Read Rongmei Naga METTHIU 27 Bible Online

METTHIU 27 - Rongmei Naga bible

METTHIU 27

¹Lauthwan khuanzingh amuh daihmei guay khatni charuangc gaanthaic guay tei akumhna Jisu ta swluai kho cho twmei kaphianh the.

²Kumna, kata karakcna zay patna Rommei tuang guanghkhyn Pilat khou tiilou the.

³Jisu ta nkhuaimei tiswlou kan the twmei kata zuanctumei Juda tei thay la khou, kamei lungh laic the, kumna daandi paek tamruc tei amuh daihmei nunc khatni gaanvthaih nunc khou tei phungc guang datna,

⁴“Kakhuay maekmeipu ta swluai khang zuanc tumei hei ai nkhuai the,” twna sa the. “Hei tei aniw thouc hamh the, nang nyng di the,” twna kaniw rui sa the.

⁵Syan tei ravkai khou tei phaiclou ducna tat pat lana, karana riang thaengcluai kan the.

⁶Amuh daihmei nunc tei rui syan tei laa thau lana, “Mi hei ravkai syan bamv khou lou khang kariak rui nuh mak khe, mi hei zei manv di the,” twna sa the.

⁷Kumna kaniw kaphianh lana Zentelmei nunc ta phuploupui bamv khang lai kasiamhmei ramv puk akhat mi syan tei rui liu the.

⁸Mi kum tina mi ramvpuk ti hei ntaw ni “Zei Ramvpuk” twna kaw bam e.

⁹Muhzwng Jeremia rui saloumei tei mi hei kumcna guang tangc kan the. Mi kiu thu: “Kaniw rui dandi paek tamruc tei laa the, hei tei Isaraelmei nunc rui kakhang tii khang nuhmei syan e.

¹⁰Poubauhmei rui akhou tiimei latdanv kumcna kaniw rui mi syan tei rui lai kasiamhmei ramvpuk liu the.”

¹¹Jisu Rommei tuang guanghkhyn hu khou guang ding the. Khoutei, “Nang Jihudimei guangc kiu cho?” twna guanghkhyn tei rui thanv the. Khoutei, “Kiuc tina nang sa tuang the,” twna Jisu rui daw the.

¹²Amuhdaihmei nunc khatni gaanvthaih nunc rui karuc khou khuay nkhamlouna sa bammei khou kamei lat khat sini sa daw mak ge.

¹³Khoutei Pilat rui, “Kaniw rui nang khuay heizu sa bammei guay hei nang chu mak nah cho?” twna sa the.

¹⁴Tiki Jisu kakhou latkaeng akhat na sini mundawlou mak ge. Khoutei akumhmei tuang cho twna guanghkhyn tei ning the.

¹⁵Kaanpatpui Ngai pum guanghkhyn rui kang bammei, meic nunc rui kahawmei gaanv khat ta mpat patmei hei kariak sw bam khwan e.

¹⁶Mi ganv khou tei kazanc tatmei kang bammei Barabbas kawmeipu nai khwan e.

¹⁷Meic kangdai tei guang kaduaipui ganv khou Pilat rui kaniw khou, “Barabbas lev Khrista kawmei Jisu kak khou hei thow ta nangniw khang mpatloumei ta nangniw kahaw cho?” twna thanv the.

¹⁸Kaniw rui Jisu ti hei howtina tii ku tuang e twmei kamei thay e.

¹⁹Pilat tei latzan bamv khou dungc bam khou kanow rui, “Mi kakhuay maekmeipu ruc khou tei nang ramh sw la rio, kalam thu aseic hei amang thangc kalam khou rui ai mpeyna ryanra the,” twna sa guang the.

²⁰Tiki Barabbas ta mpatlouna Jisu ta swluai khang sa o twna amuh daihmei nunc khatni gaanvthaih nunc rui meic kangdai ta tei katiu the.

²¹“Mi nei khou hei thow ta mpatlou o cho?” twna guanghkhyn tei rui sa dat re. Khoutei kaniw rui “Barabbas ta” twna sa the.

