Read Rongmei Naga METTHIU 17 Bible Online

METTHIU 17 - Rongmei Naga bible

METTHIU 17

¹Zaeng charuk tangv, Jisu Pitar khatni Jakob lev Jahon kai chana nei ta nduanghna kaniw rana chyngbut kauhmei khou ku the.

²Khoutei Jisu kaniw hu khou kalwn guanlih pat the. Kumna kazaw neih kumc ti tah ta the khatni kapheybaan mphwan kariph rip the.

³Khoutei Mousi lev Elija rui kata kachuc bammei ta kaniw how the.

⁴Khoutei Pitar rui Jisu khou, “Poubauhmei, aniu mi khou hei bammei gay the. Nang rui nuhlou e thei, mi khou hei zypuikai kathumh—nang khang khat, Mousi khang khat, Elija khang khat ai swlou ni the,” twna sa the.

⁵Pitar rui mi kumcna sa bam khou, ti tah tamei muangc rui kaniw ta gumbin the. Khoutei muangh khou tei rui khwan akhat rui, “Mi hei alung kwnmei, ai rui nzianmei aNac Mpouh e. Nangniw kalat chu o,” twna sa the.

⁶Ziap nunc tei mi khwan tei chu lana ping kadunhna kaniw zaw kandih khou sow nkhum khuak key the.

⁷Khoutei Jisu kaniw daeng khou guangna kaniw ta kahina, “Thau tho, ping riu,” twna sa the.

⁸Khoutei kaniw zauc thau pwkhou Jisu karana bam khwan the.

⁹“Meic Nac Mpouh hei theihmei khou rui ringcthau dat mak saanv, mi ndawman hei meic gaanv khat na khou sini nangniw raclou nuh mak ge,” twna kaniw chyngbut khou tei rui key datmei chaenglwan khou Jisu rui kaniw khou sa the.

¹⁰Khoutei, “Kum e thei tabui swna ‘Elija guang rey puni,’ twna Riakdanv dinhpouc nunc rui sa bam tu cho?” twna ziap nunc rui thanv the.

¹¹Jisu rui mundawna, “Elija guang rey changh ni tina the, kumna kamei rui ramh guayna chamdaanvlou puni tina the.

¹²Ai rui nangniw khou saloupui tuang e: Elija kiu guang tang the. Tiki kaniw rui kata thay mak khe. Kumna kaniw rui karuc khou sw niimei guay swlou kan the. Hei tei kumc muayna Meic Nac Mpouh ni kaniw baanc khou ryanra khaengv puni.”

¹³Khoutei kamei duiluploumei Jahon lam khou sa bam tuang e twmei ziap nunc tei thay the.

¹⁴Jisu khatni kaziap nunc tei meic kangdai bammei bamv khou tei key dat pwkhou, meic gaanv khat Jisu daeng khou guangna khuksun keyna,

¹⁵“Poubauhmei, anac mpouh ta zauc nzianlou o. Kakhou theilanhmei ravpuat naina katupc sihna kamei mai khou khatni dui khou bowlouna ryanra sihna bam e.

¹⁶Ai kata nang tuang ziap nunc khou nduangh guang the, tiki kaniw rui kata tigaylou ngam mak khe,” twna sa the.

¹⁷Khoutei mundawna Jisu rui sa the, “He lwm makmei khatni zay mbianghloumeithiu, ai nangniw pang khou asaanh bam bam nina cho? Kata mi bamv khou hei nduangh guang o.”

¹⁸Jisu rui ravsic ta tei luh the. Khoutei ravsic tei mi nac khou tei rui pat kan the. Kumna mi dyng khou tei mi nac tei gay dat kan the.

¹⁹Khoutei ziap nunc tei Jisu daeng khou kaniw rana guangna, “Tabui sw tina aniw mi ta tei nthau pat ngam mak tu cho?” twna thanv the.

²⁰Khoutei Jisu rui kaniw khou sa the, “Mi hei nangniw lwmmei nthyam tina e. Ai rui nangniw khou kaling siakna sa tuang e: Nangniw lwmmei gannaeng thw di na sini nai e thei nangniw rui mi chyngbut ti hei, ‘Mi khou rui mi thangc tei kalaic tat kan o,’ tw ti thei kalaic tat kan puni de. Nangniw khang ngam lak tuang khat sini nai ni tu hamh e.”[16]

²²Ziap guay tei Galili khou guang kaduai datpui ganv khou Jisu rui kaniw khou sa the, “Meic Nac Mpouh ta meic nunc baanc khou tii patlou puni the,

²³kumna kaniw rui kata swluai puni. Tiki zaeng neih thumhpui nungc kata tiringcthaulou dat puni.” Khoutei kaniw mpeyna lungh kabiu the.

²⁴Jisu khatni kaziap nunc Kapharnahum khou guang khou, ravkai tuang syankhav kakhamei nunc Pitar daeng khou guangna, “Nangniw tuang dinhpouc hei ravkai tuang syankhav tii daih?” twna thanv the.

²⁵Khoutei, “Ngguay” twna Pitar rui daw the. Pitar tei kainung khou gut pwkhou, Jisu rui sa reyna kakhou sa the, “Simon, nang akumhna kakhanh tu cho? Kandih tuang guangc nunc rui syan thaengv khatni dihkhav laamei tei thow khou rui laa tu cho? Kaguangcdic nac nunc khou rui ni, guanghdic baihmei nac nunc khou rui cho?”

²⁶“Guanghdic baihmei nac nunc khou rui de,” twna Pitar rui daw the. Khoutei Jisu rui kakhou sa the, “Kum e thei, kaguangcdic nac nunc tei thu tii khang hamh the ni?

²⁷Kum khwan sini, aniu rui kaniw lung tipuamclou mak khang, nang zeihlat thangc tatna khavkhuay mphaan tho. Kumna manc reymei khav mwang tei phaek pat ti thei shekel[17] akhat nai puni. Hei tei anei thaengv khang tiilou ti tho.”