Read Rongmei Naga METTHIU 20 Bible Online

METTHIU 20 - Rongmei Naga bible

METTHIU 20

¹“Tingkauh guangcdic kiu mi hei kumh tuang e. Drakha lau taanhmei gaanv khatpu rui taanv taanhpui mei phu khang lauthwan khuanzingh pat the.

²Zaeng neih khat phy denari[20] akhat khang nuhna meic gaanvsaekc katuang drakha lau thangc ndiulou kan the.

³Tingchung zaengc khou tat pat dat pwkhou meic gaanvsaekc taanv taanh makna kaithyan khou ding bammei ta how the.

⁴Khoutei kamei rui kaniw khou, ‘Nangniw ni atuang drakha lau tat ro, phy gayna tii puni,’ twna sa the.

⁵Khoutei kaniw tei ni tat kan the. Neih ndyng khou ni, neih nchiangh key khou ni kamei tat pat dat muayna hei tei kumcna ndiulou dat muay the.

⁶Kumna tingzyn ramvgei kamei tat pat dat pwkhou meic baihmei ni ding bammei ta ariw the. Khoutei, ‘Nangniw tabui swna taanv taanh makna mi khou hei nsa ding zingc bam tu cho?’ twna sa the.

⁷‘Aniw ta thu meic rui lanvloumei maekna the,’ twna kaniw rui daw the. Khoutei kaniw khou, ‘Nangniw ni atuang drakha lau tat ro.’ twna sa the.

⁸“Tingzyn drakha lau kaipouc tei rui katuang taanvpypu khou sa the, ‘Taanv taanhmei guay ta kaw tho, kumna kaniw phy tei tat nkhamh liangmei khou rui tii thauna tat rey liangmei khang nkhamh liangmei khou tii ti tho.’

⁹Khoutei tingzyn ramvgei tatmei nunc khang denari akhat akhat tiilou the.

¹⁰Tat rey liangmei nunc tei kaniw khang thu geic pwng the twna ningna guang the. Tiki kaniw khang ni denari akhat akhat tiilou the.

¹¹Hei tei tiilou pwkhou laupouc ta pian makna sa thau the,

¹²‘Mi nkhamhmei nunc thu ganvdak akhat na taanh tuang de. Aniw neih ndaengna neihmaryn taanhmei nunc phy lev nchamcna nang tii bammei thu tabui thiak cho?’ twna sa the.

¹³Khoutei kamei rui kaniw pang khou gaanv khat khou, ‘Champanv, ai nang ta guat mak ge. Denari akhat khang nang nuhna taanh de.

¹⁴Nang tuang phy laana tat tho. Mi nkhamhmeipu khang ni nang khang lev nchamcna ai tii nii na de.

¹⁵Atuang tei thu ai anyng sw nuh mak nah cho? Alung daicna tiimei ti hei nang mamav bu cho?’

¹⁶“Mi hei kumcna nkhamhmei nunc hei reymei sw puni, khatni reymei nunc hei nkhamhmei sw puni.”

¹⁷Jisu Jerusalem thangc nganghmei chaenglwan khou, kaziap ruhna kanei ta nduangh langc patna kaniw rana tat bam khou kamei rui kaniw khou sa the,

¹⁸“Zauclo, aniu Jerusalem khou ngangh puni the. Mi khou tei Meic Nac Mpouh ti hei amuh daihmei nunc khatni Riakdanv dinhpouc nunc baanc khou tii pat puni the. Kumna kaniw rui kakhuay nkhamlouna kata swluai khang,

¹⁹Zentelmei nunc khou tiilou tina kaniw rui kata sinnui puni, bai puni, kumna kros khou thaengcluai puni. Tiki zaeng neih thumhpui neic kata tiringcthau dat puni.”

²⁰Mi tangv Zebedi now kanac nei ta nduanghna ramhkhat ney khang Jisu daeng khou guangna kalum khwan e.

²¹Khoutei, “Nang tabui tuang kahawna cho?” twna Jisu rui thanv the. “Anac nei ti hei nang guangcdic khou kiu nang tuang baanzat baandaw khou tidungh khang latdanv patlou o,” twna sa the.

²²Mundawna Jisu rui sa the, “Nangney tabui tuang ney bam tu cho twmei nangney thay mak ge. Ai rui zangv nimei buangc hei nangney zangv diw nah cho?” “Aney zangv diw e,” twna kaney rui kakhou daw the.

²³Khoutei Jisu rui kaney khou sa the, “Nangney atuang buangc zangv puni de, tiki atuang baanzat baandaw khou dungc nimei thu ai rui tii nina hamh e. Mi bamv hei thu aPu rui kamei rui chamdaanvloumei nunc khang tii kan ni tuang de.”

²⁴Hei tei baihmei ziap ruh tei rui chu la khou kakai chana nei ta kaniw lung puamc the.

²⁵Khoutei Jisu rui kaniw ta kaw guang kaduaina sa the, “Nangniw thay bammei tei the: Zentelmei guangc nunc thu kaniw tuang mei nunc ruc khou kaipou sw e, khatni kaniw tuang meicdaihmei nunc tei meic nunc ruc khou ngamv sin e.

²⁶Tiki nangniw thu hei tei kumc nina hamh e. Nangniw thowkumhmei rui meicdaihmei sw nii e thei, kamei meic guayna siamruaimei sw nina de.

²⁷Thowkumhmei rui daic liangmei sw nii e thei, kamei tei nangniw bangc sw nina e.

²⁸Zauclo, Meic Nac Mpouh hei kasiamruai swlou khang guang tu hamh e, tiki siamruai sw khang khatni meic mpeyna ta thuak pat khang theiclou khang guang tuang de.”

²⁹Jisu lev kaziap nunc Jeriko khou rui tat pat dat khou, meic kangdai kathei lay tat bam khwan e.

³⁰Khoutei chaeng daeng khou dungc bammei mik tiatmei gaanv nei Jisu guang e twmei chu lana, “Poubauhmei, David Nac Mpouh, aney ta zauc nzianlou o,” twna kauc the.

³¹Khoutei meic nunc tei rui kaney ta “Reih rei o” twna luh the. Tiki kaney kauc ranv hay hayna, “Poubauhmei, David Nac Mpouh, aney ta zauc nzianlou o,” twna kauc the.

³²Khoutei Jisu dingna kaney ta kawna, “Ai rui nangney khang tabui swlou tu laa niina cho?” twna thanv the.

³³Khoutei, “Poubauhmei, aney mik tihowlou dat ro,” twna sa the.

³⁴Jisu kaney khang ningngam mak khe, kumna kaney mik tei kahilou the. Mi dyng khou tei kaney how dat the, kumna kathei lay the.