Read Rongmei Naga METTHIU 25 Bible Online

METTHIU 25 - Rongmei Naga bible

METTHIU 25

¹“Mi khou kiu tingkauh guangcdic kiu, tunac gaanv ruh kaniw tuang thauh mairam sinna nowpouc ta riu khang patmei kumc puni.

²Kaniw pang khou gaanv panguh rui mpangmei e, gaanv panguh rui ningtyngmei e.

³Mpangmei nunc tei thauh mairam thu sin the tiki thauh phungh mak khe.

⁴Tiki ningtyngmei nunc tei thu kaniw tuang thauh mairam khang tei thauh haan khou thauh sin tat the.

⁵Nowpouc tei guang nyan tina kaniw guay tanguih the, kumna zipri tat kan the.

⁶“Mi khou kiu zipchwng ganv khou ‘Nowpouc guang the! Pat riw tho!’ twna kauc the.

⁷Khoutei tunac guay tei zipthau lana kaniw tuang mairam ntou the.

⁸Khoutei mpangmei nunc tei rui, ‘Nangniw tuang thauc aniw khang ni tiilou na ro, aniw tuang mairam amit puni the,’ twna ningtyngmei nunc khou tei sa the.

⁹Tiki, ‘Tii mak khe. Aniu meic guayna khang thu biuh mak ge. Zuanhmei bamv thangc nangniw khang liu tat tho,’ twna ningtyngmei nunc tei rui sa the.

¹⁰Kaniw liu khang tat kan khou rui nowpouc tei guang the, kumna chamdaanvmei nunc tei nowpouc thei nowsuanh ngai bamv khou tei gut kan the; kumna kaikhamv mbangh kan the.

¹¹“Katang thangc baihmei tunac gaanv panguh tei guangna, ‘Kaipouc, kaipouc, aniw khang kaikhamv laanclou o,’ twna sa the.

¹²Khoutei, ‘Ai nangniw ta khat sini thay mak ge,’ twna kamei rui mundawna sa the.

¹³“Hei zaeng rui nangniw nkhwanna bam o, kalam thu nangniw katingmik khatni kaganv tei thay mak ge.

¹⁴“Mi hei kumc puni, twmei thu, gaanv khatpu rui kamei nggin tat kan ni khou kabangc nunc ta kaw guangna katuang lanv kaniw khou nsinlou the.

¹⁵Kamei rui gaanv khat khou talent[28] panguh, gaanv khat khou kanei, khatni baihmei gaanv khat khou akhat twna kamei kamei rui ngam nimei thei layna tiilou lana kakai khou rui tat kan the.

¹⁶Talent panguh laameipu tei kaluak kalat lanvguanh tat lana talent panguh tuangc guang the.

¹⁷Hei tei kumc muayna talent kanei laameipu tei ni kanei tuangc muay the.

¹⁸Tiki talent akhat laameipu tei thu tat pat lana kakaipouc tuang syan tei chau phuplou the.

¹⁹“Kaganv tingsaengc sihmei tangv, mi bangc nunc kaipou tei guang datna kaniw khou tiilou kanmei syanchakh tei chak the.

²⁰Khoutei talent panguh laamei bangc tei talent ruh phungc guangna, ‘Kaipouc, nang rui akhou talent panguh tiilou the, ai rui guanh tuangc patmei panguh lou nkuanna laa guangmei tuang the,’ twna sa the.

²¹Khoutei kakaipouc tei rui kakhou sa the, ‘Taanc chuy the, gaymei khatni lwmnuhmei bangc. Katitna nsinloumei khou lwm nuhmei taanv taanclou the. Nang khou mpeyna nsinlou puni the. Nang kaipouc tuang neihlamei bamv khou gut tho.’

²²Talent kanei laameipu tei ni guangna, ‘Kaipouc, nang rui akhou talent kanei tiilou e, ai talent kanei guanh tuangc patna phungc guangmei tuang e,’ twna sa the.

²³Kaipouc rui kakhou sa the, ‘Taanc chuy the, gaymei khatni lwmnuhmei bangc. Katitna nsinloumei khou lwmnuhmei taanv taanclou the. Nang khou mpeyna nsinlou puni the. Nang kaipouc tuang neihlamei bamv khou gut tho.’

²⁴Talent akhat laameipu tei ni guangna, ‘Kaipouc, nang hei thu nang rui lingclou makmei thai reimei, nang rui phunclou makmei lau taymei, meic ta nzian thay makmei mei e twmei ai thay e.

²⁵Kumna ai ping thena, nang tuang syan tei kandih khou chau phuplou tuang the. Zauclo, mi hei nang tuang tei the.’