²²“Kum e thei Khrista kawmei Jisu ti hei ai tabui sw o twna cho?” twna Pilat rui sa the. “Kata kros khou swluai o” twna kaniw guayna rui sa the.

²³Tiki Pilat rui, “Tabui tuang simei taanv kamei taancna cho?” twna sa the. Tiki kaniw kauc ranv hay hayna, “Kata kros khou swluai o,” twna kauc the.

²⁴Kamei rui sw bammei guay hei ramhkhat sini gaeng mak khe, abay adapmei pat puni kumc di the twmei how lana, “Mi pu ta swluaimei hei ai rui hamh e! Nangniw man de!” twna Pilat rui sana dui laana meic kangdai hu khou tei kabaanc khiu the.

²⁵Meic nunc tei rui mundawna sa the, “Kazei tei aniw khou keylou kan diu, aniw nac nunc khou ni keylou kan diu.”

²⁶Khoutei kamei rui Barabbas ta mpat pat the, kumna Jisu ta tikathamv tang lana kros khou swluai khang tii pat the.

²⁷Mi tangv guanghkhyn tuang ricmei nunc tei rui Jisu ta guangh kai lungc thangc zay gutna rihmei kang kapwm tei rui kadaeng ding huamc the.

²⁸Katuang phey kathangv ganc lana haengc ringhmei pheychuanh nulou the.

²⁹Sauh luai pykhim kasiamhna kapy khou runlou the. Kumna katuang nzat baanc khou ntou builwang tisinlouna kahu khou khuksun keyna, “Kalum e, Jihudimei guangc,” twna sana sinnui the.

³⁰Kumna kakhou nteih nsuklou the, khatni ntou builwang tei laana kapy khou bai the.

³¹Kaniw rui kata sinnui tang lana, pheychuanh tei kathangv gancna katuang phey tipiulou dat the. Kumna kros khou thaengcluai khang kata zay tat kan the.

³²Kaniw tat pat khou Kurenimei kazanc Simon kawmeipu ta ariw lana, rihmei nunc rui kata nymna Jisu tuang kros tipuanc the.

³³Kaniw Golgotha (py rou bamv twna e) kawmei bamv khou guang tangh khou,

³⁴kaniw rui kakhang nkhucmei loumei zouc tii the. Kamei hei tei mbap lana zangv mak ge.

³⁵Kaniw rui kata kros khou thaengclou lana, san zaucna kaniw katuang phey nzanh the.

³⁶Khoutei kaniw dungcna kata nkhwan bam the.

³⁷“Mi hei Jihudimei Guangc Jisu e” twna kata thaengcluaipui khuay tei hyna kapy ruc khou daanclou the.

³⁸Khoutei kwamtumei gaanv nei ta Jisu tuang baanzat baandaw khou thaengclou the.

³⁹Mi khou tei tat kalw bammei nunc rui kata sinnuina kaniw py kazinhna sa the,

⁴⁰“Ravkai ra key lana zaeng neih thumh khou sw thau dat nimeipu, nang rana nang ta kan damc bu cho! Nang Ravguangc Nac Mpouh e thei kros khou rui key o.” twna sinnui the.

⁴¹Mi kumc muayna amuh daihmei nunc, Riakdanv dinhpouc nunc khatni gaanvthaih nunc rui ni kata sinnuina,

⁴²“Kamei meic baihmei ta thu kanlou laki, karana thu kata kan ngam mak khe. Kamei Isaraelmei guangc e! Ntaw kamei kros khou rui key e thei aniw kakhou lwm puni.

⁴³Kamei Ravguangc khou lwm e kumna kamei Ravguangc Nac mpouh e twna sa e. Ravguangc rui kata kanlou nii e thei ntaw kanlou kan di tho!”

⁴⁴Kamei lev thaengc nchamclou bammei kwamtumei nei tei rui ni hei tei kumcna sinnui muay the.

⁴⁵Kalaanv ganvdak charuk khou rui tingzyn ganvdak chakiu nganv kandih kapwm zingc khwan e.

