Read Rongmei Naga METTHIU 24 Bible Online

METTHIU 24 - Rongmei Naga bible

METTHIU 24

¹Jisu Ravkai mpatlouna tat pat pwkhou kaziap nunc kadaeng khou guangna Ravkai tuang kai guay tei kata tiphaengc khwan e.

²Khoutei Jisu rui kaniw khou sa the, “Mi kai guay hei nangniw how bo? Ai rui nangniw khou kaling siakna sa tuang e: mi khou hei ntauh akhat ruc khou ntauh akhat nsaplou bam dat ni tu hamh the; pangv key makmei nai dat ni tu hamh the.”

³Jisu Olive Chyng khou dungc bam khou, kaziap nunc kadaeng khou kaniw rana guangna sa the, “Mi guay kiu tabui ganv khou pat puni cho? Khatni nang guang puni the khatni zuk luai puni the twmei thay nuhmei tuang tabui tuang pat puni cho? Aniw khou dinclou o.”

⁴Khoutei mundawna Jisu rui kaniw khou sa the, “Nangniw ta meic gaanv khat na rui sini zay mbiangh mak khang suriak thay o.

⁵Kalam thu, ‘Ai Khrista the’ twna meic mpeyna azanc khou guang puni, kumna meic mpeyna ta zay mbiangh puni.

⁶Nangniw rih khwan khatni rih chamv chu puni; tiki nangniw ping riu. Mi kumhmei guay hei pat puni, tiki hei tei luai nimei hamh e.

⁷Kalam thu zaatc khat rui zaatc khat ta khatni guanghdic khat rui guanghdic khat ta rih sw puni, nap nkowmei guang puni khatni kabamv kathuic khou baengla zay puni.

⁸Tiki mi guay hei narui kahouhmei di he.

⁹“Mi ganv khou kiu nangniw ta nymna rai khang tii pat puni, kumna swluai puni. Azaeng khou rui nangniw ta zaatc guayna rui karaeng puni.

¹⁰Mi khou kiu meic mpeyna athei lay taan puni, kaniw khat khat ta tinym kary puni, kumna khat khat ta karaeng puni.

¹¹Mi khou kiu kaling hamhmei muhzwng mpeyna pat puni, kumna meic mpeyna ta zay mbiangh puni.

¹²Mi kumna simei hei mbu thau tina meic mpeyna nzianmei nchu key puni.

¹³Tiki katwan nganvna akhaengvpui mei ta tei kanlou puni.

¹⁴Zaatc guayna thay lik khang mi guanghdic tuang gaychamv hei kandih kapwm khou dinc lik puni. Mi tangv thu zuk luaimei kiu guang puni the.

¹⁵“Muhzwng Daniel rui saloumei ‘sw kamut kamaimei tuang sw mphuammei puat tei nthanmei bamv khou ding bammei ta nangniw how puni. (Pahpui mei tei rui kabah thay kan diu.)

¹⁶Mi khou kiu Judia khou bammei rui chyng thangc pak tat tho.

¹⁷Kainam khou bammei rui kainung khou naimei puat laa khang key dat ri tho.

¹⁸Laupuk khou bammei rui phey laa khang hanc guang dat ri tho.

¹⁹Mi ganv khou kiu kapumc nritmei pui nunc khatni nah puanc nouc bammei pui nunc tei sansi e dav!

²⁰Tingsei khou hamh e thei Sabbathneic pak mak khang huayney o.

²¹Mi khou kiu mbaanv nai thau rap khou rui pat zat kan makmei, pat ni pat dat lakmei ryanramei ariw puni.

²²Mi ganv dak tei tiduilou mak khwan e thei, meic gaanv khat na sini ringc pat ni tu hamh e; tiki kapahloumei nunc khang rui mi ganv dak tei tiduilou puni.

²³“Mi ganv khou kiu ‘Zauclo, mi khou hei Khrista bam the,’ hamh e thei ‘mi thangc tei bam the,’ twna thowkumhmei rui sa pwsini lwm riu.

²⁴Kalam thu guatmei Khrista nunc khatni guatmei muczwng nunc pat puni. Nuh e thei kapahloumei nunc ta nganvna zay mbiangh khang sw-nchinmei khatni charynmei taanv daih mpeyna taanc puni.

²⁵Chu la tho, mi hei ai rui nangniw khou sa kasuakcloumei tuang e.

²⁶“‘Kamei tazikramv khou bam the’ twna meic nunc rui sa pwsini nangniw tat riu; ‘Kamei kainung khou bam e’ twna sa pwsini lwm riu.

