Read Rongmei Naga METTHIU 26 Bible Online

METTHIU 26 - Rongmei Naga bible

METTHIU 26

¹Jisu mi lat guay hei sa tang key lana kamei rui kaziap nunc khou sa the,

²“Zaeng neih nei tangv Kaanpatpui Ngai guang puni the twmei nangniw thay e, kumna Meic Nac Mpouh ta kros khou thaengcluai khang tii pat puni.”

³Mi tangv amuh daihmei nunc khatni charuangc gaanthaic nunc kazanc Kaiapha kawmei tingkuh kai khou guang kaduaina,

⁴Jisu ta nkamhna nymna swluai khang kaphianh the.

⁵Tiki nngay lungc khou thu hei tei sw ti thei lat geic lat lungc pat pungh di the twna kakhanh the.

⁶Jisu Bethani khou mphaanhmei gay datmeipu Simon kai khou,

⁷nap tu bam khou meic pui gaanv khat alabastar haan khou loumei kamanv kunghmei mwndui thauc sin guangna kapy khou bunlou the.

⁸Hei tei how lana ziap nunc tei kaniw lungh puamcna,

⁹“Tabui khang mi hei swmaan bam tu cho? Mi hei kamanv mpeyna khang zuanc lana lungcsimei nunc khang tii nuh di ki,” twna sa the.

¹⁰Hei tei thay lana Jisu rui kaniw khou sa the, “Tabui swna nangniw mi pui ti hei sw kaguakc bam tu cho? Kamei rui akhang taanv gaymei akhat taanclou the.

¹¹Lungcsimei nunc thu nangniw lev bam nchamc tanv tan bam puni de, tiki ai thu nangniw lev bam nchamc tanv tan bam ni tu hamh e.

¹²Kamei rui apumc khou thauh bunloumei hei ata mbeihlou ni khou swlou nimei tuang tei kamei rui swlou tuang the.

¹³Ai rui nangniw khou kaling siakna sa tuang e: Mi gaychamv hei dinc likloumei kandih kapwm khou, kamei rui taancloumei hei racna, kata ningtow bam puni.”

¹⁴Mi tangv ziap ruhna kanei pang khou gaanv khat, kazanc Juda Iskariot kawmeipu rui amuh daihmei nunc daeng thangc tatna,

¹⁵“Ai rui Jisu ta tinymlou e thei nangniw akhang tabui tii diw cho?” twna sa the. Khoutei kaniw rui kakhang daandi paek tamruc phuclou the.

¹⁶Mi tangv tei rui kata tinym nuh khang kadouchamei phu thau the.

¹⁷Khay lou makmei Ngai tuang reymei nungc, Jisu daeng khou kaziap nunc guangna, “Kaanpatpui taektw nang khang tabui khou swloumei ta kahaw cho?” twna thanv the.

¹⁸Jisu rui kaniw ta kaidai khou tei ndiulouna, mi kumhmeipu khou tatna mi hei kumcna sa o twna sa the, “‘Dinhpouc rui katuang ganv guang the, kumna nang kai khou kaziap nunc lev Kaanpatpui taektw tu nchamclou ni twna sa e’ twna sa tio.”

¹⁹Jisu rui samei kumcna kaniw taanc the, kumna Kaanpatpui taektw tei chamdaanvlou the.

²⁰Kumna, zingbangc key pwkhou Jisu kaziap ruhna kanei tei lev tu khang dungckey the.

²¹Kaniw tu bam khou Jisu rui kaniw khou sa the, “Ai nangniw khou kaling siakna sa tuang e: Nangniw gaanv khat rui ata zuanctu puni.”

²²Khoutei kaniw tei lungh kabiu sih the, kumna gaanv khat gaanv khat swna, “Ata hamh e ni, Poubauhmei?” twna thanv thau the.

²³Khoutei mundawna Jisu rui sa the, “Ai lev kamkuak akhat na khou num nchamcmei kamei tei rui ata zuanctu puni.

²⁴Meic Nac Mpouh hei thu kakhang hyloumei thei layna tat bam tuang de, tiki Meic Nac Mpouh ti hei zuanctupui mei tei mu kasan si e dav! Mi pu tei mu puanclou lamc mak ge thei gay ni tuang e!”

²⁵Khoutei kata zuanctu nimeipu Juda rui mundawna, “Ata ny, Rabbi?” twna sa the. Khoutei, “Nang samei tei the,” twna Jisu rui kakhou sa the.

²⁶Kaniw tu bam khou Jisu rui ntyan dwm akhat laana thuanckulou the, kumna hei tei by bakna kaziap nunc khou tiina sa the, “Nangniw laana tu tho; mi hei apumc the.”

²⁷Mi tangv buangh akhat laana thuanckulou the, kumna hei tei kaniw khou tiina sa the, “Nangniw mathiucna mi hei zangv tho;

²⁸kalam thu mi hei meic guay khuay kuaklou khang keyloumei azei the. Mi hei latdyng tuang zei the.

