Read Rongmei Naga METTHIU 16 Bible Online

METTHIU 16 - Rongmei Naga bible

METTHIU 16

¹Khoutei Pharisimei nunc khatni Saddukimei nunc Jisu daeng khou guangna, kata nchanvna, Ravguangc tuang ngamv khou rui sw-nchinmei taanv kaniw khou lyanlou khang sa khwan e.

²Khoutei mundawna Jisu rui kaniw khou sa the, “ Neih key khou tingpuk haengc ti thei ‘ting gay puni the’ twna nangniw sa e.

³Lauthwan thwanzingh tingpuk haengc zingc ti thei ‘tingpwanzingh guang puni the’ twna nangniw sa e. Kumna tingpuk zaw khou rui guang nimei ting neih lwnlung nangniw how pat thay e thei, ntaw hei nangniw khou sw-nchinlou bammei guay tuang kabac thu nangniw how pat thay mak khe nah cho?[15]

⁴Meicsimei khatni ravchaptat makmei mei nunc hei rui sw-nchinmei ta phu e. Tiki Jona khou swlou kanmei sw-nchinmei tei hamhna baihmei lyanlou lak ge.” Kumna kaniw ta ganclouna kamei tat kan the.

⁵Ziap nunc tei zeihlat paengc akhat thangc kaan pat the. Khoutei kaniw ntyan phungc amuc the.

⁶Khoutei Jisu rui kaniw khou sa the, “Pharisimei khatni Saddukimei nunc tuang khay khou rui ramhthay o khatni suriak thay o.”

⁷“Aniu ntyan phungc ti makna sa bam tu khuang the,” twna kaniw kaphianh bam the.

⁸Hei tei thay lana Jisu rui sa the, “He lwmmei nthyammei nunc, ntyan maekmei lam khou nangniw tabui swna kaphianh bam tu cho?

⁹Nangniw kabah thay mak he nah cho? Ntyan dwm panguh rui meic ching panguh ta tituna giupaekc azuh nsaekclou cho twmei nangniw amuc dat the nah cho?

¹⁰Ntyan dwm chanei rui meic ching padeih ta tituna tu nsaekcloumei giupaekc azuh khuam guang cho twmei amuc dat the nah cho?

¹¹Ai ntyan lam khou sa bam tu hamh e twmei akumhna nangniw thay makna cho? Pharisimei khatni Saddukimei tuang khay khou tei rui suriak thay o.”

¹²Khoutei kamei ntyan tuang khay lam khou sa bam tuang hamh e, tiki Pharisimei nunc khatni Saddukimei nunc tuang latdyn khou tei rui suriak thay o twpui tuang e twmei kaniw kabah thay the.

¹³Mi tangc Jisu Kaisaria Philippi kaidai tuang ramv khou guang khou, “Meic Nac Mpouh hei thow e twna meic nunc rui sa bu cho?” twna kamei rui kaziap nunc khou thanv the.

¹⁴Khoutei kaniw rui sa the, “Meic gaanvsaekc rui ‘duiluploumei Jahon tei e,’ meic gaanvsaekc rui ‘Elija e,’ meic gaanvsaekc rui ‘Jeremia e,’ hamh e thei ‘muhzwng akhat re’ twna sa e.”

¹⁵Kamei rui kaniw khou sa the, “Nangniw rui thu ata thow e twna sa tu cho?”

¹⁶Khoutei mundawna Simon Pitar rui, “Nang thu ringhmei Racguangc Nac Mpouh Khrista e,” twna sa the.

¹⁷Khoutei Jisu rui kakhou sa the, “Jona nac mpouh Simon, nang sangay e! Mi hei nang khou tithayloumei hei maansei rui hamh e, tingkauh thangc bammei aPu rui e.

¹⁸Ai rui nang khou kadylou tuang e: Nang hei Pitar the, mi taudaic ruc khou hei atuang phwamling kasiamh thau puni. Kumna taruaih raengckat rui ni mi ti hei ngam dat lak khe.

¹⁹Tingkauh guangcdic kaikhamv laanhmei khatni mbanghmei ngamv ai rui nang khou tiilou puni. Kumna nang rui kandih khou karakcloumei tei tingkauh thangc ni karakclou puni khatni nang rui kandih khou ricloumei tei tingkauh thangc ni riclou puni.”

²⁰Khoutei kamei hei Khrista e twmei meic gaanv khat na khou sini raclou mak khang kaziap nunc khou kadylou the.

²¹Mi khou tei rui thauna, Jisu Khrista kamei Jerusalem thangc tat puni kumna gaanvthaih nunc, amuh daihmei nunc, khatni Riakdanv dinhpouc nunc baanc khou ryanramei mpeyna ariw puni, kumna kata swluai puni, tiki zaeng neih thumhpui nungc ringcthau dat puni twmei kaziap nunc khou ndaw sa thau the.

²²Pitar rui kata nduangh langc patna kata kakhimna, “Poubauhmei, mi kumhmei tei nang khou tipatlou makmei sw kan diu, mi kumhmei tei nang khou patlou ni tuang hamh e,” twna sa the.

²³Khoutei Jisu Pitar biak thangc karih patna, “Athei thangc tat kan o, Seitaan! Nang hei akhang chaeng khamvmei de. Nang Ravguangc tuang lungning ning mak ge, maansei tuang de,” twna sa the.

²⁴Khoutei Jisu rui kaziap nunc khou sa the, “Thow pw ni athei lay nii e thei karana kata nuh mak nina e, kumna katuang kros phungcna athei lay nina e.

²⁵Kalam thu karingcpaan kan khang swpui mei tei, hei tei maan puni; tiki akhang rui karingcpaan maanloupui mei tei ringhpaan laatow puni.

²⁶Tabui cho tiki, thowkumhmei rui mbaanv kapwm kakhang laatow sini, mi khang tei rui karingcpaan maanlou e thei, kakhang tabui gaengna cho? Karingcpaan thuak dat nuhpui puat tabui naina cho?

²⁷Kalam thu Meic Nac Mpouh hei Ravguangc tuang baanchara nunc ta nduanghna kaPu tuang hym khou guang puni. Mi khou kiu meic kathuic khang kataanv kataanv thai tii puni.

²⁸Ai rui nangniw khou kaling siakna sa tuang e: Meic Nac Mpouh kaguangcdic khou guangmei ta how mak saanv theic lak nimei mei gaanvsaekc mi khou ding bammei pang khou hei nai e.”