Read Rongmei Naga METTHIU 22 Bible Online

METTHIU 22 - Rongmei Naga bible

METTHIU 22

¹Khoutei mundawna Jisu rui latgiam swna kaniw khou sa dat re,

²“Tingkauh guangcdic hei guangh akhat rui kanac now suanhpui ngai raengc patmei kumhmei tuang e.

³Ngay khang tei kabailoumei guay ta tei kaw khang kamei rui kabangc nunc ta ndiu pat the, tiki kaniw guang nii mak khe.

⁴Kamei rui kabangc gaanvsaekc ta ndiu pat datna, ‘kameigaymei guaichic nunc downa ngay taektw chamdaanv luailou the, ramh kaguayna chamdaanv luai the, guang tho, twna kabailoumei guay khou tei tatna sa tho’ twna kamei rui sa the.

⁵Tiki hei tei thouhswlou makna kaniw tat ngam kan the: gaanv khat rui kalau thangc tat kan the, baihmei rui katuang lanvguanhpui bamv thangc tat kan the,

⁶baihmei gaanvsaekc tei rui kabangc nunc ta tei nymna sw changamclouna swluai the.

⁷Khoutei guang tei kalung puamc the, kumna katuang ricmei nunc ta ndiu patna mi meicdowmei nunc ta tei swluai the, khatni kaniw tuang kaidai tei mailou the.

⁸“Khoutei kamei rui kabangc nunc khou tei sa the, ‘Nowsuanh ngai thu chamdaanv luai the, tiki kabailoumei nunc tei thu guang khang biuh mak khe.

⁹Hei zaeng rui nangniw chaeng khaek dai khou pat lana meic ariwmei guay ta nngay khang tei kabai tho’.

¹⁰Kumna mi bangc guay tei chaengdai khou pat lana, meic si meicgay kapah makna, ariw riwmei ta khuam guangna nowsuanh kai tei maansei rui padik the.

¹¹“Khoutei guangh tei gutna, guang bammei guay ta tei zauc pwkhou nowsuanh pwan piu makmei gaanv khat ta how the.

¹²Khoutei ‘Champanv, nowsuanh pwan piu makna akumhna nang mi khou hei gut bam tu cho?’ twna guangh tei rui kakhou sa the. Khoutei kamei ramh lat sa mak khe.

¹³Khoutei, ‘Kati hei kaphay kabaanc karakcna kapaengc thangc zinghmei khou ganc pat kan o,’ twna guangh tei rui siamruaimei nunc khou tei sa the. Mi khou tei kamei huh khaic ndyang kariak riakna puihuayna bam puni.

¹⁴“Kalam thu meic mpeyna ta kaw e, tiki meic katitna ta kapah e.”

¹⁵Khoutei Pharisimei nunc tei tat pat lana Jisu ta kalat khou timanh khang kaphianh the.

¹⁶Kumna kaniw rui kaniw tuang ziap nunc lev Herodmei nunc ta ndiulou tina kaniw rui Jisu khou sa the, “Dinhpouc, nang hei latling sameipu e twmei aniw thay e. Nang thu maansei ta rouh tuang maekna Ravguangc ningmei kaling dinhmeipu e; kalam thu nang thu maansei ta zawkhu zawru zauh mak ge.

¹⁷Hei zaeng rui Kaisar khang dihkhav tiimei hei Riakdanv thei layna nchumh ni nchumh mak cho? Nang ningmei aniw khou dinclou o.”

¹⁸Kaniw tuang simei raeng tei thay lana Jisu rui kaniw khou sa the, “Gaylwn swmeithiu, tabui swna nangniw ata nchanv bam tu cho?

¹⁹Dihkhav tii nimei syan kiu akhou lyan o.” Khoutei kaniw rui denari akhat Jisu khou laaguang the.

²⁰Khoutei, “Mi hei thow maengc cho, khatni hyloumei hei tabui lat cho?” twna Jisu rui kaniw khou thanv the.

²¹“Kaisar tuang,” twna kaniw rui daw the. Khoutei Jisu rui kaniw khou sa the, “Kum e thei Kaisar tuang tei Kaisar khang tii tio, Ravguangc tuang tei Ravguangc khang tii tio.”