²⁹Ai rui nangniw khou sa tuang e: drakha thai dui hei ai thu zangv dat ni tu hamh the; tiki aPu Guangcdic khou drakha dui kathanc nangniw lev zangv nchamc dat puni.”

³⁰Mi tangv kaniw lu akhat suanlou lana Olive luangcbut thangc tat kan the.

³¹Khoutei Jisu rui kaziap nunc khou sa the, “Aseic zingbangc hei nangniw ata mpatlou puni, kalam thu, ‘Ai rui lauziu gaenghmeipu ta bailuai puni, kumna lauziu pang tei pak phak puni,’ twna hylou e.

³²Tiki ata tiringcthaulou dat pwkhou ai nangniw suangc Galili thangc tat hu puni.”

³³Khoutei Pitar rui mundawna, “Meic guayna nang ta mpatlou pwsini ai thu mpat zat ni tu hamh e,” twna sa the.

³⁴Khoutei, “Ai rui nang khou kaling siakna sa tuang e: aseic zingbangc hei nruay khuangh mak khou, nang amei hamh e twna nang rui sa liang kathumh puni,” twna Jisu rui kakhou sa the.

³⁵Khoutei Pitar rui Jisu khou sa the, “Ai nang lev theic nchamcloumei nganvna ai nang mei hamh e twmei sa zat ni tu hamh e.” Ziap baihmei guay tei rui ni hei tei kumcna sa the.

³⁶Mi tangv tei Jisu kaniw ta nduanghna Gethsemani kawmei bamv khou guang the. Mi khou tei kamei rui kaniw khou sa the, “Mi thangc tei ai huayney khang tat ni he, nangniw mi khou hei dungc bam khwan o.”

³⁷Kamei Pitar lev Zebedi nac mpouh nei ta nduangh tat the. Lungh ryanramei khatni pingmei kakhou guang the.

³⁸Khoutei kamei rui kaniw khou sa the, “Lungh ryanramei rui ai theic ni kumc the, nangniw mi khou hei bamna ata rak nduangh bam o.”

³⁹Kumna kamei hu tat kasuakc khath tw gutna nkhum laamv keyna huayneyna, “Apu, nuh e thei mi buangc hei akhou tii guanglou rio; tiki ai rui ningmei hamh e, nang ningmei de” twna sa the,

⁴⁰Mi tangv Jisu kaziap nunc daeng khou guang dat pwkhou, kaniw zip bam khwan the. Khoutei kamei rui Pitar khou sa the, “Nangniw ganvdak akhat na sini ai lev rak nchamc ngam mak khe nah cho?

⁴¹Nthiammei khou keylou mak khang nangniw ntak nrakna bam o, kumna huayney o. Bumaengh rui thu kahaw e, tiki pumh thu suan the.”

⁴²Jisu tat pat datna huayneyna sa the, “Apu, mi buangc hei ai zangv mak nuh makpui tuang di the tw e thei, nang ningmei sw kan di tho.”

⁴³Kamei pat dat pwkhou kaniw zip bam dat muay khwan the. Kaniw zip niimei rui khaengv ngam mak khe.

⁴⁴Jisu kaniw ta ganclouna tat pat datna mi lat kahak tei sa luan thumhmei swna huayney the.

⁴⁵Mi tangv tei kamei kaziap nunc daeng khou guang datna sa the, “Nangniw zipna nthaekc bam di hai? Zauclo, Meic Nac Mpouh ta paapcmei nunc baanc khou tiilou nipui ganv guang tangc the.

⁴⁶Thau tho, tat di kho, ata zuanctu nimeipu guang the.”

⁴⁷Jisu mi lat hei sa bammei dyng khou, ziap ruhna kanei pang khou kazauhmei Juda tei amuh daihmei nunc khatni charuangc gaanthaic nunc rui ndiuloumei baengsaeng khatni thingdangv sinmei meic kangdai ta nduanghna guang the.

⁴⁸Kaniw rui nym nipuimei kiu, kamei rui kaput nimeipu tei the twna kata zuanctu nimeipu tei rui kaniw khou tei salou the.

⁴⁹Juda tei Jisu daeng khou nzut phut guangna, “Chuzaenghmei nai diu, Rabbi,” twna sana kaput he.

⁵⁰Khoutei Jisu rui kakhou, “Champanv, nang taanc nimei kiu katumcna taanc tho,”[29] twna sa the. Khoutei kaniw guangna Jisu ta nym the.

⁵¹Khoutei Jisu lev bammei gaanv khat rui katuang baengsaeng sat patna tingkuh bangcpu ta dow tina kanukuanc akhat siap ganc the.

⁵²Khoutei Jisu rui kakhou sa the, “Nang tuang baengsaeng tei kabamv khou lou dat kan tho. Baengsaeng sinmei nunc tei baengsaeng hu theic puni.

