroulou the. 1

²⁵Meic nunc zip kan khou, kata zauczihmeipu gaanv khat guangna gehu ding khou tei napriak thw nroulou ducna tat kan the.

²⁶Mi bang nunc tei thau patna kagwam ngguam pwkhou napriak tei how pat the.

²⁷“Khoutei kabangc nunc kaipouc khou tei guangna, ‘Kaipouc, nang tuang laupuk khou gaymei napphwn nroulou kan tu hamhna cho? Napriak bang nunc hei thu tabui thangc rui cho?’ twna sa the.

²⁸Khoutei kamei rui kaniw khou sa the, ‘Mi hei ata zauczihmei rui swlou tina the,’ Khoutei bangh nunc tei rui, ‘Kum e thei aniw tatna napriak bang guay tei phuai ganclou o cho?’ twna thanv the.

²⁹Tiki, ‘Phuai ganc nangh e, napriak bang phuai khou rui gehu bang ni phuai pat puni de,’ twna daw the.

³⁰‘Lau tay mak saanv thau kariu bam kan di tho. Mai ntei khang napriak guay tei khuam kaduaina bang rey tho kumna gehu guay tei thu saamh khou laa guanglou tho,’ twna lau tay pwkhou ai rui lau taymei nunc khou sa puni.”

³¹Latgiam baihmei akhat ni Jisu rui kaniw khou sa dat re: “Tingkauh guangcdic hei laupuk khou nrouloumei gannaeng thw tei kumh tuang e.

³²Mi thw tei ramh thw pang khou nthyam liangmei bam khwan sini, hei tei thau pwkhou thu laupuk khou thaumei bang guay pang khou hei tei daic liangmei thing bang mbaih the. Kumna nruayna nunc rui kachy khou kabou guang duanv the.”

³³Baihmei latgiam ni Jisu rui kaniw khou sa the: “Tingkauh guangcdic hei meicpui akhat rui zousunc giupaekc kathumh laa lana mi guay tei puang thau khang loumei khay tei kumh tuang e.”

³⁴Jisu rui meic nunc khou mi guay hei latgiam swna salou the; latgiam hamhna ramh baihmei kaniw khou sa mak ge.

³⁵Mi hei, “Ai rui kaniw khou latgiam sa puni, kandih nai thau rap khou rui meic thay makmei tuang ai sa puni,” twna muhzwng khou rui salou kanmei tei guang tangh khang the.

³⁶Jisu meic kangdai ta tei mpatlou lana kainung khou gut the. Khoutei kaziap nunc kadaeng khou guangna, “Laupuk khou napriak thaumei tuang latgiam kabac tei aniw khou dinclou o,” twna sa the.

³⁷Khoutei kamei rui mundawna sa the, “Gaymei napphwn nrouloumeipu tei Meic Nac Mpouh hei e.

³⁸Laupuk kiu mi kandih hei e; gaymei napphwn kiu thu guanghdic nac nunc hei e; napriak kiu thu simeipu nac nunc tei e.

³⁹Kata zauczihmei napriak nrouloumeipu kiu thu ravsic e. Lau taymei ganv twmei kiu zuk luaimei ganv ta e; khatni lau taymei nunc kiu kauh baanchara nunc e.

⁴⁰Zuk hei luai pwkhou, napriak guay tei khuam kaduaina mai nteimei tei kumcna pat puni.

⁴¹Meic Nac Mpouh rui katuang baanchara nunc ta thouc pat puni, kumna kaniw rui meic nunc ta tiphaysuymei nunc khatni simei taanhmei guay ta kaguangcdic khou rui khuam kaduai puni.

⁴²Kumna maikwam khou phaiclou puni. Khou kiu kaniw huc nkay ndyang kariak riakna pui huay bam puni.

⁴³Mi ganv khou kiu ravchaptatmei guay neihmik kumcna kaniw Pu guangcdic khou gaanc puni. Kanukuanc naimei kathuic rui chu kan diu!

⁴⁴“Tingkauh guangcdic hei laupuk khou phuplou bammei lanv kumhmei tuang e. Hei tei gaanv khat pu rui ariw pwkhou, kakuam binlou ducna, neihlana kakai tatna, katuang naimei guay zuanc lana, mi laupuk tei liu the.

⁴⁵“Tingkauh guangcdic hei lanvguanhmeipu akhat rui gaymei kaphut phumei kumh tuang ni e.

⁴⁶Kamei kamanv kunghmei kaphut akhat phu tow pwkhou, tat lana katuang naimei guay zuanc lana hei tei liu the.

⁴⁷“Tingkauh guangcdic hei duipui khou phaic gutna khav zaat guayna phaic binmei chiak tei kumh tuang e.

⁴⁸Chiakc tei padik pwkhou dui paengc khou zay patna, gaymei guay nggiuh khou khuaiclou the, tiki tu nuh makmei guay ndat ganc the.

⁴⁹Zuk luai pwkhou hei tei kumc puni. Kauh baanchara nunc patna ravchaptatmei pang khou rui meicsimei nunc ta kadah pat puni,

⁵⁰kumna maikwam khou phaiclou puni. Mi khou kiu kaniw huh nkay ndyang kariak riakna pui huay bam puni.

⁵¹“Mi latgiam guay tuang kabac hei nangniw thay dai cho?” twna Jisu rui kaniw khou thanv ti khou, “Ngguay” twna kaniw rui daw the.

⁵²Kum tina kamei kaniw khou sa the, “Hei zaeng rui, tingkauh guangcdic khou ziap sw kanmei Riakdanv dinhpouc nunc tei thu kakai lanvkai khou rui lanv thanh khatni lanv guangc laa pat bammei tei kumh tuang e.”

⁵³Jisu mi latgiam guay hei salou tang lana, mi khou tei rui tat pat kan the.

⁵⁴Kumna karamc kaidai khou guang lana kaniw tuang sinagog khou nchamlou the. Khoutei kaniw ngakna, “Tabui thangc rui mi pu hei mi ningting khatni ngamv daihmei taanv taanhmei pumtan hei laa lana cho?

⁵⁵Mi pu hei thing taanv taanhmeipu nac tei hamh nah cho? Kapui tei Meri hamh nah cho khatni Jakob, Josep, Simon, khatni Juda hei kachana nunc hamh nah cho?

⁵⁶Kakainac aluh nunc tei aniu lev lungc nchamc tuang hamh nah cho? Kum e thei, kamei mi guay hei tabui thangc rui laa lana cho,” twna sa the.

⁵⁷Kumna kaniw kakhou phaysuy the. Khoutei Jisu rui kaniw khou, “Muhzwng ta thu karamc khou khatni kakai kaikhunc khou thu chakhwang swlou mak ge,” twna sa the.

⁵⁸Kamei mi khou tei charynmei taanv taanclou geih mak khe.