Read Rongmei Naga METTHIU 2 Bible Online

METTHIU 2 - Rongmei Naga bible

METTHIU 2

¹Herod guangh sw bammei ganv khou, Judia kandih tuang Bethlehem namv khou Jisu puanc khwan e. Khoutei neihpat thangc rui Magi nunc Jerusalem khou guangna,

²“Jihudimei guangc puanhmei kiu tabui thangc tei cho? Kamei puanc the twmei dinhmei gaanchuangcna ta aniw neihpat thangc how the. Kum thena kata kalum khang aniw guang tuang e,” twna Herod khou thanv the.

³Mi tei chu la khou Guangh Herod khatni Jerusalemmei guay kaniw lung katuakc the.

⁴Jihudimei tuang amuh daihmei nunc khatni Riakdanv dinhpouc nunc ta kaw kaduaina Khrista kiu tabui thangc puanc puni cho twna kamei rui kaniw khou thanv the.

⁵Kaniw rui sa the, “Judia tuang Bethlehem khou e; kalam thu muhzwng rui mi kumna hylou e:

⁶‘He Juda tuang Bethlehem, nang hei Juda tuang kapy singhmei kaidai pang khou, nthyam liangmei hamh e; kalam thu, Isaraelmei amei ta gaengclou nimeipu, nang khou rui pat puni.’ ”

⁷Mi tangv tei Herod rui nkamhna Magi nunc ta tei kawna, gaanchuangcna kiu patmei ganv kiu kaniw khou rui thanv nthan the.

⁸Kamei rui kaniw ta Bethlehem thangc ndiulouna sa the, “Nangniw tatna ngana ta kiu phu mincna phu zauc tho; kumna phu tow e thei akhou ni dinclou o, ai ni tatna kata kalum ni.”

⁹Guangh lat tei chu lana kaniw tat the. Neihpat thangc kaniw how kanmei gaanchuangcna tei mi angana tei bammei bamv ruc khou tei guang ding tangh mak saanv kaniw hu kasuakcna tat khwan e.

¹⁰Gaanchuangcna tei how pwkhou kaniw sa dat khang thay makmei ramneila neihla the.

¹¹Kai lungc khou tei gut pwkhou, mi angana tei lev kapui Meri ta how the, kumna kaniw nkhum laamv keyna kata kalum the. Kaniw tuang lanvkhuk laanc patna kachaekc, agaw khatni mir kaipat swna katlou the.

¹²Herod daeng thangc tat dat mak khang kaniw mang khou dinclou tina baihmei chaeng rui kaniw kandic thangc tat dat kan the.

¹³Kaniw tei tat kanmei tangv, Poubauhmei tuang baanchara Josep mang khou guangna sa the, “Thau tho, angana lev kapui ta nduanghna Izip thangc pak tat tho. Ai rui sa dat mak saanv mi khou tei bam o, kalam thu mi nac ta tei swluai khang Herod rui phu puni the.”

¹⁴Josep tei thauna, angana lev kapui ta nduanghna zingbangc thangc Izip thangc tat kan the.

¹⁵Herod theih mak saanv mi khou tei bamlou kan the. Mi hei “Ai rui Izip khou rui anac mpouh ta kaw guang puni,” twna Poubauhmei tuang muczwng rui saloumei tei guang tangc nthuih khang e.

¹⁶Mi nunc tei rui kata guat the twmei thay la khou, Herod tei kareic thauna kalung puamc the, kumna kaniw khou rui thayloumei ganv tei chakna, Bethlehem khatni mi daeng khou naimei, tingkwm kanei tanghmei khatni mi bangcmei nggaanvmei nac guay ta rihmei ndiulouna swluai the.

¹⁷“Rama khou khwan akhat chu e, kapmei lev kangiuhmei khwan e, Rachel kanac nunc ta huayna kap bam e, swm gay dat ngam mak khe, kanac nunc theic ngam the,” twna muhzwng Jeremia rui saloumei tei mi hei kumcna guang tangc kan the.

¹⁹Herod theic kan pwkhou, Izip khou Poubauhmei tuang baanchara Josep mang khou guangna,

²⁰“Thau tho, angana lev kapui ta nduanghna Isarael kandic thangc tat dat tho; angana ti hei swluai khang phu bammei nunc tei theic kan the.” twna sa the.

²¹Kumna kamei thauna, angana lev kapui ta nduanghna Isarael kandic khou guang dat the.

²²Tiki Akhilau rui kapu Herod phaan lynna Judia khou guangh sw bam e twmei chu lana kamei mi khou tei guang khang ping the. Kamang khou dinclou tina, kamei Galili ramv thangc ley tat kan the.

²³Kumna Nazareth kawmei kaidai khou guang lungc the. “Kata Nazarethmei twna kaw puni,” twna muhzwng nunc rui saloumei tei mi hei kumcna guang tangc kan the.