⁴⁶Ganvdak chakiu dou keymei ganv khou Jisu rui kauc ranvna, “Eloi, Eloi, Lema Sabakh Thani” twna kauc pat khwan e. Mi kabac kiu thu, “ARacguangc, ARacguangc, tabui swna nang ata mpatlou tu cho,” twna e.

⁴⁷Mi khou tei ding bammei meic gaanvsaekc rui chu lana, “Mi pu hei Elija ta kaw bam e,” twna sa the.

⁴⁸Gaanv khat rui kaluak kalat langhpanv kumhmei khat laa guangna hei tei zoukhiangc khou ntin the, kumna ntou zwan khou louna kakhang tii the.

⁴⁹Khoutei, “Nkhwan o, Elija rui kata guang kanlou puni ny zauc kho,” twna baihmei guay tei rui sa the. (Gaanv khat rui buy laana kanaek khou biw the, khoutei dui lev zei pat the.)

⁵⁰Khoutei Jisu khwan ranvna kauc patlou dat lana kabumaengc mpatlou kan the.

⁵¹Zauclo, Ravkai tuang khamthingh phey tei karuc thangc rui kabangc nganvna kanei khang siat kaek the, kandih kanuk the, khatni taudaic guay bak the;

⁵²tarou guay laanclou the khatni nthanmei zip kanmei nunc mpeyna ringcthau dat the.

⁵³Tarou khou rui patna, Jisu ringcthau datmei tangv kaniw Nthanmei Kaidai khou gut the kumna meic mpeyna khou lyanlou the.

⁵⁴Rihpy khatni Jisu ta nkhwanna zauc bammei rihmei nunc tei baengla khatni pat bammei guay tei how la khou ping kasic the, kumna, “Kamei hei Ravguangc Nac Mpouh changh lana di the!” twna sa the.

⁵⁵Khoutei Galili thangc rui Jisu siamruai swna kathei lay keymei ntumei mpeyna duh thangc rui phaengc bam khwan e.

⁵⁶Mi nunc pang khou kiu Magadaleni Meri, Jakob lev Josep pui Meri, khatni Jebedi now kazauh e.

⁵⁷Tingzyn key pwkhou Arimathia kaidai thangc rui, kazanc Josep twna kawmei lungcgaymeipu gaanv khat guang khwan e. Kamei hei ni Jisu ziap akhat khwan e.

⁵⁸Mi pu hei Pilat daeng khou guangna Jisu pumc tei ney the. Khoutei tii khang Pilat rui latdanv pat the.

⁵⁹Josep rui kapumc tei laana pheynuaih mphwanmei kathanc rui kazihlouna,

⁶⁰ntauh khou langcloumei Josep katuang tarou thanh khou lou the, kumna ntauh daihmei rui tarou kaimun tei luangc thinglouna tat kan the.

⁶¹Magadaleni Meri lev baihmei Meri tei mi tarou ta tei zauc laanna mi khou tei dungc bam khwan e.

⁶²Nthuanh thauna, mi kiu Sabbathneic amuh daihmei nunc lev Pharisimei nunc Pilat daeng khou guang kariuna,

⁶³“Kaipouc, ‘zaeng neih thumh tangv ata tiringcthaulou dat puni,’ twna mi saraamhmeipu hei rui kamei ringc bam khou saloumei tei aniw ningtow e.

⁶⁴Hei zaeng rui, zaeng neih thumh tangh mak saanv tarou tei gaek khang latdanv patlou o; kum mak ge thei kaziap nunc rui kapumc tei houc tat lana kata tiringcthaulou kan the twna guat reymei khang tei suangc nkhamhmei rui guat kasic ranv pung the,” twna sa the.

⁶⁵Khoutei, “Rigaanvmei laa tho, nangniw thaymei kumcna gaek chuyna gaek tho,” twna Pilat rui kaniw khou sa the.

⁶⁶Kaniw tatna roukham tauc khou tei laanc pat nuh mak khang madanclou the, kumna rigaanvmei nunc lou the.