²⁶Khoutei kaipouc tei rui kakhou sa the, ‘Simei khatni aliauhmei bangc, ai hei ai rui lingclou makmei thai reimeipu khatni ai rui phunclou makmei lau taymeipu e twmei nang thay la bu dyng the.

²⁷Kum e thei, nang rui mi syan tei syanthuay khang tiilou e thei, ai guang dat khou kathuay kazauhna laa dat ni tuang e.’

²⁸Hei zaeng rui, talent akhat tei kakhou rui laa lana talent ruh naimeipu khang tei tii tio.

²⁹Kalam thu, naipui mei khang tei tiilou nkuan puni, kumna kakhang mbu nlaina nai puni, tiki maekpui mei khou tei rui kakhou katitna naimei tei sini laa tat kan puni.

³⁰Mi gaeng makmei bangc ti hei nymna kapaengc zinghmei khou phaic pat the. Khoutei puihuayna huh nkay ndyang kariak riak bam puni.

³¹“Meic Nac Mpouh tei kauh baanchara guay ta nduanghna kahym daicna guang pwkhou, kamei katuang hymdaihmei guangc bamvpaeng khou dungc puni.

³²Kumna zaatc guayna ta kahu khou khuam guang kaduai puni. Mi khou kiu lauziu gaenghmeipu rui kalauziu ta ziuh pang khou rui gaengc langc patmei kumcna kaniw ta tei kakang kanei khang khak langc pat puni.

³³Mi khou kiu lauziu ta katuang baanzat thangc, khatni ziuh ta katuang baandaw thangc lou puni.

³⁴Mi khou kiu, guangh tei rui katuang baanzat thangc bammei nunc khou tei mi kumcna sa puni, ‘Guang tho, apu rui suaihiamloumeithiu, mbaanv damclou rap khou rui nangniw khang chamdaanvloumei guangcdic tei guang laa tho.

³⁵Kalam thu ai ndaapc khou nangniw rui ata titulou khwan e, ai tari khou nangniw rui ata tizangvlou khwan e, ai gin swna guang khou nangniw rui ata laalou khwan e,

³⁶ai pumtang bam khou nangniw rui pheybaan tiilou khwan e, ai nnau bam khou nangniw zauclou khwan e, khatni ai kangkai khou bam khou nangniw adaeng khou guang khwan e.’

³⁷“Khoutei, ravchaptatmei nunc tei rui sa puni, ‘Kaipouc, tabui nungc nang ndaapc bammei ta howna aniw titulou kanna cho, khatni nang tari bammei ta howna tizangvlou kanna cho?

³⁸Khatni tabui nungc nang gin swna guangmei ta howna laalou kanna cho khatni nang pumtang bamna pheybaan tiilou kanna cho?

³⁹Hamh e thei, tabui nungc nang nnau bammei khatni kangkai khou bammei ta howna zauclou kanna cho?’

⁴⁰Tiki, ‘Ai rui nangniw khou kaling siakna sa tuang e: achana pang khou nthyam liangmei gaanv khat khou nangniw rui swloumei tei akhou swlou tu the,’ twna guangh tei rui daw puni.

⁴¹“Khoutei katuang baandaw thangc bammei nunc khou tei ni mi kumna sa puni, ‘Siangloumei nunc, akhou rui tat pat kan o. Ravsic lev katuang baanchara nunc khang chamdaanvloumei tingsaeng mai thangc tat kan o.

⁴²Kalam thu ai ndaapc bam khou nangniw ata titulou mak ge, ai tari bam khou nangniw ata tizangvlou mak ge,

⁴³ai gin swna guang khou nangniw ata laalou mak ge, ai pumtang bam khou akhang phey tiilou mak ge, nnau bam khou khatni kangkai khou bam khou ata zauclou mak ge.’

⁴⁴Khoutei kaniw rui ni mundawna sa puni, ‘Kaipouc, tabui nungc nang ndaapc bammei ta, tari bammei ta, gin swna guangmei ta, pumtang bammei ta, nnau bammei ta, khatni kangkai khou bammei ta aniw howna nang tuang siamruai swlou mak kanmei tuang naina cho?’

⁴⁵Khoutei mundawna, ‘Ai rui nangniw khou kaling siakna sa tuang e: Mi nthyam liangmei nunc pang khou gaanv khat khou nangniw rui swlou mak kanmei tei akhou swlou kan makmei tuang e,’ twna sa puni.

⁴⁶Mi nunc hei tingsaeng dandi khou tat puni, tiki ravchaptatmei nunc tei ringcsuangmei khou tat puni.”