²²Hei tei chu lana kaniw mav maek khe, kumna kakhou rui tat pat kan the.

²³Mi nungc tei, theihmei ringcthau dat mak ge twna samei Saddukimei nunc Jisu daeng khou guangna kakhou thanvna,

²⁴sa the, “Dinhpouc, ‘thowkumhmei gaanv khat rui kanac maekna theic kan e thei, kakainac rui kachaic now ta kakhauhna kachaic kikta tinailou nina e,’ twna Mousi rui salou e.

²⁵Chana gaanv chanei aniw pang khou lungclou khwan e. Gaanvdaihmeipu tei kanow kaw the, tiki kanac maekna kanow tei kakainac khang ganclou ducna theic kan the.

²⁶Kaneimei, kathumhmei tei ni hei tei kumc muayna chaneimeipu khou tei nganvna key tangc the.

²⁷Nkhamh khou ntumei tei ni theic the.

²⁸Kum e thei, ringcthau dat khou kiu mi pui tei kakai chana gaanv chanei khou tei thow now sw puni cho? Kaniw meic guayna kata kaw ntangh the.”

²⁹Mundawna Jisu rui kaniw khou sa the, “Hylou bammei ta tei khatni Ravguangc ngamv ta thay makpui zaeng rui nangniw nkhuai the.

³⁰Theihmei khou rui ringcthau dat khou thu nowkaw mihmei nai dat mak khe, kaniw tingkauh baanchara nunc kumc kan ni the.

³¹Theihmei rui ringcthau datmei lam khou thu, Ravguangc rui nangniw khou samei tei pac zat mak he nah cho? Ravguangc rui sa e,

³²‘Ai hei Abraham Racguangc, Isak Racguangc khatni Jakob Racguangc e.’ “Kamei hei theihmei nunc Racguangc hamh e, ringc bammei nunc Racguangc de.”

³³Hei tei chu la khou meic nunc tei kamei rui nchamloumei khou tei ngak the.

³⁴Jisu rui Saddukimei mwang daw thimlou kan the twmei Pharisimei nunc tei chu lana kaniw guang kaduai the.

³⁵Khoutei kaniw pang khou Riakdanv dinhpouc gaanv khat rui kata nchanvna,

³⁶“Dinhpouc, Riakdanv khou tabui tei daic liangmei latdanv cho?” twna thanv khwan e.

³⁷Khoutei Jisu rui kakhou sa the, “‘Nang Racguangc Poubauhmei ta nang lung kapwm rui, nang tuang ringcpaan kapwm rui khatni nang lungning kapwm rui nzian nina e,’

³⁸twmei hei daic liangmei khatni nthuk liangmei latdanv the.

³⁹Kaneimei daic liangmei latdanv kiu thu: ‘Nang kai kaining kaigeimei ta nang pumc kahak ta kumcna nzian nina e,’ twmei hei e.

⁴⁰Riakdanv khatni muhzwng nunc tuang latdyn kapwm kiu mi khou hei nai the.”

⁴¹Pharisimei guay tei guang kariu pwkhou, Jisu rui kaniw khou thanvna,

⁴²“Khrista lam khou nangniw akumhna ning tu cho? Kamei thow nac cho?” twna sa the. Khoutei, “David Nac Mpouh e,” twna kaniw rui daw the.

⁴³Kamei rui kaniw khou sa the, “Kum e thei David rui akumhna Bumaengh paan rui kata ‘Poubauhmei’ twna kaw tu cho? David rui sa e,

⁴⁴‘Ringhpouc rui apoubauhmei khou sa e, Nang ta zauczihmei guay ta, ai rui nang phaypav bangc khou lou mak saanv, a baanzat khou dungc bam o.’

⁴⁵“Hei zaeng rui, David rui kata ‘Poubauhmei’ twna kaw e thei, akumhna kamei kanac nina cho?”

⁴⁶Khoutei meic gaanv khat na sini lat akhat na sini daw dat ngam mak khe khatni mi nungc tei rui thauna meic gaanv khat na sini lat thanv dat bauh mak khe.