²⁷Kalam thu, Meic Nac Mpouh guang nimei hei neihpat thangc tingpalik tina neihkey thangc gaanc tanghmei tei kumc puni de.

²⁸Charumc naimei bamv khou tei moucphou guang kaduai puni de.

²⁹“Mi ryanramei tingmik guay tei luai rappui lev neihmik tizingc puni, bw gaanc dat lak khe, gaanchuangcna guay tingkauh thangc rui taek key puni, khatni tingpuk tuang ngamv guay ta kanuk puni.

³⁰Mi tangv Meic Nac Mpouh guang nimei tuang kiu tingpuk khou lyan pat puni. Mi khou kiu kandihmei zaatc guayna ngaengv kazwmna kap puni khatni Meic Nac Mpouh tei ngamv phungcna hymdaicna muangh khou tuangcna keymei ta kaniw how puni.

³¹Kauh baanchara akhat rui bianggun daihmei muanna kamei rui katuang baanchara nunc ta kandih kwn padeih khou ndiulou puni. Kumna kamei rui kapahloumei nunc ta kaniw rui kandih kapwm khou rui khuam kariu puni.

³²“Tadut bang khou rui nangniw latgiam akhat thay o. Hei tei kazik kasatna kanuy thanh pat dat re thei laylum ana the twmei nangniw thay e.

³³Hei tei kumcna mi guay hei nangniw how pwkhou kamei kaimun daeng khou na bam the[25] twmei nangniw thay o.

³⁴Ai rui nangniw khou kaling siakna sa tuang e: Mi guay hei pat mak saanv mi meikin hei maan ni tu hamh e.

³⁵Tingpuk kandih thu maan puni, tiki atuang lat thu maan dat ni tu hamh the.

³⁶“Tiki mi tingmik khatni khuangh ganv tei thu gaanv khat na sini thay mak ge, Pu na tei hamhna tingkauh baanchara guay ni, Nah Mpouh[26] hei ni thay mak ge.

³⁷Meic Nac Mpouh guang nimei hei Nouha hak khou pat kanmei tei kumc puni e.

³⁸Mi ganv khou tei dui daih makmei hu khou, Nouha hy lungc khou gut kan mak saanv, meic nunc tei tuna zangvna, nowkawna, micna lungc bam khwan e.

³⁹Dui daic guangna kaniw ta nzuan ganh mak saanv, tabui pat puni cho twmei kaniw thay mak khwan e. Meic Nac Mpouh guang khou ni hei tei kumc puni.

⁴⁰Mi khou kiu laupuk khou gaanv nei bammei khou gaanv khat ta laa tat puni, gaanv khat ta ganclou duc puni;

⁴¹gaanv nei nap riakpaan riak bam khou gaanv khat ta laa tat kan puni, gaanv khat ta ganclou duc puni.

⁴²Hei zaeng rui nangniw nkhwan bam o, kalam thu nangniw tuang Kaipouc tabui nungc guang puni cho nangniw thay mak ge.

⁴³Zingbangc akumhmei ganv khou kaihouhmei guang puni cho twmei kai kaipouc tei rui thay khwan e thei, kamei zip makna nkhwanna kakai tibiu lak ni tuang e twmei nangniw thay e.

⁴⁴Hei zaeng rui nangniw ni chamdaanv bam o. Kalam thu Meic Nac Mpouh tei nangniw ning makmei ganv khou guang puni

⁴⁵“Kakai tuang bangc guay khang kaganv chana titu tizangv bam khang thouh nsinloumei bangc khou thow tei lwm nuhmei khatni ningtyngmei cho?

⁴⁶Kakaipouc tei guang datpui ganv khou kathouc taanc bammei bangc tei sangaymei e.

⁴⁷Ai rui nangniw khou kaling siakna sa tuang e: Kaipouc tei rui katuang naimei kapwm kakhou nsinlou puni.

⁴⁸Tiki meicsimei bangc tei rui ‘akaipouc guang riu ni tu hamh e’ twna ningna,

⁴⁹kapammei bangh guay ta baina, zouh mbamei nunc lev tuna zangvna bam khou,

⁵⁰kamei ning makmei nungc, kamei thay makmei ganv khou kakaipouc tei guang nangc e thei,

⁵¹kata dan puat paruatlou puni[27] khatni gaylwn swmei nunc lev nchamcna dandi mphang puni. Mi khou tei kapna kahuc nkay ndyang kariak riak bam puni.”