⁵³Ai rui nkhavlou khang aPu khou ney ti thei kamei rui kauh baanchara tuang rihmei kang ruhna kanei suangc sini geicna kadyng khou ndiu guang nuh de twmei nang thay mak nah cho?

⁵⁴Kum khwan e thei akumhna hyloumei tei guang tangc nina cho?”

⁵⁵Mi dyng khou tei Jisu rui meic kangdai khou tei sa the, “Kwamtupui mei ta nym ni kumcna baengsaeng khatni thing dangv sinna ata nym khang guang tu cho? Tingmik pum ai Ravkai khou nangniw lev dungcna nchamlou bam tu de; nangniw ata nym mak ge.

⁵⁶Tiki muhzwng nunc rui hyloumei tei guang tangh khang mi guay hei pat tuang de.” Khoutei ziap guayna tei kata ganclouna pak kan the.

⁵⁷Jisu ta nymmei nunc tei rui kata Riakdanv dinhpouc nunc khatni gaanvthaih nunc bam kaduai bammei bamv tingkuh daeng thangc zay tat the.

⁵⁸Pitar tei mpaan hiauh hiauna kathei layna tingkuh kai tuang kaimav nganv lay guang the. Kamei kaimav lungc khou gutna akumh sih puni cho twmei zauh khang kamei rigaanv nunc pang khou lay dungc kazauh bam khwan e.

⁵⁹Amuh daihmei nunc khatni pei kapwm tei Jisu ta swluai nuh khang karuc khou saraamhmei sakhi phungc guang khang phu the.

⁶⁰Khoutei saraamhmei sakhi sw khang meic mpeyna guang khwan e, tiki kata swluai biuhmei khuay dinc ngammei kaniw phu tow mak khe. Nkhamh khou gaanv nei guangna

⁶¹“‘Ai Ravguangc tuang Ravkai hei ra key lana zaeng neih thumh khou sw thaulou dat ngam e,’ twna mi pu hei rui sa the,” twna sa the.

⁶²Khoutei tingkuh tei ding thauna, “Mi pu nei hei rui nang ruc khou sa bammei khou hei nang daw pat khang maek khah?” twna sa the.

⁶³Tiki Jisu lat sa mak ge. Khoutei tingkuh tei rui sa the, “Ringhmei Racguangc zanc khou ai rui nang ta syangdyng tiswpui tuang e: Nang hei Ravguangc Nac Mpouh Khrista kiu cho? Sa o.”

⁶⁴Jisu rui kakhou sa the, “Nang samei tei the. Tiki ai rui nangniw khou sa tuang e: Ntaw tangv thu Meic Nac Mpouh hei Ngamparimeipu baanzat thangc dungc bammei khatni muangh khou tuangcna keymei ta nangniw how puni.”

⁶⁵Khoutei tingkuh tei katuang pheychuanh siatna sa the, “Kamei Ravguangc ta thouhsw thouhsak makpui lat sa the. Tabui baihmei sakhi aniu kage nai dat hena cho? Kamei rui Ravguangc ta thouhsw makna sa kanmei tei ntaw nangniw chu kan the!

⁶⁶Nangniw akumhna kakhanh tu cho?” Khoutei, “Kamei theic biuc the,” twna kaniw rui daw the.

⁶⁷Khoutei kaniw rui kazaw khou nteih nsuklou the khatni bai the. Gaanvsaekc rui kata kaphina,

⁶⁸“Khrista, nang ta kaphimei hei thow cho, dinc pat ro,” twna sa the.

⁶⁹Khoutei Pitar tei kaimav khou dungc bam khwan e. Kumna banghpui gaanv khat kadaeng khou guangna, “Nang ni Galilimei Jisu thei laymei e.” twna sa the.

⁷⁰Kamei hei tei meic guayna hu khou nuh makna sa the, “Nang sa bammei hei ai thay mak ge.”

⁷¹Kamei kaimav raengv mun khou tat pat pwkhou, banghpui baihmei gaanv khat rui how lana, kadaeng khou ding bammei nunc khou, “Mi pu hei Nazarethmei Jisu thei laymei de,” twna sa the.

⁷²Khoutei ni kamei nuh makna, “Mi pu ta kiuc ai thay mak ge,” twna syangdyng swna sa the.

⁷³Kanakmei tangv, mi khou tei ding bammei nunc Pitar daeng khou guangna, “Nang ni kaniw pang khou kazauhmei changh de, nang lat gwan khou rui thay de,” twna sa the.

⁷⁴Khoutei, “Ravguangc rui thay kan dio! Ai mi pu ti hei thay mak ge,” twna sa the. Mi dyng khou tei nruay khuangc the.

⁷⁵Khoutei, “Nruay khuangh mak khou, nang amei hamh e twna sa liang kathumh puni,” twna Jisu rui kakhou saloumei tei Pitar mi dyng khou tei ningtow the. Kamei kapaengc patna kap ranv sihna kap the.