Read Rongmei Naga METTHIU 15 Bible Online

METTHIU 15 - Rongmei Naga bible

METTHIU 15

¹Mi tangv Jerusalem thangc rui Pharisimei lev Riakdanv dinhpouc nunc Jisu daeng khou guangna,

²“Tabui swna nang ziap nunc pupouh nunc tuang latdyn khou tat mak tu cho? Kalam thu ntyan tu ni khou baanh khiupui riak tei kaniw sw mak ge,” twna sa the.

³Jisu rui mundawna kaniw khou sa the, “Tabui swna nangniw tuang pupouh nunc tuang latdyn tei ngaek khang rui nangniw Ravguangc tuang latdyn ngaek mak tu cho?

⁴Kalam thu ‘Nang pui nang pu ta chakhwang sw o’, kumna ‘Kapui ta hamh e thei, kapu ta latsic sapui mei ta tei swluai nina e,’ twna Ravguangc rui sa e.

⁵Thowkumhmei rui kapui kapu khang tii nimei puat tei ‘Mi hei Ravguangc khang the,’ twna salou kan e thei,

⁶‘kamei kapui[14] kapu ta zauclou dat bam khang kage maek khe’ twna nangniw rui nchamlou e. Mi kumna nangniw rui nangniw pupouc nunc tuang latdyn khang rui Ravguangc lat ta ganc the.

⁷Gaylwnswmeithiu, nangniw lam khou Isaia rui mi kumna saloumei hei nchumh the:

⁸‘Mi mei nunc hei kaniw mwang rui thu ata chakhwang sw e, tiki kaniw lung thu akhou rui duc the.

⁹Nsa kaniw ata kalum e, maansei lat ta Ravguangc lat kumcna nchamlou the.’ ”

¹⁰Jisu rui meic kangdai ta kadaeng khou kaw guangna kaniw khou sa the, “Nangniw mi hei nkingna kabah thay o.

¹¹Mwang khou rui tu gutmei puat tei rui maansei ta sw mphuam tuang hamh e, tiki mwang khou rui patmei tei rui de.”

¹²Khoutei Jisu daeng khou kaziap nunc guangna, “Nang rui samei tei chu lana Pharisimei nunc lungh kabiu kanmei tei nang thay khuang de cho?” twna sa the.

¹³Khoutei Jisu rui mundawna, “Tingkauh thangc bammei aPu rui lingclou makmei bang guay tei phuai ganc puni.

¹⁴Kaniw khang lungh ryanra bam nangh e. Kaniw hei mik tiatmei ta chaengzaymei mik tiatmei nunc e. Mik tiatmei rui mik tiatmei ta chaengzay e thei gaanv neimei khunh khou keylou puni,” twna sa the.

¹⁵Mundawna Pitar rui Jisu khou, “Mi latgiam kabac hei aniw khou dinclou o,” twna sa the.

¹⁶Khoutei Jisu rui kaniw khou sa the, “Nangniw ni kabah thay mak muay di thena cho?

¹⁷Mwang khou rui tu gutmei tei thu bung khou gut lana mpaeng thangc tat dat kan the twmei nangniw thay mak nah cho?

¹⁸Tiki mwang khou rui patmei tei thu lungh khou rui patmei tuang e. Kumna maansei ta sw mphuammei kiu mi guay tei rui the.

¹⁹Kalam thu lungh khou rui simei lungning, meicdowmei, nowsowmei, lungcmaanvmei, kaihouhmei, saraamcna sakhi swmei, meickai ta sakasicmei, mi guay hei pat re.

²⁰Maansei ta sw mphuammei kiu mi guay hei rui the; baanh khiu makna tumei rui maansei ta sw mphuam mak ge.”

²¹Jisu mi khou tei rui tat pat lana Tur lev Sidon kaidai tuang ramvrei gei thangc tat the.

²²Khoutei zauclo, mi ramv khou tei bammei Kanaanmeipui gaanv khat patna kaucna, “Poubauhmei, David Nac Mpouh, ata zauc-nzianlou o. Anac aluhpui khou ravsic gutna si sihna bam e.” twna sa the.

²³Kum e tiki Jisu mundawlou mak ge. Khoutei kaziap nunc kadaeng khou guangna zaenghuayna, “Kamei aniu thei khou kaucna tat bammei hei, kata titat dat ti tho,” twna sa the.

²⁴Tiki mundawna Jisu rui sa the, “Ata thu Isaraelmei kai tuang maan kanmei lauziu pang khou na ndiulou tuang de.”

²⁵Tiki mi pui tei guangna kalumna, “Poubauhmei, ata nkhavlou o,” twna sa the.

²⁶Khoutei Jisu rui mundawna, “Alauc nunc tu nimei tyan tei laana si nunc khang phaicloumei thu gay mak dyng e cho,” twna sa the.

²⁷Khoutei mi pui tei rui, “Kiuc dyng e, tiki Poubauhmei, si nunc ni kakaipouc tuang kuak paeng khou rui tu kathow keyloumei tei thu khuaic tu kan dyng e cho,” twna sa the.

²⁸Khoutei mundawna Jisu rui sa the, “He meicpui, nang ramlum hei daic the! Nang kahawmei tei swlou pw di tho.” Kumna mi dyng khou tei kanacpui ta tei tigaylou kan the.

²⁹Jisu mi bamv khou tei rui tat pat lana Galili zeiclat paengc khou tat guang the. Kumna luanghbut ruc khou kuna dungckey the.

³⁰Khoutei meic kangdai kadaeng khou guang the. Kaniw rui phay baumei, chuanchaymei, mik tiatmei, lat sa thay makmei, khatni baihmei mpeyna ta kadaeng khou laaguang the. Kamei rui mi guay ta tei tigaylou kan the.

³¹Lat sa thay makmei nunc rui lat sa datmei, chuanchaymei nunc nthuih dat bammei, phay baumei nunc tat dat bammei, khatni mik tiatmei nunc how dat bammei tei how lana meic kangdai tei ngak the. Kumna kaniw Isaraelmei Racguangc hym thuanc the.

³²Khoutei Jisu rui kaziap nunc ta kadaeng khou kaw guangna sa the, “Ai meic nunc ti hei howlouna nzian the. Kalam thu kaniw adaeng khou bam guangmei ntaw thu zaeng neih thumh tangc the. Kaniw tu khang ramhkhat sini maek khe. Titu makna kaniw ta titat dat nii mak khe. Kaniw chaeng dak khou daapmumanc pung di the.”

³³Khoutei kaziap nunc rui kakhou sa the, “Meic kangdai heizumei ta titu biuh khang mi tazikramv khou hei tabui thangc rui aniu ntyan laa nina cho?”

³⁴Khoutei, “Nangniw khou ntyan azuh nai tu cho?” twna Jisu rui kaniw khou thanv the. “Ntyan dwm chanei lev khav asaekc na nai e,” twna kaniw rui daw the.

³⁵Jisu rui meic nunc ta tei kandih khou tidungc keylou the.

³⁶Kumna ntyan dwm chanei tei lev khav guay tei laana thuanckulou the, kumna kaziap nunc rui meic kangdai khou tei nzanhlou the.

³⁷Kaniw meic guayna tu ngguna tu tang pwkhou tu nsaekcloumei giupaekc chanei padikna kaniw rui khuam guang dat the.

³⁸Mi khou tei tumei tei ntumei lev alauc ta chak makna meic ching padeih e.

³⁹Meic kangdai ta tei titat ntamvlou lana, kamei hih tuangcna Magadan tuang ramv khou guang the.